മുളകിട്ട കറികൾക്ക് ആരാധകർ ഏറെയാണ്. രുചിയിലും മണത്തിലും കേമനാണ് ചെമ്മീൻ മുളകിട്ടത്. എളുപ്പത്തിൽ തയ്‌യാറാക്കാവുന്ന ഈ വിഭവം പരിചയപ്പെടാം
ചേരുവകൾ
- ചെമ്മീൻ ഇടത്തരം വലുപ്പമുള്ളത് – 20 എണ്ണം
- സവാള കുനുകുനെ ഒരേ വലുപ്പത്തിൽ അരിഞ്ഞത് – 2 വലുത്
- മുളക് പൊടി -5 ടീസ്പൂൺ
- കാശ്മീരി മുളക്പൊടി – 2 ടീസ്പൂൺ
- വാളൻ പുളി – ആവശ്യത്തിന്
- വെള്ളം – ആവശ്യത്തിന്
- ഉപ്പ് – ആവശ്യത്തിന്
- മഞ്ഞൾപൊടി – ആവശ്യത്തിന്
- കറിവേപ്പില – ഒരു തണ്ട്
- വെളിച്ചെണ്ണ- ആവശ്യത്തിന്
തയ്‌യാറാക്കുന്ന വിധം
കഴുകി വൃത്തിയാക്കിയ കൊഞ്ച് അല്പം വെള്ളമൊഴിച്ചു ഒരു ചട്ടിയിൽ ഉപ്പും ചേർത്ത് വേവിയ്‍ക്കുക … അതെ സമയം മറ്റൊരു പാനിൽ വെളിച്ചെണ്ണ ചൂടാക്കി സവാള അരിഞ്ഞത് ചേർത്ത് ചെറുതീയിൽ വഴറ്റുക …
സവാള നന്നായി വഴണ്ട് നിർബന്ധമായും സ്വർണ നിറം ആകേണ്ടതാണ് .. ആ സമയത്തു മുളകുപൊടി, മഞ്ഞൾപൊടി ചേർത്ത് , അഞ്ചാറു സെക്കൻഡുകൾ കൂടെ ഫ്രൈ ചെയ്‌യുക.ഈ സവാള കൂട്ട് വെന്തു വരുന്ന കൊഞ്ചിലോട്ട് ചേർക്കാം …
വാളൻ പുളി വെള്ളം ഒഴിച്ചു കുഴച്ചത് പാനിലൊഴിച്ചു അതും കൂടെ ചേർക്കുക..
ആവശ്യമുള്ള ഗ്രേവി കിട്ടുന്നത്ര വെള്ളമൊഴിച്ചു ചെറുതീയിൽ തന്നെ നന്നായി തിളപ്പിക്കുക … വറുത്ത സവാളയും കൊഞ്ചും മുളകുപൊടിയുമൊക്കെ നന്നായി ബ്ലെൻഡ് ആയി വരുന്ന വരെ പാകം ചെയ്‌യണം …
വാങ്ങി വെച്ചതിനു ശേഷം ഒരു ടീസ്പൂൺ എണ്ണ മീതെ ഒഴിക്കാം. കറിവേപ്പില ചേർക്കുക
Content Highlights Prawn Curry Recipe
