വടകര: ദിവസവും പാഴാക്കിക്കളയുന്ന ലിറ്റർകണക്കിന് തേങ്ങാവെള്ളം ശീതളപാനീയമായി ഇനി കുപ്പിയിൽ കിട്ടും. വടകര നാളികേര കർഷക ഉത്പാദക കമ്പനിയാണ് ഏഴുമാസത്തോളം കേടുകൂടാതെ സൂക്ഷിക്കാൻ കഴിയുന്ന ഈ ഉത്പന്നം ഡി കൊക്കോസ് കോക്കനട്ട് വാട്ടർ എന്ന ബ്രാൻഡ് നെയിമിൽ വിപണിയിൽ ഇറക്കുന്നത്. ഈ മാസം അവസാനം ഔദ്യോഗിക ലോഞ്ചിങ് നടക്കുമെന്ന് കമ്പനി ചെയർമാൻ പ്രൊഫ. ഇ. ശശീന്ദ്രൻ പറഞ്ഞു.
ദിവസവും 5000 പച്ചത്തേങ്ങ വെട്ടി കൊപ്രയാക്കുന്ന വെളിച്ചെണ്ണ പ്ലാന്റ് കമ്പനിക്കുണ്ട്. ഈ തേങ്ങാവെള്ളമെല്ലാം പാഴാക്കുകയായിരുന്നു പതിവ്. ഇത് ഉപയോഗപ്പെടുത്താമെന്ന ചിന്തയിലാണ് തേങ്ങാവെള്ളം സംസ്കരിച്ച് ശീതളപാനീയമാക്കാൻ തീരുമാനിച്ചത്. ഇതിനുള്ള സാങ്കേതികവിദ്യ സി.പി.സി.ആർ.ഐ.യും മറ്റും വികസിപ്പിച്ചെടുത്തിട്ടുണ്ട്. എന്നാൽ, ചില പരിമിതികൾകാരണം ഇതിൽ കുറച്ച് പരീക്ഷണങ്ങളൊക്കെ നടത്തിയാണ് ഏഴുമാസത്തോളം സൂക്ഷിക്കാവുന്ന നിലയിലേക്ക് വികസിപ്പിച്ചെടുത്തത്. ഇത് വിജയകരമാണെന്ന് കമ്പനി അവകാശപ്പെട്ടു.
ദിവസം അയ്യായിരം തേങ്ങ വെട്ടുമ്പോൾ 500 ലിറ്റർ തേങ്ങാവെള്ളം കിട്ടും. ആദ്യഘട്ടത്തിൽ 250 ലിറ്റർ വീതം രണ്ടുതവണ സംസ്കരിച്ചുകഴിഞ്ഞു. ആയിരം ലിറ്റർവരെ സംസ്കരിക്കാനുള്ള ശേഷി പ്ലാന്റിനുണ്ട്. മണിയൂരിലെ വെളിച്ചെണ്ണ പ്ലാന്റിൽനിന്ന് തേങ്ങാവെള്ളം ചെമ്മരത്തൂരിലെ നീര പ്ലാന്റിൽ എത്തിച്ചാണ് സംസ്കരിക്കുന്നത്. ഇതിനായി പുതിയ യന്ത്രം വാങ്ങിയിട്ടുണ്ട്. ഫില്ലിങ്ങിനും മറ്റും നീര പ്ലാന്റിലെ യന്ത്രങ്ങൾതന്നെയാണ് ഉപയോഗിക്കുന്നത്.
എട്ടുലക്ഷത്തോളം രൂപ ഈ സംരംഭത്തിനായി ചെലവഴിച്ചു. 200 മില്ലിയുടെ കുപ്പി 25 രൂപയ്ക്ക് വിൽക്കാനാണ് ലക്ഷ്യമിടുന്നത്. പ്രകൃതിദത്തപാനീയമെന്ന നിലയിൽ ഈ ഉത്പന്നത്തിന് സ്വീകാര്യത കിട്ടുമെന്ന പ്രതീക്ഷയിലാണ് കമ്പനി. നിലവിൽ മാർക്കറ്റിൽ തേങ്ങാവെള്ളം ശീതളപാനീയമായി വിൽക്കുന്നത് കുറവാണ്. ഇതും പ്രതീക്ഷ പകരുന്ന ഘടകമാണ്.
Content highlights: coconut water will get in bottle vadakara coconut company
