തിളങ്ങുന്ന ചര്‍മം വേണോ? തിരഞ്ഞെടുക്കാം ഈ പഴങ്ങള്‍

തണുത്ത കാലാവസ്ഥയിൽനിന്ന് വേനൽക്കാലത്തേക്കുള്ള ചുവടുവെപ്പിലാണ് കാലാവസ്ഥ ഇപ്പോൾ. അടിക്കടിയുള്ള കാലാവസ്ഥാമാറ്റം ചർമത്തിന്റെ ആരോഗ്യത്തെ സാരമായി ബാധിച്ചേക്കാം. പഴങ്ങൾ ശരീരത്തിന് ആവശ്യമായ പോഷകങ്ങൾ ഉറപ്പുവരുത്തുന്നതിനൊപ്പം സൗന്ദര്യ സംരക്ഷണത്തിലും കാര്യമായ പങ്കുവഹിക്കുന്നുണ്ട്. ചർമ സൗന്ദര്യം കാത്തുസൂക്ഷിക്കുന്നതിൽ പഴങ്ങൾക്കുള്ള പങ്ക് വളരെ വലുതാണ്. പഴങ്ങൾ ചർമത്തിന്റെ പുറമെ പുരട്ടുന്നത് മാത്രമല്ല, അവ കഴിക്കുന്നത് കൊണ്ടും ചർമസൗന്ദര്യം നിലനിർത്താൻ കഴിയുമെന്ന് വിദഗ്ധർ പറയുന്നു.

തക്കാളി

വിറ്റാമിൻ എ, വിറ്റാമിൻ സി എന്നിവ ധാരാളമായി അടങ്ങിയ പഴമാണ് തക്കാളി. ഈ ആന്റിഓക്സിഡന്റുകൾ ശരീരത്തിലെ നീർക്കെട്ടുകൾ ഇല്ലാതാക്കുന്നതിനൊപ്പം മുഖക്കുരുവിനെയും തുരത്തുന്നു. ചർമകോശങ്ങളെ സംരക്ഷിക്കുന്നതിനൊപ്പം സൂര്യപ്രകാശം ഏൽക്കുമ്പോഴുള്ള നാശത്തെ ചെറുക്കുകയും ചെയ്‌യുന്നു.

ഓറഞ്ച്

വിപണിയിൽ ലഭ്യമായ മിക്ക സൗന്ദര്യ ലേപനങ്ങളിലും ഓറഞ്ച് അടങ്ങിയിട്ടുണ്ട്. വിറ്റാമിൻ സി ധാരാളമായി അടങ്ങിയിട്ടുള്ള ഓറഞ്ച് കഴിക്കുന്നതും ചർമ്മത്തിന്റെ തിളക്കം നിലനിർത്തും. ചർമത്തിന്റെ നാശം തടയുന്നതിനും ഓറഞ്ചിന് വലിയ പങ്കുണ്ട്.

അവക്കാഡോ

ധാതുക്കളും ആരോഗ്യപ്രദമായ കൊഴുപ്പും ധാരാളമടങ്ങിയിട്ടുള്ള പഴമാണ് അവക്കാഡോ. ഇത് രണ്ടും നമ്മുടെ ചർമത്തിന് ഏറെ ഗുണകരമാണ്. കൂടാതെ, അവക്കാഡോയിൽ കൂടുതലായി അടങ്ങിയിരിക്കുന്ന വിറ്റാമിൻ സി, ഇ എന്നിവ ചർമത്തിന്റെ തിളക്കം നിലനിർത്താൻ സഹായിക്കുന്നു.

തണ്ണിമത്തൻ

95 ശതമാനവും വെള്ളമടങ്ങിയ തണ്ണിമത്തൻ ചർമത്തിന്റെ മൃദുത്വം കാത്തുസൂക്ഷിക്കാൻ സഹായിക്കുന്നു. വിറ്റാമിൻ സി, ലൈക്കോപീൻ, വിറ്റാമിൻ എ എന്നിവയും ചർമത്തിന്റെ തിളക്കവും മൃദുത്വവും കാത്തുസൂക്ഷിക്കാൻ സഹായിക്കുന്നു.

Content highlights: fruits for healthy glowing skin fruits for healthy skin