മലപ്പുറം: ഇൻഷുറൻസ് ഇല്ലാത്തതിന്റെ പേരിൽ യുവാവിന്റെ മൊബൈൽ ഫോൺ പിടിച്ചു വാങ്ങിയ ട്രാഫിക് എസ്ഐക്കെതിരെ നാട്ടുകാരുടെ പ്രതിഷേധം. ട്രാഫിക് സ്റ്റേഷനിലെ എസ്ഐ ഇന്ദുറാണിക്കെതിരെയാണ് നാട്ടുകാർ പ്രതിഷേധിച്ചത്. എസ്ഐയെ തടഞ്ഞുനിർത്തി ഫോൺ തിരികെ വാങ്ങുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലാണ്.
ഭാര്യ ഗർഭിണിയാണെന്നും അവർ എന്തെങ്കിലും സഹായത്തിനായി വിളിച്ചാൽ അറിയാൻ സാധിക്കില്ലെന്നു പറഞ്ഞിട്ടും പോലീസ് ചെവിക്കൊണ്ടില്ലെന്ന് വീഡിയോയിൽ പറയുന്നു. തുടർന്ന് നാട്ടുകാർ ഇടപെട്ടതിന്റെ അടിസ്ഥാനത്തിലാണ് എസ്ഐ യുവാവിന്റെ ഫോൺ തിരികെ നൽകിയത്.
പിഴ കോടതിയിൽ ഒടുക്കാമെന്നു വ്യക്തമാക്കിയിട്ടും പോലീസ് ഫോൺ പിടിച്ചുവാങ്ങുകയായിരുന്നു. മലപ്പുറം ചെമ്മക്കടവ് വില്ലേജ് ഓഫീസിനു സമീപത്താണ് സംഭവം നടന്നതെന്ന് വീഡിയോയിൽ പറയുന്നുണ്ട്.
