ശർക്കര കഴിക്കുന്നതുകൊണ്ടുള്ള ഗുണങ്ങൾ വിവരിച്ച് ബോളിവുഡ് നടി ശിൽപ്പ ഷെട്ടി അടുത്തിടെ തന്റെ ഇൻസ്റ്റഗ്രാമിൽ പോസ്റ്റ് പങ്കുവെച്ചിരുന്നു. രക്തം ശുദ്ധീകരിക്കാനും ദഹനപ്രക്രിയ എളുപ്പമാക്കാനും ശർക്കര മികച്ചതാണെന്ന് ശിൽപ്പ ഷെട്ടി തന്റെ പോസ്റ്റിൽ വ്യക്തമാക്കുന്നു.
ഇതിനുപുറമെ അനേകം ഗുണങ്ങൾക്കൂടി ശർക്കരയ്‍ക്ക് ഉണ്ട്. 20 ഗ്രാം ശർക്കരയിൽ 9.8 ഗ്രാം കാർബോഹൈഡ്രേറ്റ്, 9.7 ഗ്രാം പഞ്ചസാര, 0.01 ഗ്രാം പ്രോട്ടീൻ, കോളിൻ, ബെറ്റെയ്ൻ, വിറ്റാമിൻ ബി12, ഫോളേറ്റ്, കാൽസ്യം, അയൺ, ഫോസ്‌ഫറസ്, മഗ്നീഷ്യം എന്നിവയെല്ലാം അടങ്ങിയിരിക്കുന്നു.
മലബന്ധം തടയുന്നു
ദഹനത്തിന് സഹായിക്കുന്ന എൻസൈമുകളെ ശർക്കര ഉത്തേജിപ്പിക്കുന്നു. ഇത് കുടലിലൂടെയുള്ള ഭക്ഷണത്തിന്റെ നീക്കത്തെ സ്വാധീനിക്കുന്നു. ഇത് മലബന്ധം തടയുന്നതിന് സഹായിക്കുന്നു.
വയറിനെ തണുപ്പിക്കുന്നു
ശർക്കര കഴിക്കുന്നത് സാധാരണനിലയിലുള്ള ശരീരതാപനില നിർത്താൻ സഹായിക്കുമെന്ന് വിദഗ്ധർ പറയുന്നു. ഇത് വയറിനെ തണുപ്പിക്കാനും സഹായിക്കുന്നു. തണുത്തവെള്ളത്തിൽ ശർക്കര ഇട്ടു തയ്‌യാറാക്കുന്ന ശർക്കര സർബത്ത് വേനൽക്കാലത്ത് കുടിക്കുന്നത് ശരീരവും വയറും തണുപ്പിച്ച് നിർത്താൻ സഹായിക്കും.
മുഖക്കുരുവിന് എതിരേ
ചർമ്മത്തിന്റെ തിളക്കം നിലനിർത്താൻ മാത്രമല്ല, മുഖക്കുരുപോലുള്ള ചർമ്മ പ്രശ്നങ്ങൾ ഒരു പരിധിവരെ നിയന്ത്രിച്ചു നിർത്താൻ ശർക്കര സഹായിക്കുന്നു. കൂടാതെ, ചർമ്മത്തിലെ ചുളിവുകൾ, കറുത്ത പാടുകൾ എന്നിവ ഇല്ലാതാക്കുന്നതിനും ശർക്കര സഹായിക്കുന്നു.
പ്രതിരോധശക്തി വർധിപ്പിക്കുന്നു
ആന്റിഓക്സിഡന്റുകളും സിങ്ക്, സെലേനിയം പോലുള്ള ധാതുക്കളും ധാരാളമടങ്ങിയിരിക്കുന്നതിനാൽ അണുബാധയ്ക്കെതിരേയുള്ള പ്രതിരോധ കവചമായി ശർക്കര പ്രവർത്തിക്കുന്നു. ഇതിനുപുറമെ രക്തത്തിലെ ഹീമോഗ്ലോബിന്റെ അളവ് വർധിപ്പിക്കുന്നതിനും ഇത് സഹായിക്കുന്നു.
Content highlights: health benefit of jaggery, jaggery of skin health, immunity boost
