ഭാരം കുറയ്‍ക്കാൻ ഡയറ്റിങ് ചെയ്‌യുന്നവർ ഭക്ഷണത്തിന് പകരം ജ്യൂസുകൾക്കും സ്മൂത്തികൾക്കും പ്രാധാന്യം കൊടുക്കാറുണ്ട്. ഭാരം കുറയാൻ ദ്രവരൂപത്തിലുള്ള ഭക്ഷണമാണ് നല്ലതെന്ന് കരുതിയാണ് ജ്യൂസുകൾ ഡയറ്റിന്റെ ഭാഗമാക്കുന്നത്. എന്നാൽ ഇത് സുരക്ഷിതമാണോ?
ഇതേക്കുറിച്ച് ന്യൂട്രിഷൻ കൺസൾട്ടന്റ് രുചി ശർമ ഇൻസ്റ്റഗ്രാമിൽ ഒരു അനുഭവം പങ്കുവെച്ചിരുന്നു. ഭാരം കുറയ്‍ക്കാൻ ശ്രമിച്ച ഒരു ക്ലയന്റ് ഭക്ഷണത്തിന് പകരം ജ്യൂസുകളും ഷെയ്‍ക്കുകളും കഴിച്ച് തടി കൂടിയ അനുഭവമാണ് അവർ പങ്കുവെച്ചത്. ഒരാഴ്ചയ്‍ക്ക് ശേഷം അവരുടെ ഊർജസ്വലത കുറയുകയും മാനസികമായി തകരുകയും ചെയ്തു.
ദ്രവരൂപത്തിലുള്ള ഭക്ഷണം കഴിക്കുന്നത് അമിത കലോറി കൂടുതൽ ശരീരത്തിലെത്താൻ ഇടയാക്കും. ഇത് ശരീരത്തിൽ കൊഴുപ്പ് കൂടി തടി കൂടാനും വഴിയൊരുക്കും. ദ്രവരൂപത്തിലുള്ള ഭക്ഷണം കഴിക്കുന്നത് പെട്ടെന്ന് വിശപ്പ് കൂടാനും ഇടയാക്കും. അതിനാൽ തന്നെ ഇത്തരം ഡയറ്റിങ് ഗുണം ചെയ്‌യില്ലെന്ന് മാത്രമല്ല ദോഷകരമാവുകയും ചെയ്‌യും.
ഇത്തരത്തിലുള്ള സിംപിൾ കാർബോഹൈഡ്രേറ്റുകൾ വളരെ എളുപ്പത്തിൽ ഊർജമായി മാറുകയും ശരീരത്തിലേക്ക് വളരെ പെട്ടെന്ന് ഉപയോഗിക്കപ്പെടുകയും ചെയ്‌യുന്നു. ഇത് രക്തത്തിലെ പഞ്ചസാരയുടെ തോത് ഉയരാനും പാൻക്രിയാസിൽ നിന്ന് ഇൻസുലിൻ സ്രവിക്കാനും ഇടയാക്കും. ഇത് ആരോഗ്യത്തെ ദോഷകരമായാണ് ബാധിക്കുക.
ആരോഗ്യകരമായി എങ്ങനെ ഭാരം കുറയ്‍ക്കാം?
മുഴുധാന്യങ്ങൾ, വിറ്റാമിനുകൾ അടങ്ങിയ ഭക്ഷണം, പച്ചക്കറികൾ, സങ്കീർണ കാർബോഹൈഡ്രേറ്റുകൾ, എന്നിവ അടങ്ങിയ ഭക്ഷണം കഴിക്കണം. പഴങ്ങൾക്ക് പകരം ജ്യൂസ് കഴിക്കുന്നത് ശരിയായ രീതിയല്ല. കാരണം, ജ്യൂസുകളിൽ നാരുകളുടെ അംശവും പോഷകങ്ങളും നഷ്ടപ്പെട്ടുപോകും. രണ്ട് ഓറഞ്ചുകളിൽ 60-100 കലോറി ഊർജമാണ് അടങ്ങിയിട്ടുള്ളത്. എന്നാൽ ഒരു ഗ്ലാസ് ഓറഞ്ച് ജ്യൂസിൽ ഇത് 180 കലോറിയാണ്. രണ്ട് ഓറഞ്ച് കഴിച്ചാൽ വയർ നിറഞ്ഞതായി അനുഭവപ്പെടും. എന്നാൽ ഒരു ഗ്ലാസ് ഓറഞ്ച് ജ്യൂസ് ഇതിന് പകരമാവില്ല. അതുപോലെ തന്നെയാണ് പ്രോട്ടീൻ ഷെയ്‍ക്കുകളുടെ കാര്യവും. പ്രോട്ടീൻ സമ്പന്നമായ ഭക്ഷണം കഴിക്കുന്നതിന് പകരമാവില്ല പ്രോട്ടീൻ ഷെയ്‍ക്കുകൾ കഴിക്കുന്നത്.
Content Highlights: Weight loss: can liquid-based diet help in shedding Kilos
