കല്യാണത്തിന് ബന്ധുക്കളെയും നാട്ടിലുള്ളവരെയുമൊക്കെ ക്ഷണിച്ച് വിരുന്ന് കൊടുക്കുന്നത് ഇന്ത്യൻ സംസ്കാരത്തിന്റെ ഭാഗമാണ്. പ്രത്യേകം ക്ഷണം സ്വീകരിച്ച് വരുന്ന അതിഥികൾക്ക് മികച്ച ഭക്ഷണം നൽകാൻ അതിഥേയർ പ്രത്യേകം ശ്രദ്ധിക്കും. വിരുന്നിനൊരുക്കിയ ഭക്ഷണം ബാക്കിയാകുന്നത് സാധാരണമാണ്. മിക്കവരും ബാക്കിയാകുന്ന ഭക്ഷണം കുഴിച്ച് മൂടുകയാണ് പതിവ്.
സഹോദരന്റെ വിവാഹത്തിന് ബാക്കി വന്ന ഭക്ഷണം രാത്രിയിൽ പാവപ്പെട്ടവർക്ക് വിളമ്പി നൽകുന്ന യുവതിയുടെ ചിത്രങ്ങളാണ് സോഷ്യൽ മീഡിയയിൽ വൈറലായിരിക്കുന്നത്. കല്യാണത്തിന് ധരിച്ച അതേ വേഷത്തിൽ റെയിൽവേ പ്ലാറ്റ്ഫോമിൽ ഇരുന്ന് ഭക്ഷണം വിളമ്പി നൽകുന്ന യുവതിയെ ആണ് ചിത്രങ്ങളിൽ കാണാൻ കഴിയുക.
ഒരു വെഡ്ഡിങ് ഫോട്ടോഗ്രാഫറാണ് ചിത്രങ്ങൾ ഫെയ്സ്ബുക്കിൽ പങ്കുവെച്ചത്. പപിയ കാർ എന്നാണ് യുവതിയുടെ പേര് എന്ന് ഫോട്ടോഗ്രഫർ പറഞ്ഞു. പശ്ചിമബംഗാളിലെ കൊൽക്കത്തയിലുള്ള സബ്അർബൻ റെയിൽവേ സ്റ്റേഷനായ റണാഗട്ട് ജംഗ്ഷനിൽ ഡിസംബർ അഞ്ചിന് പുലർച്ചെ ഒരുമണിക്ക് എടുത്ത ചിത്രങ്ങളാണിതെന്ന് ഫോട്ടോഗ്രഫർ അവകാശപ്പെട്ടു.
യുവതിയെ അഭിനന്ദിച്ച് നിരവധി പേരാണ് ചിത്രങ്ങൾക്കു കമന്റ് ചെയ്തിരിക്കുന്നത്. മുമ്പും ഇതുപോലെ വിവാഹത്തിന് ബാക്കി വന്ന ഭക്ഷണം പാവപ്പെട്ടവർക്ക് നൽകിയ സംഭവം ഉണ്ടായിട്ടുണ്ടെന്നും അതേസമയം എല്ലാവർക്കും ഈ മനസ്സുണ്ടാകില്ലെന്നും ചിലർ പറഞ്ഞു. എല്ലാവർക്കും യുവതിയുടേതിന് സമാനമായ മനസ്സ് ഉണ്ടായിരുന്നെങ്കിൽ ലോകം കുറെക്കൂടി സുന്ദരമായിരുന്നേനേ എന്ന് മറ്റൊരാൾ കമന്റ് ചെയ്തു.
Content highlights: bengal woman serves leftover food from wedding to the needy wins hearts
