ഭക്ഷണമെന്നാൽ ചിലർക്ക് ജീവൻ നിലനിർത്താനുള്ള വഴിമാത്രമാണ്. എന്നാൽ, മറ്റുചിലർക്കാകട്ടെ അത് ജീവനോളം തന്നെ പ്രധാനപ്പെട്ടകാര്യമാണ്. എന്നാൽ, അമേരിക്കക്കാരനായ ഡേവിഡ് ആർ. ചാൻ എന്നയാൾക്ക് ഭക്ഷണം ഗൗരവമേറിയ ബിസിനസ് ആണ്. വലിയ ഭക്ഷണപ്രേമിയായ ഡേവിഡ് ഇതുവരെ സന്ദർശിച്ചത് അമേരിക്കയിലുള്ള 8000 ചൈനീസ് റെസ്റ്ററന്റുകളാണ്. ഓരോ തവണയും ഓരോ റെസ്റ്ററന്റിൽനിന്ന് ഭക്ഷണം കഴിച്ചു കഴിയുമ്പോൾ ഇദ്ദേഹം തന്റെ അനുഭവം പേഴ്സണൽ ബ്ളോഗിലും ഇൻസ്റ്റഗ്രാം പേജിലും പങ്കുവയ്ക്കും.
1960-കളിലാണ് ഡേവിഡ് ചൈനീസ് റെസ്റ്ററന്റുകൾ സന്ദർശിച്ചു തുടങ്ങിയത്. ഭക്ഷണത്തിലൂടെ തന്റെ വ്യക്തിത്വം കണ്ടെത്താനുള്ള ശ്രമമാണ് തുടക്കകാലത്ത് ഉണ്ടായിരുന്നതെന്ന് ബി.ബി.സിക്ക് നൽകിയ അഭിമുഖത്തിൽ ഡേവിഡ് പറഞ്ഞു.
യു.എസിന്റെ ചരിത്രത്തിൽ ചൈനയ്ക്കുള്ള പങ്ക് എന്തെന്നുള്ള അന്വേഷണമാണ് ചൈനീസ് ഭക്ഷണം കഴിക്കുന്നതിനുള്ള താത്പര്യം എന്നിലുണ്ടാക്കിയത്. രാജ്യത്തിന്റെ വിവിധഭാഗങ്ങളിൽ ചൈനക്കാരൻ എങ്ങിനെയായിരുന്നുവെന്നത് മനസ്സിലാക്കുക എന്ന ഉദ്ദേശ്യവും പിന്നിലുണ്ടായിരുന്നു-ഡേവിഡ് പറഞ്ഞു. എന്നാൽ, ഡേവിഡിന്റെ ഈ ആഗ്രഹം പിന്നീട് അമേരിക്കയിൽ പുതുചരിത്രം കുറിച്ചു.
റെസ്റ്ററന്റ് കളക്ടർ എന്നാണ് ഡേവിഡിന്റെ വിളിപ്പേര്. ഇത്രയേറെ റെസ്റ്ററന്റുകളിൽ നിന്നും ഭക്ഷണം കഴിക്കുമ്പോൾ ഡേവിഡ് തന്റെ ആരോഗ്യകാര്യത്തിൽ അതീവശ്രദ്ധാലുവാണ്. മധുരവും കൊളസ്ട്രോളും കുറഞ്ഞ ആഹാരം തിരഞ്ഞെടുക്കാൻ അദ്ദേഹം പരമാവധി ശ്രദ്ധിക്കും. കഴിക്കുന്ന ഭക്ഷണം അധികമാകാതിരിക്കാൻ ശ്രദ്ധിക്കുമെന്നും പതിവായി വ്യായാമം ചെയ്യുമെന്നും അതാണ് തന്റെ ആരോഗ്യരഹസ്യമെന്നും ഡേവിഡ് അഭിമുഖത്തിൽ വ്യക്തമാക്കി.
എന്തായാലും താൻ വിശ്രമജീവിതം തുടങ്ങുന്നതുവരെ കഴിയുന്നത്ര ചൈനീസ് റെസ്റ്ററന്റുകൾ സന്ദർശിച്ച് രുചിഭേദങ്ങൾ മനസ്സിലാക്കാൻ ഇഷ്ടപ്പെടുന്നുവെന്ന് അദ്ദേഹം കൂട്ടിച്ചേർത്തു.
Content highlights: man visits 8,000 chinese restaurants across america, Chinese food lover, Food lover, David k
