ബിരിയാണി, നെയ്ച്ചോറ്, ഫ്രൈഡ് റൈസ് പോലുള്ള വിഭവങ്ങൾ തയ്‌യാറാക്കുമ്പോഴുള്ള ഏറ്റവും വലിയ വെല്ലുവിളിയാണ് പാത്രത്തിന്റെ അടിയിൽ കരിഞ്ഞുപിടിക്കുകയെന്നത്. ഉണ്ടാക്കുന്ന വിഭവത്തിന്റെ രുചിയും ഗുണവും നഷ്ടപ്പെടുമെന്ന് മാത്രമല്ല, പാത്രത്തിന്റെ അടിയിൽ പിടിച്ചത് ഇളക്കിമാറ്റുന്നതിന് ഇരട്ടി പണികൂടി എടുക്കേണ്ടി വരുമെന്നതും ബുദ്ധിമുട്ടുണ്ടാക്കുന്നു.
ഇങ്ങനെ പാത്രത്തിന്റെ അടിയിൽ പിടിക്കാതിരിക്കാൻ എളുപ്പവിദ്യ പറഞ്ഞു തരികയാണ് ഷെഫ് കുനാൽ കപൂർ. തന്റെ ഇൻസ്റ്റഗ്രാം പേജിൽ വീഡിയോയിലൂടെ പതിവായി പങ്കുവയ്‍ക്കുന്ന കുനാൽസ് ടിപ്സ്&ട്രിക്സ് എന്ന സീരീസിലൂടെയാണ് കുനാൽ എളുപ്പ വിദ്യ പങ്കുവെച്ചിരിക്കുന്നത്.
ഫ്രൈഡ് റൈസ് തയ്‌യാറാക്കുമ്പോൾ മിക്കപ്പോഴും നിങ്ങളുടെ പാത്രത്തിന്റെ അടിയിൽ പിടിച്ചിട്ടുണ്ടാകുമെന്ന കാര്യം എനിക്കറിയാമെന്നും അത് ഒഴിവാക്കാനുള്ള എളുപ്പവിദ്യ ഇതാ എന്നും പറഞ്ഞാണ് കുനാൽ വീഡിയോ പങ്കുവെച്ചിരിക്കുന്നത്.
1. പാകം ചെയ്‌യാൻ ഉദ്ദേശിക്കുന്ന പാത്രം അടുപ്പത്ത് വെച്ച് നല്ലപോലെ ചൂടാക്കുക.
2. കുറച്ച് വെളിച്ചെണ്ണ പാത്രത്തിലേക്ക് ഒഴിച്ചശേഷം പാത്രത്തിന്റെ എല്ലാ വശത്തേക്കും വ്യാപിപ്പിക്കുക.
3. എണ്ണ ചൂടായി പാത്രത്തിൽ നിന്ന് നന്നായി പുക വരുന്നത് വരെ അടുപ്പിൽ തന്നെ വയ്‍ക്കുക. ശേഷം എണ്ണയോടെ പാത്രം അടുപ്പിൽനിന്ന് ഇറക്കി വയ്‍ക്കുക.
4. പാകം ചെയ്‌യാൻ സമയമാകുമ്പോൾ ഈ പാൻ ഒന്നുകൂടി അടുപ്പിൽ വെച്ച് ചൂടാക്കുക. ശേഷം ഈ പാത്രത്തിൽ ബിരിയാണിയോ നെയ്ച്ചോറോ ഫ്രൈഡ് റൈസോ തയ്‌യാറാക്കാം.
Content highlights: rice sticking to pan every time you cook, masterchef shares an easy trick, Instagram video
