വൈവിധ്യങ്ങൾ നിറഞ്ഞ ഇന്ത്യയുടെ ഭക്ഷണസംസ്കാരത്തിൽ ഒഴിച്ചുകൂടാനാവാത്ത ഒന്നാണ് കറിവേപ്പില. രുചി വർധിപ്പിക്കാൻ മാത്രമല്ല ഔഷധ ഗുണത്തിലും കറിവേപ്പില മുന്നിൽ തന്നെയാണ്.
വിറ്റാമിൻ എ, വിറ്റാമിൻ സി, പൊട്ടാസ്യം, കാൽസ്യം, ഫൈബർ, കോപ്പർ, അയൺ തുടങ്ങി നിരവധി പോഷകഘടകങ്ങളുടെ കലവറയാണ് കറിവേപ്പില. ശരീരഭാരം കുറയ്ക്കാനും പ്രമേഹത്തെ നിയന്ത്രിക്കുവാനും കറിവേപ്പില ഉത്തമ ഔഷധമാണ്. കൂടാതെ, ദഹനവ്യവസ്ഥയുടെ പ്രവർത്തനം മെച്ചപ്പെടുത്തുന്നതിനും കൊളസ്ട്രോൾ കുറയ്ക്കുന്നതിനും കറിവേപ്പില സഹായിക്കുമെന്ന് കണ്ടെത്തിയിട്ടുണ്ട്.
ശരീരത്തിൽ ചീത്ത കൊളസ്ട്രോൾ അടിഞ്ഞുകൂടുന്നത് ഹൃദയാഘാത സാധ്യത വർധിപ്പിക്കുന്നു. ഭക്ഷണത്തിൽ കറിവേപ്പില ഉൾപ്പെടുത്തുന്നത് കൊളസ്ട്രോളിന്റെ അളവ് നിയന്ത്രിക്കാൻ സഹായിക്കുന്നു. ഇതിലൂടെ ഹൃദയാഘാത സാധ്യത കുറയ്ക്കാനും കഴിയും.
രക്തത്തിലെ പഞ്ചസാരയുടെയും കൊഴുപ്പിന്റെയും അളവിൽ കാര്യമായ വ്യത്യാസം വരുത്താൻ കറിവേപ്പിലയ്ക്കു കഴിഞ്ഞതായി കണ്ടെത്തിയെന്ന് അമേരിക്കൻ ജേണലായ ചൈനീസ് മെഡിസിൻ പ്രസിദ്ധീകരിച്ച പഠനത്തിൽ വ്യക്തമാക്കുന്നു.
പ്രമേഹബാധിതരായ എലികളിലാണ് പഠനം നടത്തിയത്. പത്ത് ദിവസം കറിവേപ്പിലയുടെ സത്ത് എലികൾക്കു നൽകിയാണ് പരീക്ഷണം നടത്തിയത്.
Content highlights: health benefits of curry leaves this indian herb may help manage cholesterol
