കോവിഡ് അടച്ചുപൂട്ടൽ കാലത്ത് പഴയ രുചികൾ പുതുമയോടെ വീടുകളിൽ തിരിച്ചു വരികയാണ്. മാമ്പഴം തൊടികളിൽ ധാരാളമായി ഇത്തവണ പഴുത്ത് വീഴുകയായിരുന്നു. അവ പെറുക്കിയെടുക്കാനും മാവിൽ നിന്ന് പറിക്കാനുമൊന്നും ആളുകളില്ലാത്തതിനാൽ കിളികൾക്കും,അണ്ണാനുമെല്ലാം ചാകരയായി. കോവിഡ് കാലത്ത് മാങ്ങ വാങ്ങാൻ ആരുമെത്തിയിരുന്നില്ല. ദിവസവും മാമ്പഴ പുളിശ്ശേരിയും,മാമ്പഴ പൂളുകളും മഹാമാരിക്കാലത്ത് തീൻമേശ കീഴടക്കി. എങ്കിലും പാഴാകുന്ന മാങ്ങകൾ കണ്ടപ്പോഴാണ് ഏല്യാമ്മടീച്ചർക്ക് ഒരു പഴയ സൂത്രം ഓർമ്മ വന്നത്. മാമ്പഴമെല്ലാം മാമ്പഴതിരയാക്കിയാലോ എന്ന്.
വടക്കാഞ്ചേരി ബ്ലോക്ക് പഞ്ചായത്തിന്റെ മുൻ പ്രസിഡന്റും, മണലിത്തറ സ്ക്കൂളിലെ പ്രധാന അധ്യാപികയുമായിരുന്ന എം.എസ്.ഏല്ല്യാമ്മ. ടീച്ചർ ഒരു മികച്ച കർഷക കൂടിയാണ്. പണ്ട് മാമ്പഴതിര പഴയ തറവാടുകളിലെല്ലാം തയ്യാറാക്കുന്ന രീതിയുണ്ടായിരുന്നു. ഉതിർന്ന് തൊടി നിറയെ കിടക്കുന്ന മാമ്പഴം പ്രയോജനപ്പെടുത്തുന്നതിനുളള ആശയം കർഷകൻ കൂടിയായ ഭർത്താവ്, മുൻ അധ്യാപകൻ തോമസ് മാത്യുവുമായി പങ്കുവെച്ചപ്പോൾ അത് മാമ്പഴതിര തയ്യാറാക്കാനുളള തീരുമാനത്തിലെത്തി.
മാമ്പഴം കഴുകിയെടുത്ത് തൊലി നീക്കി കാമ്പ് മിക്സിയിൽ അടിച്ചെടുത്ത് പരന്ന പാത്രത്തിലോ,തഴപ്പായയിലോ തേച്ചു പിടിപ്പിക്കും. മൂന്നു ദിവസം തേച്ചതിനു മീതെ വീണ്ടും മാമ്പഴ ചാറ് തേച്ച് വെയിലത്ത് ഉണക്കും. തുടർന്ന് പൊളിച്ചെടുത്ത് കഷണങ്ങളാക്കി ഭരണിയിൽ ഇട്ട് തേൻ ഒഴിക്കുന്നതാണ് രീതി. മാമ്പഴക്കാലത്തിനു ശേഷവും മാമ്പഴത്തിന്റെ രുചി ഏറെക്കാലം ഇതുവഴി വീടുകളിൽ നിലനിർത്തിയിരുന്നു.
മാമ്പഴതിരയുടെ പഴയ രുചി ടീച്ചർ വീണ്ടെടുത്തത് സമൂഹമാധ്യമങ്ങളിലൂടെ പങ്കുവയ്ക്കാനും ഇവർ മറന്നില്ല.അതോടെ മാമ്പഴതിരയ്ക്ക് ആവശ്യക്കാരുമെത്തി. എല്ലാവർക്കും രുചിയറിയാനുള്ള കൗതുകമായിരുന്നു. അതോടെ ഇരുവരും മാമ്പഴതിരയെ ഹോംമേഡ് ചോക്ലേറ്റിന്റെ രൂപത്തിലാക്കി ആവശ്യക്കാർക്ക് എത്തിച്ചു നൽകുകയും ചെയ്തു.
Content Highlights: Mampazhathira Kerala nadan taste for preserving Mango fruit
