തിരുവനന്തപുരം: പിറന്നാൾ ദിനത്തിൽ ഒന്നക്കോടിയുടെ മെഡിക്കൽ ഉപകരണങ്ങൾ വിതരണം ചെയ്ത നടൻ മോഹൻലാലിന് നന്ദി അറിയിച്ച് ആരോഗ്യ മന്ത്രി വീണ ജോർജ്. കഴിഞ്ഞ ദിവസമായിരുന്നു മോഹൻലാലിന്റെ പിറന്നാൾ. അദ്ദേഹത്തിന്റെ നേതൃത്വത്തിലുള്ള വിശ്വശാന്തി ഫൗണ്ടേഷനാണ് സംസ്ഥാനത്തെ ആശുപത്രികളിലേക്ക് ഉപകരണങ്ങൾ വിതരണം ചെയ്തത്.
കോവിഡ് പ്രതിരോധത്തിന് കേരളത്തിലെ ആശുപത്രികളിലേക്ക് മെഡിക്കൽ ഉപകരണങ്ങൾ നൽകിയ മലയാളത്തിന്റെ പ്രിയ നടൻ ശ്രീ. മോഹൻലാലിന് ഹൃദയം നിറഞ്ഞ നന്ദി. പിറന്നാൾ ദിനത്തിൽ ഒന്നരക്കോടി രൂപയുടെ മെഡിക്കൽ ഉപകരണങ്ങളാണ് ശ്രീ മോഹൻലാൽ തന്നത്.
ഓക്സിജൻ കിടക്കകൾ, വെന്റിലേറ്റർ, ഐ.സി.യു കിടക്കകൾ, എക്സ-റേ മെഷീനുകൾ എന്നിവയുൾപ്പെടെയാണ് സംഭവനയായി ലഭിച്ചിരിക്കുന്നത്. കളമശ്ശേരി മെഡിക്കൽ കോളേജിലെ വാർഡുകളിലേക്ക് ആവശ്യമായ ഓക്സിജൻ പൈപ്പ് ലൈൻ സ്ഥാപിക്കുന്നതിനുള്ള സഹായവും നൽകിയിട്ടുണ്ട്.
ഇന്ന് രാവിലെ ഫോണിൽ വിളിച്ച് ആരോഗ്യമന്ത്രിയുടെ ഉത്തരവാദിത്വം ഏറ്റെടുത്തതിൽ ശ്രീ മോഹൻലാൽ ആശംസകൾ അറിയിച്ചു . കോവിഡ് പ്രതിരോധത്തിന് ഉൾപ്പടെ എല്ലാ പിന്തുണയും അദ്ദേഹം വാഗ്ദാനം ചെയ്തിട്ടുണ്ട്. മഹാമാരിയെ നേരിടുന്ന ഘട്ടത്തിൽ അദ്ദേഹം നൽകിയ പിന്തുണയ്ക്ക് നന്ദി പറയുന്നു വീണ ജോർജ് ഫെയ്സ്ബുക്കിൽ കുറിച്ചു.
