തൃശ്ശൂർ: പത്തു വർഷമായി തുടരുന്ന ശീലം ടോണി ലോക്ഡൗണിലും മുടക്കിയില്ല. തെരുവോരങ്ങളിൽ കഴിയുന്ന 100 പേർക്ക് എല്ലാ ഞായറാഴ്ചയും പൊതിച്ചോറ് നൽകിവരുന്ന ഈ വെൽഡിങ് തൊഴിലാളി ലോക്ഡൗണിന്റെ ആദ്യ ഞായറിലും പതിവ് തെറ്റിച്ചില്ല. ഇപ്പോൾ തൃശ്ശൂർ നഗരത്തിലെ പാതയോരങ്ങളിൽ ആരുമില്ലാത്തതിനാൽ അവരെ പാർപ്പിച്ചിരുന്നയിടത്ത് എത്തിയാണ് ഭക്ഷണം നൽകിയത്. ലോക്ഡൗണായതിനാൽ പാതയോരങ്ങളിലുള്ളവരെ കോർപ്പറേഷനും ആക്‍ട്സ് പ്രവർത്തകരും േചർന്ന് കാൽഡിയൻ സ്കൂളിലാണ് പാർപ്പിച്ചിരിക്കുന്നത്. ടോണി അവിടെയെത്തി പൊതിച്ചോറ് ആക്‍ട്സ് ജില്ലാ സെക്രട്ടറി ലൈജു സെബാസ്റ്റ്യന് കൈമാറി.
വടൂക്കര വാഴപ്പിള്ളി വീട്ടിൽ ടോണി ആന്റണി (45) കൈപ്പറമ്പിലെ സ്ഥാപനത്തിൽ തൊഴിലാളിയാണ്. ഐടിഐ. പഠിച്ച ശേഷം മുംബൈയിലേക്ക് പോയ ടേണി 10 വർഷം മുമ്പാണ് മടങ്ങിയെത്തിയത്.
അയൽവക്കത്തെ ഒരു കുടുംബം മുടങ്ങാതെ എല്ലാ ഞായറാഴ്ചകളിലും വഴിയോരത്തുള്ളവർക്ക് ഉച്ചഭക്ഷണം നൽകുന്നത് ടോണി കണ്ടിരുന്നു. സാമ്പത്തിക പ്രതിസന്ധിയിലായ ആ കുടുംബം ഉച്ചഭക്ഷണ വിതരണം നിർത്തുകയാണെന്നറിഞ്ഞ ടോണി ആ ദൗത്യം ഏറ്റെടുക്കുകയായിരുന്നു. 10 വർഷത്തിനിടെ ഒരിക്കലും ഈ സേവനം നിർത്തിയിട്ടില്ല. ടോണിയുടെ നന്മയറിഞ്ഞ് പലരും പൊതിച്ചോറ് നൽകി സഹകരിക്കാറുണ്ട്. അങ്ങനെയാണ് 100 പൊതിച്ചോറിലേക്ക് സേവനം എത്തിയത്. മുൻപ് പാതയോരത്തെ അനാഥരുടെ മുടിവെട്ടുകയും കുളിപ്പിച്ച് വൃത്തിയാക്കുകയും ചെയ്തിരുന്നു. ഇപ്പോൾ കോവിഡ് കാലമായതിനാൽ ആ സേവനം ചെയ്‌യുന്നില്ല.
Content Highlights: tony serves food for 100 people every Sunday on the streets
