ചെറിയ കുട്ടികളുടെ രസകരമായ വീഡിയോകൾ നമ്മെ ചിരിപ്പിക്കാറും ചിന്തിപ്പിക്കാറുമുണ്ട്. കുട്ടികളുടെ നിഷ്കളങ്കതയാണ് അത്തരം വീഡിയോകളിലേക്ക് നമ്മെ ആകർഷിക്കുന്ന പ്രധാന ഘടകം.
ഇത്തരത്തിൽ അതി വൈദഗ്ധ്യത്തോടെ പാത്രത്തിൽ മുട്ട അടിച്ചെടുക്കുന്ന കുരുത്തിന്റെ വീഡിയോ ആണ് സോഷ്യൽ മീഡിയയുടെ മനം കവർന്നിരിക്കുന്നത്. കുട്ടിയുടെ അച്ഛൻ ജെസ്സെ സാൻചെസ് ആണ് വീഡിയോ ഇൻസ്റ്റഗ്രാമിൽ പങ്കുവെച്ചിരിക്കുന്നത്.
കുട്ടി ഏതാനും മാസം മാത്രം പ്രായമുള്ളപ്പോൾ മുട്ട അടിച്ചെടുക്കുന്നതിന് ഉപയോഗിക്കുന്ന വിസ്ക് അവന്റെ കൈയിൽ പിടിപ്പിച്ച് ജെസ്സെ സഹായിക്കുന്നതാണ് വീഡിയോയുടെ തുടക്കത്തിൽ. എന്നാൽ, രണ്ടാമത്തെ ഭാഗത്താകട്ടെ, ഈ കുട്ടി കുറച്ചുകൂടി വലുതായി വിസ്ക് സ്വയം കൈയ്‌യിൽ പിടിച്ച് വൈദഗ്ധ്യത്തോടെ മുട്ട അടിച്ചെടുക്കുന്നതാണ് കാണുന്നത്. വളരെ ആത്മവിശ്വാസത്തോടെ, ചെറുപുഞ്ചിരിയോട് കൂടിയാണ് അവൻ അത് ചെയ്‌യുന്നത്.
മൂന്നരലക്ഷത്തിനടുത്ത് ആളുകളാണ് വീഡിയോ ഇതുവരെ കണ്ടിരിക്കുന്നത്. 84000-ൽ പരം ആളുകൾ വീഡിയോ ലൈക്ക് ചെയ്തിട്ടുണ്ട്. കുട്ടിയുടെ വീഡിയോ മനോഹരമാണെന്ന് ഒട്ടേറെപ്പേർ കമന്റ് ചെയ്തു. എന്നെ നിങ്ങളുടെ നേതാവാക്കൂ എന്ന് കുട്ടിയുടെ മുഖത്ത് നോക്കുമ്പോൾ വായിക്കാൻ കഴിയുന്നുവെന്ന് മറ്റൊരാൾ കമന്റ് ചെയ്തു.
Content highlights: adorable video of a toddler, whisking like a pro, wins hearts, viral video
