ഈ മാസം നാലുമുതൽ 20 വരെയാണ് ശീതകാല ഒളിംപിക്സ്. ചൈനയുടെ തലസ്ഥാനമായ ബെയ്ജിങ് ആണ് ഒളിംപിക്സിന് ആതിഥ്യമരുളുന്നത്. നൂതനമായ പുതിയ സാങ്കേതികവിദ്യങ്ങൾ കാര്യക്ഷമമായി ഉപയോഗപ്പെടുത്തുന്ന രാജ്യങ്ങളിലൊന്നാണ് ചൈന. ഒളിംപിക്സിൽ പങ്കെടുക്കാൻ എത്തിയവർക്ക് ഭക്ഷണം മുറിയിൽ എത്തിച്ചുനൽകുന്ന റോബോട്ടിന്റെ വീഡിയോ ആണ് ഇപ്പോൾ സോഷ്യൽ മീഡിയയിൽ കൗതുകമുണർത്തുന്നത്.
ലോകത്തിന്റെ പലഭാഗങ്ങളിൽ നിന്നും ആളുകൾ ഒളിംപിക്സിൽ പങ്കെടുക്കാൻ എത്തുന്നതിനാൽ കോവിഡ് വ്യാപനത്തിനുള്ള വലിയ സാധ്യതയും നിലനിൽക്കുന്നുണ്ട്. രോഗവ്യാപനസാധ്യത കുറയ്ക്കുന്നതിനും കൂടി റോബോട്ടിനെ ഉപയോഗിച്ചുള്ള ഭക്ഷണവിതരണം സഹായിക്കുമെന്ന് സംഘാടകർ കരുതുന്നു.
ബെയ്ജിങ്ങിലെ ഒരു ഹോട്ടലിൽ തങ്ങുന്നവർക്ക് ഭക്ഷണം എത്തിച്ചു നൽകുന്ന റോബോട്ടിന്റെ വീഡിയോ അന്താരാഷ്ട്ര വാർത്താ ഏജൻസിയായ റോയിട്ടേഴ്സാണ് ട്വീറ്റ് ചെയ്തിരിക്കുന്നത്. അതിഥിയുടെ മുറിയുടെ വാതിലിന് സമീപം റോബോട്ട് എത്തിക്കഴിയുമ്പോൾ ഒരു പിൻകോഡ് അടിച്ചുനൽകണം. അതിനുശേഷം ഭക്ഷണം എന്താണെന്ന് റോബോട്ട് പറയും. അതിഥി ഭക്ഷണം എടുത്തുകഴിയുമ്പോൾ ഭക്ഷണം വെച്ച ക്യാബിൻ അടച്ച് റോബോട്ട് മുമ്പോട്ട് നീങ്ങുമെന്ന് റോയിട്ടേഴ്സ് വീഡിയോയ്ക്ക് ഒപ്പം പങ്കു വെച്ച കുറിപ്പിൽ പറയുന്നു.
A Beijing hotel is using room service robots as the Winter Olympics approaches. Robots arrive at the guests door, the guest types a pin code into the robot and the robot opens to reveal the food. Once the guest has taken the food out the robot closes and moves off
&mdash Reuters (@Reuters)
ബെയ്ജിങ്ങിൽ നടക്കുന്ന ശീതകാല ഒളിംപിക്സിൽ ഭക്ഷണം വിതരണം ചെയ്യുന്നതിൽ റോബോട്ടുകൾക്കാണ് മുഖ്യ പങ്കെന്ന് റോയിട്ടേഴ്സ് യൂട്യൂബിൽ പങ്കുവെച്ച മറ്റൊരു വീഡിയോയിൽ പറയുന്നു. സ്വിച്ച് ഇടുമ്പോൾ ഐസ്ക്രീം അടക്കം തയ്യാറാക്കി നൽകുന്ന റോബോട്ടിക് സംവിധാനവും ഇവിടെ ഉണ്ടെന്ന് റോയിട്ടേഴ്സിന്റെ വീഡിയോയിൽ പറയുന്നു.
Content highlights: robots deliver food, winter olympics 2022, participants in beijing hotel
