വർഷങ്ങൾ നീളുന്നതാണ് ഓരോ ബഹിരാകാശ ഗവേഷണങ്ങളും. ഭൂമിക്ക് പുറത്തെ ജീവന്റെ സാന്നിധ്യം തേടിയും ചൊവ്വയിലും മറ്റു ഗ്രഹങ്ങളിലുമായി വർഷങ്ങളായി ഗവേഷണത്തിലാണ് ലോകരാജ്യങ്ങളുടെ നേതൃത്വത്തിൽ ബഹിരാകാശ ഗവേഷകർ. എന്നാൽ, ശാസ്ത്രലോകം ഏറെ പ്രതീക്ഷയോടെ നടത്തുന്ന ഗവേഷണങ്ങൾക്ക് കടുത്ത വെല്ലുവിളിയാണ് ബഹിരാകാശത്ത് ഗവേഷണത്തിൽ ഏർപ്പെട്ടിരിക്കുന്ന ശാസ്ത്രജ്ഞരുടെ ഭക്ഷണം.
വൻ ബഹിരാകാശ ഗവേഷണങ്ങളിൽ ഏർപ്പെട്ടിരിക്കുന്ന ബഹിരാകാശ ശാസ്ത്രജ്ഞർക്ക് കഴിക്കാൻ ഭക്ഷണമുണ്ടാക്കുന്നതിന് സാങ്കേതികവിദ്യ വികസിപ്പിച്ചെടുക്കാൻ അവസരം നൽകുകയാണ് അമേരിക്കൻ ബഹിരാകാസ ഏജൻസിയായ നാസ.
നാല് ബഹിരാകാശ ശാസ്ത്രജ്ഞർക്ക് തുടർച്ചയായി മൂന്ന് വർഷം ബഹിരാകാശത്ത് കഴിയുമ്പോൾ ആവശ്യമായ ഭക്ഷണം പ്രദാനം ചെയ്‌യാൻ കഴിയുന്ന ഭക്ഷ്യ ഉത്‌പാദന സാങ്കേതികസംവിധാനമാണ് നാസ ലക്ഷ്യമിടുന്നത്.
ഭക്ഷണം തയ്‌യാറാക്കുന്നതിന് പുറമെ അത് ബഹിരാകാശത്ത് എത്തിച്ചു നൽകുന്നതും ഉപഭോഗവും പാഴാകുന്ന ഭക്ഷ്യവസ്തുക്കളുടെ സംസ്കരണവും ഉൾപ്പെടുന്നതായിരിക്കണം ഈ സാങ്കേതികവിദ്യ. വിജയകരമായി ഈ സാങ്കേതികവിദ്യ പൂർത്തിയാക്കുന്നവർക്ക് നാസയുടെ വക ഒരു മില്യൺ ഡോളർ(ഏകദേശം 7.46 കോടി രൂപ) സമ്മാനമായി ലഭിക്കും.
ഈ പരീക്ഷണത്തിന്റെ ആദ്യ ഘട്ടത്തിലേക്ക് കഴിഞ്ഞ വർഷം നാസ മത്സരം നടത്തിയിരുന്നു. 18 ടീമുകളാണ് ഇതിൽ മത്സരിച്ച് സമ്മാനം നേടിയത്. നൂതനമായ ഭക്ഷ്യ ഉത്‌പാദന സാങ്കേതികവിദ്യ അവതരിപ്പിച്ചതിന് 3.36 കോടി രൂപ സമ്മാനമായി നാസ നൽകുകയും ചെയ്തു.
ഇതിന്റെ രണ്ടാം ഘട്ടത്തിലേക്കുള്ള മത്സരത്തിനാണ് നാസ ഇപ്പോൾ അപേക്ഷ ക്ഷണിച്ചിരിക്കുന്നത്. ഒന്നാം ഘട്ടത്തിൽ പങ്കെടുത്ത് വിജയിച്ചവരെക്കൂടാതെ പുതിയ ടീമുകൾക്കും മത്സരത്തിൽ പങ്കെടുക്കാം.
കനേഡിയൽ ബഹിരാകാശ ഏജൻസിയുമായി ചേർന്നാണ് ഡീപ് സ്പേസ് ഫുഡ് ചലഞ്ച് എന്ന പേരിൽ നാസ മത്സരം സംഘടിപ്പിക്കുന്നത്. കുറഞ്ഞ സ്രോതസ്സുകൾ ഉപയോഗിച്ച് സുസ്ഥിരവും ക്രിയാത്മകവുമായ ഭക്ഷ്യ ഉത്‌പന്ന സാങ്കേതികവിദ്യകൾ വികസിപ്പിക്കുകയാണ് മത്സരത്തിന്റെ ലക്ഷ്യം.
ഒരു നിശ്ചിത സമയം കഴിയുമ്പോൾ ഭക്ഷണത്തിലെ പോഷകങ്ങൾ നഷ്ടപ്പെട്ടു തുടങ്ങുന്നതാണ് പ്രധാന വെല്ലുവിളി. ചൊവ്വാ പര്യവേഷണം വർഷങ്ങളോളം സമയമെടുത്താണ് പൂർത്തിയാക്കുന്നത്. ഇത്രകാലം ഗവേഷകർ ആരോഗ്യത്തോടെ ഇരിക്കേണ്ടതും വളരെ പ്രധാന്യമേറിയ കാര്യമാണ്. ഭക്ഷണം മുൻകൂറായി പായ്‍ക്ക് ചെയ്തെടുത്ത് വയ്‍ക്കുന്നത് അതിനാൽ ശാശ്വതമായ പരിഹാരമല്ല.
ബഹിരാകാശ ഗവേഷണങ്ങൾക്കു മാത്രമല്ല, വെള്ളപ്പൊക്കം, വരൾച്ച എന്നീ പ്രകൃതിദുരന്ത സമയത്തും ഭക്ഷ്യ വസ്തുക്കൾ കേടുകൂടാതെ സൂക്ഷിക്കുന്നതിനുമുള്ള സാങ്കേതികവിദ്യയും നാസ ഇതിലൂടെ തേടുന്നുണ്ട്.
ബഹിരാകാശ യാത്രയുടെ പരിമിതികൾക്കുള്ളിൽ ദീർഘകാലത്തേക്ക് ബഹിരാകാശ സഞ്ചാരികൾക്ക് ഭക്ഷണം നൽകുന്നതിന് നൂതനമായ പരിഹാര മാർഗങ്ങൾ ആവശ്യമാണ്. ഭക്ഷ്യ സാങ്കേതികവിദ്യയുടെ അതിരുകൾ നീക്കുന്നത് ഭാവിയിലെ ഗവേഷകരെ ആരോഗ്യമുള്ളവരായി നിലനിർത്തുകയും ഒപ്പം ഇവിടെയുള്ളവർക്ക് സഹായമായി മാറുകയും ചെയ്‌യും-നാസയുടെ സ്പേസ് ടെക്നോളജി മിഷൻ ഡയറക്‍ടറേറ്റ് വിഭാഗം അസോസിയേറ്റ് അഡ്മിനിസ്ട്രേറ്റർ ജിം റ്യൂട്ടർ പറഞ്ഞു.
Content highlights: nasa will give you 7.46 crore for winning ideas on astronaut food In deep space
