ഹൃദ്യമായ ഒട്ടേറെ വീഡിയോകൾ സാമൂഹികമാധ്യമങ്ങളിൽ ദിവസവും പ്രത്യക്ഷപ്പെടാറുണ്ട്. ചില വീഡിയോകൾ കണ്ണുകളെ ഈറനണിയിപ്പിക്കുമ്പോൾ ചിലവ ചുണ്ടിൽ പുഞ്ചിരിയായിരിക്കും സമ്മാനിക്കുക. ചില വീഡിയോകൾ കാണുമ്പോൾ സന്തോഷത്തിനൊപ്പം കണ്ണുകളെ നനയിപ്പിക്കുകയും ചെയ്യും. അത്തരമൊരു വീഡിയോ ആണ് ഇപ്പോൾ ഇൻസ്റ്റഗ്രാമിൽ വൈറലായിരിക്കുന്നത്. ചാതോർ ബ്രൂതേഴ്സ് എന്ന ഫുഡ് വ്ളോഗറാണ് വീഡിയോ ഇൻസ്റ്റഗ്രാമിൽ പങ്കുവെച്ചത്.
ഒരു കൊച്ചുകുട്ടിക്ക് മോമോസ് വാങ്ങി നൽകുന്ന യുവിന്റെ വീഡിയോ ആണത്. യുവാവിന്റെ കൈപിടിച്ച് പലഹാരങ്ങൾ വിൽക്കുന്ന കടയിലേക്ക് നീങ്ങുന്ന ബാലനെയാണ് വീഡിയോയിൽ ആദ്യം കാണുക. അവന്റെ ആവശ്യപ്രകാരം കടയിൽനിന്ന് ഒരു കവറിൽ മോമോസ് വാങ്ങി നൽകുന്നതാണ് അടുത്ത സീനിൽ കാണാൻ കഴിയുന്നത്. മോമോസ് കഴിച്ചിട്ട് നിഷ്കളങ്കമായ പുഞ്ചിരിയോടെ നോക്കി നിൽക്കുന്ന ബാലനെയാണ് അവസാനം കാണാൻ കഴിയുന്നത്.
കുരുന്നുബാലന്റെ വീഡിയോ നിമിഷ നേരം കൊണ്ടാണ് സോഷ്യൽ മീഡിയ ഏറ്റെടുത്തത്. 17 ലക്ഷം പേരാണ് ഇതുവരെ ഈ വീഡിയോ കണ്ടിരിക്കുന്നത്. 1.71 ലക്ഷം ലൈക്കുകളും വീഡിയോയ്ക്ക് ലഭിച്ചു.
നിരവധി പേർ ഫുഡ് വ്ളോഗറെ അഭിനന്ദിച്ച് വീഡിയോയ്ക്ക് കമന്റ് നൽകി. വളരെ വലിയ സത്പ്രവർത്തിയാണ് ചെയ്തതെന്ന് ഒട്ടേറെപ്പേർ അഭിപ്രായപ്പെട്ടു. കുട്ടിയുടെ പുഞ്ചിരി ഹൃദ്യമാണെന്ന് മറ്റൊരാൾ കമന്റ് ചെയ്തു.
Content highlights: man buys momos for a kid, lovely video, viral video
