ചൗ മിഠായി… പേരു കേൾക്കുമ്പോഴേ കുട്ടിക്കാലത്തേറെ രുചിച്ച ആ മധുരം നാവിലേയ്ക്ക് ഓടി വരുന്നില്ലേ.. ആധുനിക യന്ത്രസംവിധാനങ്ങളുടെ സഹായമില്ലാതെ പരമ്പരാഗതരീതിയിൽ ചൗ മിഠായികളൊരുക്കുകയാണ് പൊയ്യയിലെ കാനാടി വീട്ടിൽ. തലമുറകൾക്കിപ്പുറവും ഈ മിഠായിയോടുള്ള പ്രിയമേറുകയാണ്. ശർക്കര മിഠായി, ചൗ മിഠായി, പല്ലൊട്ടി, അമ്മായി മിഠായി എന്നിങ്ങനെ വ്യത്യസ്തമായ പേരുകളുണ്ട് ചൗ മിഠായിക്ക്.
കാനാടി വീട്ടിൽ 1951-ലാണ് മിഠായിനിർമാണം തുടങ്ങിയത്. ആദ്യം കുഞ്ഞാണ്ടിയുടെ നേതൃത്വത്തിലാണ് മിഠായി നിർമാണം തുടങ്ങിയത്. തുടർന്ന് മകൻ കൃഷ്ണൻകുട്ടിവഴി ഇപ്പോഴത്തെ തലമുറയായ ശിവശങ്കരൻ, വിശ്വംഭരൻ എന്നിവരിലെത്തി നിൽക്കുന്നു ഈ മിഠായിമധുരം. തലമുറകൾ കൈമാറിയിട്ടും തനിമയും കൈപ്പുണ്യവും ഇഴചേർന്ന സ്വാദ് ഒട്ടും നഷ്ടമായിട്ടില്ല. അന്നുമുതൽ ഇന്നുവരെ പരമ്പരാഗതമായ രീതിയിൽ കൈകൊണ്ട് തന്നെയാണ് നിർമാണം.
ശിവശങ്കരനും വിശ്വംഭരനും 35 വർഷമായി ഈ രംഗത്തുണ്ട്. ഇളയച്ഛന്റെ മകൻ കാനാടി അശോക് കുമാറും മിഠായി നിർമാണത്തിന് ഒപ്പമുണ്ട്. കപ്പലണ്ടി മിഠായി, എള്ളുണ്ട, ഇഞ്ചി മിഠായി എന്നിവയും കാനാടി കുടുംബത്തിലെ മറ്റു സഹോദരന്മാർ നിർമിക്കുന്നുണ്ട്.
തൃശ്ശൂർ, എറണാകുളം, മലപ്പുറം ജില്ലകളിൽ മാത്രമാണ് വിതരണം ചെയ്യാൻ കഴിയുന്നത്. ഇപ്പോൾ ഇഞ്ചി, ഈന്തപ്പഴം രുചികളിലുള്ള ചൗ മിഠായികളാണ് നിർമിക്കുന്നത്. ചൗ മിഠായിയിൽ ചേർക്കുന്നത്: ഗുണമേന്മയുള്ള ചിറ്റൂർ ശർക്കര, നാളികേരം, ചുക്ക്, ജീരകം, ഏലക്കായ, നെയ്യ്, ലിക്വിഡ് ഗ്ലൂക്കോസ്, ഈന്തപ്പഴം അല്ലെങ്കിൽ ഇഞ്ചി. കൃത്രിമമായ യാതൊന്നും ഈ മിഠായി നിർമാണത്തിന് ഉപയോഗിക്കുന്നില്ല എന്ന പ്രത്യേകതയുണ്ട്.
നിർമാണരീതി: ദ്രവരൂപത്തിലാക്കിയ ശർക്കര വറ്റിച്ച് ചേരുവകൾ ചേർത്ത് കട്ടിയാകുമ്പോൾ നെയ്യ് പുരട്ടിയ പാത്രത്തിലേക്ക് പകർത്തും. തുടർന്ന് ചെറുചൂടോടെ നിശ്ചിത അളവിൽ മുറിച്ചെടുത്ത് കടലാസിൽ പൊതിയും. ഒരു ദിവസം 75 എണ്ണം വീതമുള്ള 600 ടിൻ വരെ ചൗ മിഠായി കാനാടി കുടുംബത്തിൽനിന്ന് വിപണിയിലെത്തുന്നുണ്ട്.
Content highlights: chow sweets avialble at thirssure kanadi house
