ഇന്ത്യൻ ശൈലിയിലുള്ള ഭക്ഷണത്തിൽ ഒഴിവാക്കാനാവാത്ത വിഭവങ്ങളിലൊന്നാണ് ചട്നി. ദോശ മുതലുള്ള പ്രഭാതഭക്ഷണങ്ങളിലും ഊണിലും വരെ നമ്മൾ വിവിധ തരത്തിലുള്ള ചട്നി ഉണ്ടാക്കാറുണ്ട്. ഇന്ത്യൻ വംശജയും അമേരിക്കൻ മോഡലും ടെലിവിഷൻ അവതാരകയുമായ പദ്മ ലക്ഷ്മി തയ്യാറാക്കിയ ക്രാൻബെറി ചട്നി പരിചയപ്പെടാം.
തന്റെ ഇൻസ്റ്റഗ്രാം പേജിലൂടെയാണ് പദ്മ ചട്നി ഉണ്ടാക്കുന്ന വീഡിയോ പങ്കുവെച്ചത്.
താങ്ക്സ്ഗിവിങ് ഭക്ഷണമായാണ് പദ്മ ചട്നി തയ്യാറാക്കിയിരിക്കുന്നത്. താങ്ക്സ്ഗിവിങ് മേശയിൽ എരിവും പുളിയുമൊക്കെ അടങ്ങിയ എന്തെങ്കിലും വിഭവം വേണമെന്ന് പദ്മ പറഞ്ഞു. തന്റെ ആന്റിയായ ബാലയിൽനിന്നാണ് ഈ ചട്നി ഉണ്ടാക്കാൻ പഠിച്ചതെന്ന് അവർ പറഞ്ഞു. ഈ ചട്നിക്ക് തനത് ഇന്ത്യൻ രുചിയാണ് ഉള്ളതെന്നും പദ്മ ഉറപ്പുനൽകുന്നു.
24 ഔൺസ്(600 ഗ്രാം) ക്രാൻബെറിയാണ് പദ്മ ചട്നി തയ്യാറാക്കാൻ എടുത്തത്. കടുകെണ്ണ, കശ്മീരി മുളക് പൊടി, കാൽ ടീസ്പൂൺ ഉലുവ, അര ടീസ്പൂൺ മഞ്ഞൾപ്പൊടി, അര ടീസ്പൂൺ കായം എന്നിവയാണ് ചട്നിയിൽ ചേർത്തിരിക്കുന്നത്. സ്വാദനുസരിച്ച് ഉപ്പും പഞ്ചസാരയും ഒപ്പം വെള്ളവും ചേർക്കാം.
നല്ല വലുപ്പമുള്ള ഒരു പാത്രമെടുത്ത് അടുപ്പിൽ വെച്ച് നന്നായി ചൂടാക്കുക. പാത്രം നന്നായി ചൂടായി കഴിയുമ്പോൾ ഇതിലേക്ക് കടുകെണ്ണ ഒഴിക്കുക. ശേഷം ക്രാൻബെറി ഇതിലേക്ക് ചേർക്കുക. നന്നായി വഴറ്റുക. ചെറുതീയിൽ ക്രാൻബെറി വേവിച്ചെടുക്കുക. പാത്രം മൂടിവെച്ച് ഇത് നന്നായി വേവുന്നതുവരെ കാത്തിരിക്കാം.
ഇടയ്ക്ക് പാത്രത്തിന്റെ അടിയിൽ പിടിച്ചുപോകാതെ ഇളക്കിക്കൊടുക്കാം. ഇതിലേക്ക് ഉപ്പ് ആവശ്യത്തിന് ചേർത്തുകൊടുക്കാം. നന്നായി ഇളക്കിച്ചേർത്തശേഷം പഞ്ചസാര ആവശ്യമെങ്കിൽ ചേർത്ത് കൊടുക്കാം. ഇതും നന്നായി ഇളക്കിച്ചേർക്കുക. ശേഷം കശ്മീരി മുളക് പൊടി ചേർത്തുകൊടുക്കാം. ചട്നി പാത്രത്തിന്റെ അടിയിൽ പിടിക്കുന്നുണ്ടെന്ന് തോന്നുകയാണെങ്കിൽ ഒരു കപ്പ് വെള്ളം ഒഴിച്ചുകൊടുക്കാം. അതിനുശേഷം 20 മിനിറ്റ് നേരം ഇത് ചെറുതീയിൽ വേവിച്ചെടുക്കാം.
ഉലുവ നന്നായി വറുത്തശേഷം പൊടിച്ച് ചട്നിയിൽ ചേർക്കാം. ഒപ്പം സ്വൽപം കായവും മഞ്ഞൾപൊടിയും ചേർക്കാം.
Content highlights: Padma lakshmi shares indian style caranberry chutney, Food recipe, Thanksgiving meal
