പൂക്കോട്ടുംപാടം: അതിഥിത്തൊഴിലാളികൾക്ക് ഏറെ പ്രിയപ്പെട്ട ഒരു ഹോട്ടലുണ്ട് പൂക്കോട്ടുംപാടം അങ്ങാടിയിൽ. ഇതരസംസ്ഥാന വിഭവങ്ങൾമാത്രം വിളമ്പുന്ന ഈ ഹോട്ടലിൽ സദാസമയവും നല്ല തിരക്കാണ്. അതിഥിത്തൊഴിലാളികൾ തന്നെയാണ് കൂടുതലും. ഇത്തരം തൊഴിലാളികൾക്ക് ഏറെ പ്രിയമുള്ള ഖാദ, ഹാജ, ഗോദ, കൊച്ചുറി, മുറുമ, ബുറിന്റെ, നിംകി, മിഠാക്കുംചരി, മിസ്ടി, ഖുലാബ്ജാം തുടങ്ങിയ വിഭവങ്ങളും പൊറോട്ട, പൂരി, റൊട്ടി തുടങ്ങിയവയും ഹിന്ദി സ്പെഷ്യൽ മീൽസുമെല്ലാം ഇവിടെ റെഡി.
പൂക്കോട്ടുംപാടം ചന്ത റോഡിൽ പ്രവർത്തിക്കുന്ന ആസാം മുഹമ്മദ് ഹോട്ടലിലാണ് ഈ കൊതിയൂറും വിഭങ്ങൾ. പൂക്കോട്ടുംപാടം സ്വദേശി പൊട്ടിയിൽ ചെറിയാപ്പുവാണ് ഉടമ. തൊഴിലാളികളെല്ലാം ഇതരസംസ്ഥാനക്കാരാണ്.
മൊയ്ബൂൽ ഹുസൈൻ, അസ്ലം, ഇമ്രാൻ എന്നിവരാണ് വിഭവങ്ങൾ തയ്യാറാക്കി വിൽക്കുന്നത്. പുലർച്ചെമുതൽ ഹോട്ടലിൽ നല്ല തിരക്കാണ്. പുലർച്ചെ അഞ്ചിന് തുറക്കും. രാത്രി പത്തുമണിവരെ പ്രവർത്തിക്കും. അതിഥിത്തൊഴിലാളികളുടെ നാട്ടിൽ ലഭിക്കുന്ന ഭക്ഷണവിഭവങ്ങളെല്ലാം ആസാം മുഹമ്മദ് ഹോട്ടലിൽ ലഭിക്കാൻ തുടങ്ങിയതോടെ പൂക്കോട്ടുംപാടം ടൗണിലെ തൊഴിലാളികൾക്കുപുറമേ ചോക്കാട്, കാളികാവ്, കരുളായി, നിലമ്പൂർ, വണ്ടൂർ ഭാഗങ്ങളിൽ താമസിച്ച് തൊഴിലെടുക്കുന്നവരും പൂക്കോട്ടുംപാടത്തെത്തുന്നുണ്ട്.
എണ്ണക്കടികൾക്കും ഹിന്ദി സ്പെഷ്യൽ ചായയ്ക്കും എട്ടുരൂപയാണ്. ഹിന്ദി സ്പെഷ്യൽ ഊണ് 25 രൂപയ്ക്ക് ലഭിക്കും. തങ്ങളുടേതായ രുചിയിൽ ഭക്ഷണം കിട്ടാൻ തുടങ്ങിയതോടെ മുറികളിൽ ഭക്ഷണം പാകംചെയ്തിരുന്ന പലരും ഹോട്ടലിനെ ആശ്രയിക്കുന്നുണ്ട്. രാവിലെയും വൈകീട്ടുമാണ് ഹോട്ടലിൽ വലിയ തിരക്ക്.
ലോക്ഡൗൺ സമയങ്ങളിൽ അതിഥിത്തൊഴിലാളികൾ ഭക്ഷണത്തിനായി അലയുന്ന കാഴ്ച കണ്ടതോടെയാണ് ഇവർക്കായി ഒരു ഹോട്ടലെന്ന ആശയമുദിക്കുന്നത്.
ഹോട്ടലിന് മികച്ച പിന്തുണയാണു ലഭിക്കുന്നതെന്നും ഉടമ പൊട്ടിയിൽ ചെറിയാപ്പു പ്രതികരിച്ചു.
Content Highlights: A hotel in kerala exclusive for Migrant labourers guest labourers recipes
