ലോകരാജ്യങ്ങളെ ആശങ്കയുടെ മുൾമുനയിൽ നിർത്തിയിരിക്കുകയാണ് കാലാവസ്ഥാ വ്യതിയാനം. ലോകനേതാക്കളുടെയും പരിസ്ഥിതിപ്രവർത്തകരുടെയും നേതൃത്വത്തിൽ കാർബൺ ബഹിർഗമനം കുറയ്‍ക്കുന്നതിനുള്ള നടപടികൾ ദ്രുതഗതിയിലാണ്. നമ്മൾ കരുതുന്നതിനേക്കാൾ വലിയ പ്രത്യാഘാതങ്ങളാണ് കാലാവസ്ഥാ മാറ്റം കൊണ്ട് ഉണ്ടാകുകയെന്ന് വിവിധ റിപ്പോർട്ടുകൾ ചൂണ്ടിക്കാട്ടുന്നു.
കാലാവസ്ഥാ വ്യതിയാനത്തിന്റെ പ്രതിഫലനമായി നമ്മുടെ ഇഷ്ടവിഭവങ്ങൾ ക്രമേണ അപ്രത്യക്ഷമായേക്കാമെന്ന റിപ്പോർട്ട് പുറത്തുവിട്ടിരിക്കുകയാണ് അന്താരാഷ്ട്ര വാർത്താ ഏജൻസിയായ എ.എഫ്.പി. ആഗോളതാപനം മൂലമുള്ള കാലാവസ്ഥാ മാറ്റം ഭക്ഷ്യോത്‌പാദനം കുറയ്‍ക്കുകയോ വിളകൾ കൃഷിചെയ്‌യുന്ന രീതിയെ മാറ്റി മറിയ്‍ക്കുകയോ ചെയ്‌യുമെന്ന് ഗവേഷകർ പറയുന്നു.
വീടുകളിൽ വളർത്താൻ പാകത്തിൽ വിളകളെ പാകപ്പെടുത്തിയെടുത്തപ്പോൾ നമുക്ക് ജനിതകവൈവിധ്യം നഷ്ടമായി. കാലാവസ്ഥാ വ്യതിയാനം പോലുള്ള മാറ്റങ്ങളുമായി പൊരുത്തപ്പെട്ടു പോകാനുള്ള കഴിവ് ചെടികളിൽ നിയന്ത്രിക്കപ്പെട്ടു-ജർമൻ ആസ്ഥാനമായി പ്രവർത്തിക്കുന്ന എൻ.ജി.ഒ. ക്രോപ് ട്രസ്റ്റിന്റെ പദ്ധതിയായ ക്രോപ് വൈൽഡ് റിലേറ്റീവ്സ് പ്രോജക്‍ടിന്റെ നേതാവായ ബെഞ്ചെമിൻ കിലിയാൻ പറഞ്ഞു.
നെല്ല്, ഉരുളക്കിഴങ്ങ്, കാപ്പി എന്നിവയെ ആയിരിക്കും കാലാവസ്ഥാ വ്യതിയാനം ഏറ്റവും മോശമായി ബാധിക്കുകയെന്ന് പഠനങ്ങൾ പറയുന്നു. 2060 ആകുമ്പോഴേക്കും ഉരുളക്കിഴങ്ങ്, മധുരക്കിഴങ്ങ് എന്നിവയുടെ ഉത്‌പാദനത്തിൽ 32 ശതമാനത്തിന്റെ ഇടിവ് ഉണ്ടാകുമെന്ന് ഇന്റർനാഷണൽ പൊട്ടറ്റോ സെന്റർ പ്രവചിച്ചിട്ടുണ്ട്. 2050 ആകുമ്പോഴേക്കും കാപ്പി കൃഷി ചെയ്‌യുന്ന പകുതിയോളം ഭൂമി നഷ്ടമാകുമെന്നും കരുതപ്പെടുന്നു. ലോകത്തിലെ ഏറ്റവും പ്രധാനപ്പെട്ട ഭക്ഷ്യവിളയായ നെല്ല് ആഗോള താപനം പ്രതികൂലമായി ബാധാക്കുന്ന ഒന്നാണ്. എന്നാൽ, സമുദ്രജലനിരപ്പ് ഉയരുന്നത് പാടങ്ങളിലെ വെള്ളത്തിൽ ഉപ്പിന്റെ അംശം വർധിക്കുന്നതിനും ക്രമേണ നെല്ലുത്‌പാദത്തെ ബാധിക്കുമെന്നും എ.എഫ്.പി.യുടെ റിപ്പോർട്ടിൽ വ്യക്തമാക്കുന്നു.
ഗോതമ്പ്, നെല്ല്, മധുരക്കിഴങ്ങ്, വാഴ, ആപ്പിൾ തുടങ്ങി 28 മുൻഗണനാ വിളകളുടെ സ്വാഭാവികമായ ഉത്‌പാദനത്തിന് ഗവേഷകർ ശ്രമിച്ചുകൊണ്ടിരിക്കുകയാണ്. ഈ പരമ്പരാഗത വിളകൾക്ക് വളരെ മോശമായ കാലാവസ്ഥയെ പ്രതിരോധിക്കാനും അതുമായി പൊരുത്തപ്പെട്ടുപോകാനും കഴിവുണ്ടാകുമെന്നും അവർ വിശ്വസിക്കുന്നു. എന്നിരുന്നാലും, ഇവയിൽ നിന്ന് വിളവെടുക്കുന്നതുകൊണ്ട് മാത്രം ആസന്നമായ ഭക്ഷ്യപ്രതിസന്ധിക്കുള്ള ഉത്തരമാകുന്നില്ലെന്നും റിപ്പോർട്ട് ചൂണ്ടിക്കാട്ടുന്നു.
ലോകത്തിലെ ഭക്ഷ്യ ഉപഭോഗത്തിന്റെ 60 ശതമാനവും വഹിക്കുന്നത് നെല്ല്, ചോളം, ഗോതമ്പ് എന്നിവയെ ആശ്രയിച്ചാണുള്ളതെന്ന് ഐക്യരാഷ്ട്രസഭയുടെ ഫുഡ് ആൻഡ് അഗ്രിക്കൾച്ചറൽ ഓർഗനൈസേഷൻ(എഫ്.എ.ഒ.) പറയുന്നു. ലോകത്തിലുള്ള 50,000-ൽ പരം ഭക്ഷ്യ വിളകളിൽ മൂന്നെണ്ണം മാത്രമാണിതെന്ന് ഓർക്കണം.
Content highlights: your favourite foods could disappear due to climate change
