അമ്മയുടെ ചികിത്സയ്ക്ക് പണം കണ്ടെത്തുന്നതിന് റോഡരികിൽ ഇരുന്ന് പഴങ്ങൾ വിൽക്കുന്ന ഭിന്നശേഷിക്കാരനായ യുവാവിനെ യൂട്യൂബറായ ടെഡ് കുൻചോക്ക് പരിചയപ്പെടുത്തിയത് സോഷ്യൽമീഡിയയിൽ തരംഗമായിരുന്നു. ലക്ഷക്കണക്കിന് പേരാണ് ഈ വീഡിയോ കാണുകയും പങ്കുവെക്കുകയും ചെയ്തത്.
ഇപ്പോൾ സമാനമായ മറ്റൊരു വീഡിയോ സോഷ്യൽമീഡിയയിൽ തരംഗമായിരിക്കുകയാണ്. ചികിത്സയ്ക്ക് പണം കണ്ടെത്തുന്നതിന് വേണ്ടി മിഠായിയുണ്ടാക്കി വിൽക്കുന്ന പത്തുവയസ്സുകാരിയായ ലൈലയാണ് ഈ വൈറൽ വീഡിയോയിലെ നായിക. ലൈലയുടെ ജീവിതവും അവൾക്ക് ലഭിച്ച സർപ്രൈസ് സമ്മാനവും കണ്ട് സോഷ്യൽ മീഡിയ ഉപയോക്താക്കളുടെ കണ്ണുനിറയുകയാണ്. ഇൻസ്റ്റഗ്രാം ഉപയോക്താവായ ചാർലി റോക്കറ്റാണ് ലൈലയെ പരിചയപ്പെടുത്തിയത്.
റോഡരികിൽ മിഠായികൾ വിൽക്കുന്നത് കണ്ട് ലൈലയുടെ അടുത്തെത്തിയ ചാർലി അവളോട് എന്താണ് നിന്റെ സ്വപ്നമെന്ന് ചോദിക്കുന്നിടത്താണ് റീൽ ആരംഭിക്കുന്നത്. തനിക്ക് പാചകം ചെയ്‌യാൻ ഇഷ്ടമാണെന്നും ഇന്ന് മിഠായികളുണ്ടാക്കിയെന്നും ലൈല ചാർളിയെ അറിയിച്ചു. തന്റെ കാലിന്റെ ചികിത്സയ്ക്ക് പണം കണ്ടെത്തുന്നതിന് വേണ്ടിയാണ് മിഠായി ഉണ്ടാക്കി വിൽക്കുന്നതെന്നും ലൈല ചാർളിയെ അറിയിച്ചു. സിആർപിഎസ് എന്ന രോഗബാധിതയായിരുന്നു ലൈല.
ഇതുകേട്ട ചാർളി തങ്ങൾക്കുവേണ്ടി ബേക്ക് ചെയ്‌യാൻ സമ്മതമാണോയെന്ന് ലൈലയോട് ചോദിച്ചു. സമ്മതമറിയിച്ച ലൈല അടുത്തുള്ള സൂപ്പർമാർക്കറ്റിൽനിന്ന് സാധനങ്ങൾ വാങ്ങി പന്നിയുടെ ആകൃതിയിലുളള മിഠായികൾ ഉണ്ടാക്കി അവർക്ക് നൽകി.
24 മണിക്കൂർ നേരത്തേക്ക് ലൈലയുടെ പേരിൽ പ്രവർത്തിക്കുന്ന ബേക്കറികട അവൾക്കായി ഒരുക്കിയാണ് വീഡിയോയുടെ അവസാനം ചാർളി ലൈലയെ ഞെട്ടിച്ചത്. ബേക്കറികടയിൽ നിന്ന് കിട്ടുന്ന പണം കാലിന്റെ ചികിത്സയ്ക്ക് ഉപയോഗിക്കുന്നതിനുവേണ്ടിയായിരുന്നു. ചാർളിയും അവൾക്കായി ഒരു സമ്മാനം ഒരുക്കിയിരുന്നു. 24 മണിക്കൂർ നേരത്തേക്ക് അവളുടെ പേരിൽ പ്രവർത്തിക്കുന്ന ഒരു ബേക്കറിയായിരുന്നു ചാർളിയുടെ സമ്മാനം. ബേക്കറിയിൽ നിന്ന് ലഭിക്കുന്ന പണം ലൈലയുടെ കാലിന്റെ ചികിത്സയ്ക്ക് വേണ്ടി ഉപയോഗിക്കാമെന്നും അദ്ദേഹം അറിയിച്ചു.
കടയുടെ ഉള്ളിൽ ലൈലയെ കാത്ത് മറ്റൊരു സർപ്രൈസ് കൂടി ഉണ്ടായിരുന്നു. അത് മറ്റൊരു റീലിലൂടെയാണ് ചാർലി പുറത്തുവിട്ടത്. ലൈല ചാർളിക്കായി പന്നിയുടെ ആകൃതിയിലുളള മിഠായി ഉണ്ടാക്കി നൽകിയെങ്കിൽ ജീവനുളള ഒരു പന്നിക്കുഞ്ഞിനെ തന്നെ ചാർളി അവൾക്കായി സമ്മാനിച്ചു. ടർക്കിയ്‍ക്കുള്ളിൽ പൊതിഞ്ഞു കൊണ്ടുവരുന്ന പന്നിക്കുഞ്ഞിനെ കണ്ട് ലൈല വാ പൊളിച്ച് നിൽക്കുന്നത് വീഡിയോയിൽ കാണാം. അതിനെ കെട്ടിപ്പിടിച്ച് കണ്ണീർ പൊഴിക്കുന്ന ലൈല കാഴ്ചക്കാരുടെ കണ്ണുകളെയും ഈറനണിയിക്കും.
മണിക്കൂറുകൾക്കുളളിലാണ് ലൈലയുടെയും ചാർലിയുടെയും വീഡിയോ വൈറലായത്. 98,000 പേരാണ് വീഡിയോയ്‍ക്ക് ഇതുവരെ ലൈക്ക് നൽകിയത്.
Content highlights: 10 year old girl lyla sells sweets at street she got a surprise gift
