സുഖമായി ഉറങ്ങാന്‍ ഈ അഞ്ചു ഭക്ഷണങ്ങള്‍

ഏറെ നാളായി ഉറക്കക്കുറവ് നിങ്ങളെ അലട്ടുന്നുണ്ടോ? നല്ല ഉറക്കം ലഭിച്ചില്ലെങ്കിൽ നിങ്ങളുടെ ജീവിതക്രമം താളം തെറ്റിയേക്കാം. ശരീരത്തിനുണ്ടാകുന്ന ക്ഷീണത്തിനു പുറമെ മാനസികമായ ബുദ്ധിമുട്ടുകളും ഉറക്കക്കുറവ് ഉണ്ടാക്കുമെന്ന് പഠനങ്ങൾ തെളിയിക്കുന്നു. നമ്മൾ കഴിക്കുന്ന ഭക്ഷണങ്ങളും ഉറക്കത്തെ സ്വാധീനിക്കാറുണ്ട്. ചില ഭക്ഷണങ്ങൾ ഉറക്കത്തെ തടസ്സപ്പെടുത്തുന്നു. നല്ല ഉറക്കം കിട്ടാൻ സഹായിക്കുന്ന ചില ഭക്ഷണങ്ങളേതൊക്കെയെന്ന് നോക്കാം.

1. ചൂട് പാൽ

ഉറങ്ങാൻ കിടക്കുന്നതിനു മുമ്പോ രാത്രി ഭക്ഷണത്തിനുശേഷമോ ഒരു ഗ്ലാസ് ചൂടുള്ള പാൽ കുടിക്കുന്നത് നല്ല ഉറക്കം കിട്ടാൻ സഹായിക്കും. പാലിൽ അടങ്ങിയിരിക്കുന്ന മെലാറ്റോണിൻ, സെറോറ്റോണിൻ എന്നീ ഘടകങ്ങൾ നല്ല ഉറക്കം കിട്ടാൻ സഹായിക്കുന്നു. മെലാറ്റോണിൻ മസ്തിഷ്കത്തെ ശാന്തമാക്കി നമ്മളായിരിക്കുന്ന അവസ്ഥയെ നിയന്ത്രിക്കാൻ സഹായിക്കുന്നു.

2. ജമന്തിപ്പൂ ചായ

നല്ല ഉറക്കം കിട്ടുന്നതിന് ജമന്തിപൂ ചേർത്ത ചായ കുടിക്കുന്നത് ഉത്തമമാണെന്ന് Complete Book Of Ayurvedic Home Remedsi എന്ന പുസ്തകത്തിൽ വിവരിക്കുന്നുണ്ട്. ഞരമ്പുകളെ ശാന്തമാക്കി നല്ല ഉറക്കം കിട്ടാൻ ജെമന്തിപ്പൂ ചായ സഹായിക്കുന്നു. ജെമന്തി പൂവിലുള്ള ആന്റിഓക്സിഡന്റായ അപ്ജെനിൻ ഉത്‌കണ്ഠ അകറ്റുമെന്ന് കണ്ടെത്തിയിട്ടുണ്ട്.

3. വാഴപ്പഴം

നമ്മുടെ ശരീരത്തിലെ പ്രൊബയോട്ടിക്കുകളുടെ ആരോഗ്യത്തെയും വളർച്ചയെയും വാഴപ്പഴത്തിലടങ്ങിയ എൻസൈമുകൾ പ്രോത്സാഹിപ്പിക്കുമെന്ന് പഠനങ്ങൾ തെളിയിക്കുന്നു. നല്ല ഉറക്കം കിട്ടുന്നതിന് പ്രൊബയോട്ടിക്കുകൾ ഘടകമായി മാറാറുണ്ട്. മാനസിക സമ്മർദമുണ്ടാക്കുന്ന എന്തെങ്കിലും പ്രശ്നങ്ങളുണ്ടായാൽ നല്ല ഉറക്കം കിട്ടാൻ പ്രൊബയോട്ടിക്കുകൾ കഴിക്കുന്നത് നല്ലതാണെന്ന് യൂണിവേഴ്സിറ്റി ഓഫ് കോളറാഡോ ബൗൾഡറിലെ ഗവേഷകർ നടത്തിയ പഠനത്തിൽ കണ്ടെത്തിയിട്ടുണ്ട്.

4. ചെറികൾ

രാത്രിയിൽ ഉറങ്ങുമ്പോൾ പീനിയൽ ഗ്രന്ഥി ഉത്‌പാദിപ്പിക്കുന്ന ഹോർമോൺ ആണ് മെലാറ്റോണിൻ. ഈ ഹോർമോൺ ആണ് നമ്മെ ഉറങ്ങാൻ സഹായിക്കുന്നത്. ചെറികളിൽ മെലാറ്റോണിൻ അടങ്ങിയിട്ടുള്ളതിനാൽ നല്ല ഉറക്കം കിട്ടുന്നതിനും മാനസികാരോഗ്യത്തിനും സഹായിക്കും. ഒരു ദിവസം 10 മുതൽ 12 ചെറി വരെ കഴിക്കുന്നതാണ് നല്ലത്.

5. തേൻ

രാത്രി ഭക്ഷണത്തിന്ശേഷം തേൻ കഴിക്കുന്നത് നല്ല ഉറക്കം കിട്ടാൻ നല്ലതാണ്. തേനിലടങ്ങിയിരിക്കുന്ന പ്രകൃതിദത്തമായ പഞ്ചസാര ശരീരത്തിലെ ഇൻസുലിന്റെ അളവ് വർധിപ്പിക്കുന്നു. ഇത് തലച്ചോറിലേക്ക് ട്രൈറ്റോഫാൻ, സെറോറ്റോണിൻ എന്നിവ എത്തിച്ചേരുന്നതിന് കാരണമാകും. ഇത് ശരീരത്തെ ശാന്തമാക്കുന്ന രാസപദാർത്ഥങ്ങൾ പുറത്തുവിടും. തേൻ തനിച്ചോ അല്ലെങ്കിൽ ഒരു സ്പൂൺ തേൻ ചൂടു പാലിലോ ജെമന്തിപ്പൂ ചായയിലോ ചേർത്തും കഴിക്കാവുന്നതാണ്.

Content highlights: healthy foods 5 foods that may help you sleep better