വണ്ണം കുറയ്ക്കാൻ വർക്കൗട്ടിൽ മാത്രം ശ്രദ്ധ കൊടുത്താൽ പോര, ഡയറ്റും കാര്യമാക്കേണ്ടതുണ്ട്. അതിരാവിലെയുള്ള പാനീയത്തിൽ തുടങ്ങണം നിയന്ത്രണം. ചായയ്ക്കും കാപ്പിക്കും പകരം ചില ആരോഗ്യകരമായ പാനീയങ്ങൾ ഉൾപ്പെടുത്തുക വഴി വണ്ണംകുറയ്‍ക്കൽ പ്രക്രിയയെ ത്വരിതപ്പെടുത്താനാകും. എളുപ്പത്തിലുണ്ടാക്കാവുന്ന അത്തരം പാനീയങ്ങളെ പരിചയപ്പെടാം.
ചൂടു നാരങ്ങാവെള്ളം
നാരങ്ങാനീരു ചേർത്ത ചൂടുവെള്ളം രാവിലെ കുടിക്കുന്നതിന് ധാരാളം ആരോഗ്യകരമായ വശങ്ങളുണ്ട്. ദഹനപ്രക്രിയയെ സുഗമമാക്കുന്നതിനും പ്രതിരോധശേഷി വർധിപ്പിക്കുന്നതിനും വണ്ണം കുറയ്‍ക്കാനുമൊക്കെ മികച്ച പാനീയമാണിത്. ഒപ്പം വയർ നിറഞ്ഞ തോന്നൽ ഉണ്ടാക്കുന്നതോടെ അമിതമായി കഴിക്കാനുള്ള തോന്നൽ ഉണ്ടാകാതിരിക്കുകയും ശരീരത്തിൽ കലോറിയുടെ അളവ് കുറയ്‍ക്കുകയും ചെയ്‌യും.
ഗ്രീൻ ടീ
വണ്ണം കുറയ്ക്കാൻ ആഗ്രഹിക്കുന്നവരിലേറെയും കൂടെകൂട്ടുന്ന പാനീയമാണ് ഗ്രീൻ ടീ. ആന്റിഓക്സിഡന്റുകളാൽ സമൃദ്ധമായ ഗ്രീൻ ടീ പലവിധം അസുഖങ്ങളിൽ നിന്നു ശരീരത്തെ സംരക്ഷിക്കുന്നു. കൊഴുപ്പിനെ അലിയിച്ചു കളയാൻ പ്രാപ്തമാണ് ഗ്രീൻ ടീ എന്ന് ചില പഠനങ്ങൾ വരെ കണ്ടെത്തിയിരുന്നു. ഒപ്പം മെറ്റബോളിസത്തെ മെച്ചപ്പെടുത്താനുള്ള കഴിവും ഗ്രീൻ ടീക്കുണ്ട്.
ആപ്പിൾ സിഡെർ വിനെഗർ
ആരോഗ്യ ഗുണങ്ങളാൽ സമൃദ്ധമാണ് ആപ്പിൾ സിഡെർ വിനെഗറും. വണ്ണം കുറയ്ക്കാൻ രാവിലെ ശീലമാക്കാവുന്ന പാനീയങ്ങളിലൊന്നാണ് ഇതും. അരഗ്ലാസ് വെള്ളത്തിൽ ഒരു ടേബിൾ സ്പൂൺ ആപ്പിൾ സിഡെർ വിനെഗർ ചേർത്ത് കുടിക്കാം. ഇത് ദിവസവും രാവിലെ കുടിക്കുക വഴി ശരീരത്തിലെ ഉപദ്രവകാരികളായ ബാക്റ്റീരിയകളെ ഇല്ലാതാക്കാനും ബ്ലഡ് ഷുഗർ നില കുറയ്‍ക്കാനും കഴിയും.
ജീരകവെള്ളം
ജീരക വെള്ളവും വണ്ണം കുറയ്ക്കാൻ മികച്ചതാണ്. അമിതമായ വിശപ്പ് ഇല്ലാതാക്കാനും കൊഴുപ്പിനെ ഇല്ലാതാക്കാനും ജീരകവെള്ളത്തിന് കഴിവുണ്ട്. ഒരു ഗ്ലാസ് വെള്ളത്തിൽ ജീരകം കുതിർത്തുവച്ച് രാത്രിമുഴുവൻ വച്ച് പിറ്റേന്ന് രാവിലെ കുടിക്കാം.
Content Highlights: Morning Drinks For Weight Loss
