ബോളിവുഡിലെ ആരാധകരുടെ പ്രിയപ്പെട്ട താരദമ്പതികളാണ് രൺവീർ സിങ്ങും ദീപികാ പദുക്കോണും. ആരാധകരുമായി സംവദിക്കുന്നതിനു ഇൻസ്റ്റഗ്രാമിൽ ചോദ്യങ്ങൾ ചോദിക്കുന്നതിനുള്ള അവസരം ഇരുവരും കഴിഞ്ഞ ദിവസം നൽകിയിരുന്നു.
ഇഷ്ടപ്പെട്ട സിന്ധി ഭക്ഷണമേതെന്ന ഒരു ആരാധകന്റെ ചോദ്യവും രൺവീർ നൽകിയ ഉത്തരവുമാണ് ഇപ്പോൾ ഇൻസ്റ്റഗ്രാമിൽ ചർച്ചയായിരിക്കുന്നത്. ചോറിനൊപ്പം സിന്ധി കറിയും ബൂൺഡിയും അർബി തുക്കുമാണ് തന്റെ ഇഷ്ടപ്പെട്ട വിഭവമെന്ന് താരം മറുപടി നൽകി.
മസാലക്കൂട്ടും പച്ചക്കറികളും ചേർത്തുണ്ടാക്കുന്ന രുചികരമായ വിഭവങ്ങളിലൊന്നാണ് സിന്ധി കറി. ചേമ്പ് എണ്ണയിലിട്ട് നന്നായി പൊരിച്ചെടുക്കുന്ന വിഭവമാണ് അർബി തുക്.
താൻ വീഗനാണെന്നും രൺവീർ ആരാധകന്റെ ചോദ്യത്തിനു മറുപടി നൽകി. അതിന്റെ ഭാഗമായി വേവിച്ച പച്ചക്കറികളാണ് കഴിക്കുന്നതെന്നും അദ്ദേഹം പറഞ്ഞു.
ബിരിയാണിയോടുള്ള തന്റെ ഇഷ്ടവും അദ്ദേഹം ആരാധകർക്കു മുമ്പിൽ വെളിപ്പെടുത്തി. ഭാര്യ ദീപികാ പദുക്കോണിന്റെ പാചകത്തിലുള്ള നൈപുണിയെപ്പറ്റി പറയാനും രൺവീർ മറന്നില്ല. എന്താണ് ഉച്ചയ്ക്ക് കഴിച്ചതെന്ന ചോദ്യത്തിന് ബിരിയാണിയുടെ ചിത്രം അദ്ദേഹം പങ്കുവെച്ചു. ഒപ്പം ദീപിക ഉണ്ടാക്കി നൽകിയ ഡെസേർട്ടിന്റെ ചിത്രവും ഒപ്പം നൽകി.
ഭാര്യ ദീപികാ പദുക്കോണും ആരാധകരോട് സമാനമായ രീതിയിൽ കഴിഞ്ഞ ദിവസം സംവദിച്ചിരുന്നു. ഐസ്ക്രീമിനെക്കുറിച്ചുള്ള ഓർമകൾ പങ്കുവെക്കാൻ കഴിയുമോ എന്ന ആരാധകന്റെ ചോദ്യത്തിന് സ്കൂൾ കാലമാണ് തനിക്ക് ഓർമ വരുന്നതെന്നും എല്ലാ ബുധനാഴ്ചയും സ്കൂളിനടുത്ത് ഐസ്ക്രീം വിൽക്കുന്ന ഒരാൾ വന്നിരുന്നുവെന്നും ദീപിക പറഞ്ഞു. അയാളുടെ പക്കൽനിന്ന് കുട്ടികൾ ഐസ്ക്രീം വാങ്ങിയിരുന്നുവെന്നും അഞ്ചു രൂപ കൊടുത്താൻ കോൺ ഐസ്ക്രീം കിട്ടുമായിരുന്നുവെന്നും അവർ കൂട്ടിച്ചേർത്തു.
Content highlights: ranveer singh just shared his favourite sindhi food and it s a classic
