തിരുവനന്തപുരം: ലോക് ഡൗണിലും നഗരത്തിലെ ജനകീയ ഹോട്ടലുകൾ വിളമ്പിയത് മൂന്നുലക്ഷത്തിലേറെ പേർക്കുള്ള ഉച്ചഭക്ഷണം. ഒരു മാസത്തിനിടെ ഇരുപതു രൂപ നിരക്കിൽ 302896 ഭക്ഷണപ്പൊതികളാണ് തലസ്ഥാന നഗരത്തിൽ വിതരണം ചെയ്തത്. ഏറ്റവും കൂടുതൽ ഉച്ചയൂണ് വിതരണം ചെയ്തത് നേമം മൈത്രി ജനകീയ ഹോട്ടലാണ്. പതിനായിരത്തോളം പൊതികൾ.
കോവിഡ് ബാധിതരായി ചികിത്സയിലുള്ളവർക്കും വീടുകളിൽ നിരീക്ഷണത്തിലുള്ളവർക്കും ഉൾപ്പെടെയാണ് ജനകീയ ഹോട്ടലുകൾ വഴി ഭക്ഷണം നൽകുന്നത്. നാലുമുതൽ പത്തുവരെ വനിതകൾ ചേർന്നാണ് ജനകീയ ഹോട്ടലുകൾ നടത്തുന്നത്.
18 ഹോട്ടലുകളാണ് നഗരസഭാ പരിധിയിൽ ആരംഭിച്ചതെങ്കിലും നിലവിൽ 17 എണ്ണമാണ് പ്രവർത്തിക്കുന്നത്. ഭക്ഷണം തയ്‌യാറാക്കാനുള്ള സ്ഥലത്തിന്റെ അസൗകര്യം കാരണമാണ് ഒരു ഹോട്ടൽ പ്രവർത്തനം നിർത്തിവെച്ചിരിക്കുന്നത്. റാപ്പിഡ് റെസ്പോൺസ് ടീം അംഗങ്ങളും വൊളന്റിയർമാരും മുഖേനയാണ് ക്വാറന്റീനിൽ കഴിയുന്നവർക്ക് ഭക്ഷണം എത്തിക്കുന്നത്.
മൂന്ന് ഹോട്ടലുകളിൽ ഒഴികെയുള്ളവ മൂന്നു നേരവും ഭക്ഷണം വിതരണം ചെയ്‌യുന്നുണ്ട്. 20 രൂപയാണ് ഓരോ നേരത്തെയും ഭക്ഷണത്തിന്. അയൽക്കൂട്ടങ്ങളുടെ നേതൃത്വത്തിലാണ് ഓരോ ഹോട്ടലിന്റെയും പ്രവർത്തനം. കഴിഞ്ഞ ലോക്ഡൗൺ കാലത്തും ജനകീയ ഹോട്ടലുകൾ വഴി നഗരത്തിലെ ജനങ്ങൾക്ക് ന്യായവിലയിൽ വീടുകളിൽ ഭക്ഷണം എത്തിച്ചു നൽകിയിരുന്നു.
തദ്ദേശ സ്ഥാപനങ്ങളും സിവിൽ സപ്ലൈസും പദ്ധതിയിൽ പങ്കാളികളാണ്. ഹോട്ടലുകളുടെ പ്രവർത്തനം നിരീക്ഷിക്കാൻ പ്രത്യേക സംഘത്തെയും കുടുംബശ്രീ ജില്ലാ മിഷൻ രൂപവത്‌കരിച്ചിട്ടുണ്ട്.
രാവിലെ എട്ടുമുതൽ രാത്രി ഏഴുവരെയാണ് ഹോട്ടലുകളുടെ പ്രവർത്തനം. 108 ജനകീയ ഹോട്ടലുകളാണ് ജില്ലയിൽ പ്രവർത്തിക്കുന്നത്. ആയിരത്തിലേറെ കുടുംബശ്രീ അംഗങ്ങൾക്ക് പദ്ധതിയിലൂടെ ജോലി നൽകാൻ കഴിഞ്ഞു. ഒരു ഹോട്ടലിൽ നിന്നും ദിവസവും ഇരുപതോളം പേർക്ക് സൗജന്യമായും ഭക്ഷണം നൽകുന്നുണ്ട്.
ഡോ. കെ.ആർ.ഷൈജു, കോ-ഓർഡിനേറ്റർ, കുടുംബശ്രീ ജില്ലാ മിഷൻ
ദിവസേന അഞ്ഞൂറിലേറെ ഉച്ചയൂണ് ആളുകൾ വാങ്ങുന്നുണ്ട്. കോവിഡ് രോഗികൾക്കും നിരീക്ഷണത്തിലുള്ളവർക്കും മൂന്നു നേരത്തെ ഭക്ഷണം തയ്‌യാറാക്കി നൽകുന്നുണ്ട്.
ജീന, ആശ്രയ ജനകീയ ഹോട്ടൽ, ജഗതി
Content Highlights: Janakeeya hotel in thiruvanthapuram
