‘രോഗവ്യാപനത്തിന്റെ ഉച്ചസ്ഥായി കടന്നുപോയെന്ന് അനുമാനം; പക്ഷെ അത് ജാഗ്രത കൈവിടാനുള്ള പച്ചക്കൊടിയല്ല’

തിരുവനന്തപുരം:സംസ്ഥാനത്ത് ടി.പി.ആർ.(ടെസ്റ്റ് പോസിറ്റിവിറ്റി റേറ്റ്) കുറഞ്ഞുവരുന്നത് ആശ്വാസകരമാണെന്ന്മുഖ്യമന്ത്രി പിണറായി വിജയൻ. രോഗവ്യാപനത്തിന്റെ ഉച്ചസ്ഥായി കടന്നുപോയി എന്ന അനുമാനത്തിലാണ് വിദഗ്ധർ. എന്നാൽ അത് ജാഗ്രത കൈവിടാനുള്ള പച്ചക്കൊടിയല്ലെന്നും മുഖ്യമന്ത്രി പറഞ്ഞു.

സംസ്ഥാനത്ത് കർക്കശമായ ലോക്ഡൗൺ നിയന്ത്രണങ്ങളാണ് തുടരുന്നത്. തിരുവനന്തപുരം, എറണാകുളം, തൃശ്ശൂർ, മലപ്പുറം ജില്ലകളിൽ വളരെ വിജയകരമായ രീതിയിലാണ് ലോക്ഡൗൺ നടപ്പാക്കി വരുന്നത്. ജനങ്ങൾ പൂർണ സഹകരണത്തിലാണ്. വളരെ കുറച്ചു പേർ മാത്രമാണ് നിരത്തിലിറങ്ങുന്നത്. കോവിഡ് ബാധിതരും പ്രൈമറി കോൺടാക്ട് ആയവരും വീടിനുള്ളിൽ കഴിയുന്നെന്ന് ഉറപ്പാക്കാനായി. ഈ ജില്ലകളിൽ മോട്ടോർ സൈക്കിൾ പട്രോളിങ് വരെ ഉപയോഗിച്ച് ഇതുമായി ബന്ധപ്പെട്ടുള്ള നിരന്തര നിരീക്ഷണം നടത്തിവരുന്നുണ്ടെന്നും അദ്ദേഹം പറഞ്ഞു.

കർശന പരിശോധനയാണ് റോഡിൽ നടക്കുന്നത്. വളരെ അത്യാവശ്യമായ കാര്യങ്ങൾക്കു മാത്രമേ ജനങ്ങൾ പുറത്തിറങ്ങാവൂ. ചുരുക്കം ചിലർക്ക് വ്യക്തിപരമായ അസൗകര്യങ്ങൾ ഉണ്ടെങ്കിലും പൊതുവേ എല്ലാവരും ഇതുമായി സഹകരിക്കുകയാണ്. കോവിഡിനെതിരെ പോരാടാനുള്ള ജനങ്ങളുടെ നിശ്ചയദാർഢ്യമാണ് ഇത് കാണിക്കുന്നത്. സംസ്ഥാനത്തെ രോഗവ്യാപനത്തിന്റെ കാര്യത്തിൽ അൽപം ശുഭകരമായ കാര്യങ്ങൾ കാണാൻ സാധിക്കുന്നുണ്ടെന്നും മുഖ്യമന്ത്രി കൂട്ടിച്ചേർത്തു.

മേയ് ഒന്നുമുതൽ എട്ടുവരെ ഒരു ദിവസം ശരാശരി 37,144 കേസുകളാണ് ഉണ്ടായിരുന്നത്. എന്നാൽ ലോക്ഡൗൺ തുടങ്ങിയതിനു ശേഷമുള്ള ആഴ്ചയിൽ അത് 35,919 ആയി കുറഞ്ഞിട്ടുണ്ട്. ആ ഘട്ടത്തിൽ എട്ട് ജില്ലകളിൽ 10 മുതൽ 30 ശതമാനം വരെ കുറവ് രേഖപ്പെടുത്തി. ഏറ്റവും കൂടുതൽ കുറവുണ്ടായത് വയനാട് ജില്ലയിലാണ്. പത്തനംതിട്ടയിൽ രോഗവ്യാപന നില സ്ഥായിയായി തുടരുകയാണ്. എന്നാൽ കൊല്ലം, മലപ്പുറം, തിരുവനന്തപുരം, പാലക്കാട് ജില്ലകളിൽ കേസുകൾ കൂടുന്നതായാണ് കാണുന്നത്. കൊല്ലം ജില്ലയിൽ 23 ശതമാനം വർധനയാണ് കാണുന്നതെന്നും അദ്ദേഹം കൂട്ടിച്ചേർത്തു.

അതേസമയം സംസ്ഥാനത്ത് പൊതുവിൽ ആക്ടീവ് കേസുകളിൽ നേരിയ കുറവുണ്ടായിരിക്കുന്നത് ആശ്വാസകരമായ കാര്യമാണെന്നും മുഖ്യമന്ത്രി പറഞ്ഞു. 4,45,000 വരെ എത്തിയ ആക്ടീവ് കേസുകൾ 3,62,315 ആയി കുറഞ്ഞിരിക്കുന്നു. ലോക്ഡൗണിന് മുൻപ് നടപ്പാക്കിയ വാരാന്ത നിയന്ത്രണങ്ങളുടെയും രാത്രികർഫ്യൂവിന്റെയും പൊതുവേയുള്ള ജാഗ്രതയുടെയും ഗുണഫലമാണ് ഇതെന്ന് അനുമാനിക്കാം. ഒരു ദിവസം കണ്ടെത്തുന്ന രോഗവ്യാപനം ആ ദിവസത്തിന് ഒന്നു മുതൽ ഒന്നര ആഴ്ച വരെ മുൻപു ബാധിച്ചതിനാൽ ലോക്ഡൗൺ എത്രമാത്രം ഫലപ്രദമാണെന്ന് ഇനിയുള്ള ദിവസങ്ങളിലെ അറിയാനാകൂ. ഇപ്പോൾ കാണുന്ന ഈ മാറ്റം ലോക്ഡൗൺ ഗുണകരമായി മാറിയേക്കാമെന്നാണ് സൂചിപ്പിക്കുന്നതെന്നും അദ്ദേഹം പറഞ്ഞു.

content highlights:assumption that covid infection peaktime over, but dont give up precautions-cm