കൊവിഡ് ഭേദമായവരിൽ ബ്ലാക്ക് ഫംഗസ്; ഈ രോഗലക്ഷണങ്ങൾ അവഗണിക്കരുത്

കൊവിഡ് ഭേദമായവരിൽ കണ്ടുവരുന്ന അതീവ അപകടകരമായ അണുബാധയാണ് അഥവാ ബ്ലാക്ക് ഫംഗസ്. പലയിടത്തും ഈ രോഗവസ്ഥ കണ്ടെത്തുകയും രോഗ ബാധിതർ മരണപ്പെടുകയും ചെയ്യുന്ന സാഹചര്യത്തിൽ ഈ അവസ്ഥയെക്കുറിച്ച് കൂടുതൽ അറിഞ്ഞിരിക്കേണ്ടത് അനിവാര്യമാണ്. ബാധ തടയൽ, ചികിത്സ, ലക്ഷണങ്ങൾ എന്നിവ സംബന്ധിച്ച് ആരോഗ്യ മന്ത്രാലയത്തിന്റെ ഔദ്യോഗിക നിർദേശങ്ങളും വന്നുകഴിഞ്ഞു. ഈ സാഹചര്യം ഒഴിവാക്കാനായി ചില മുൻകരുതലുകൾ എടുക്കുന്നത് ഏറ്റവും നല്ലതാണ്. കൊവിഡിനോപ്പം നമ്മളെ തേടിയെത്തുന്ന പുതിയ ശത്രുവിനെ നിർബന്ധമായും അറിഞ്ഞിരിക്കണം.

എന്താണ് മ്യൂക്കോമൈക്കോസിസ്?
ഫംഗസ് അണുബാധ മൂലമുണ്ടാകുന്ന സങ്കീർണമായ രോഗാവസ്ഥയാണ് മ്യൂക്കോമൈക്കോസിസ് അല്ലെങ്കിൽ ബ്ലാക്ക് ഫംഗസ്. അന്തരീക്ഷത്തിലെ ഫംഗസുമായി സമ്പർക്കം പുലർത്തുന്നതിലൂടെ രോഗ പ്രതിരോധ ശേഷി കുറഞ്ഞവരിൽ മ്യൂക്കോമൈക്കോസിസ് പിടിപെടുന്നു. വായുവിലൂടെയും ചാർമത്തിലുണ്ടാകുന്ന മുറിവുകൾ, പോറലുകൾ എന്നിവ വഴിയും ഫംഗസ് ചർമ്മത്തിൽ പ്രവേശിക്കാം. ശേഷം ഇത് ശരീരത്തിൽ വികസിക്കുകയും ഗുരുതരമായ ആരോഗ്യാവസ്ഥയിലേയ്ക്ക് നയിക്കുകയും ചെയ്യും.

കൊവിഡ് -19 ൽ നിന്ന് സുഖം പ്രാപിച്ച രോഗികളിലാണ് ഈ രോഗം ഇപ്പോൾ അപകടകരമായി കണ്ടുവരുന്നത്‌. ഇതിൽ തന്നെ പ്രമേഹ രോഗികളും ഉയർന്ന രോഗപ്രതിരോധ ശേഷി ഇല്ലാത്തവരുമാണ് ഇതിനെതിരെ കൂടുതൽ ജാഗ്രത പാലിക്കേണ്ടത്. ഇന്ത്യൻ കൗൺസിൽ ഓഫ് മെഡിക്കൽ റിസർച്ച് പുറപ്പെടുവിച്ച നിർദേശമനുസരിച്ച്, കൊവിഡ് -19 ബാധിച്ച മറ്റ് അസുഖങ്ങൾ ഉള്ളവരിൽ മ്യൂക്കോമൈക്കോസിസ് അണുബാധയ്ക്കുള്ള സാധ്യത കൂടുതലാണ്.

*അനിയന്ത്രിതമായ പ്രമേഹബാധയുള്ളവരിൽ

*കൊവിഡ് ഭേദമാക്കുന്നതിനുള്ള സ്റ്റിറോയിഡുകൾ ഉപയോഗിക്കുന്നത് മൂലം രോഗപ്രതിരോധ ശേഷി ദുർബലമായവരിൽ

*എറേനാൾ നീണ്ടുനിൽക്കുന്ന ഐസിയു / ആശുപത്രി വാസം

*മറ്റ് ഗുരുതര രോഗാവസ്ഥകൾ / അവയവം മാറ്റിവയ്ക്കൽ / കാൻസർ

കൊവിഡ് -19 ഭേദമായവരിൽ ബ്ലാക്ക് ഫംഗസ്

അന്തരീക്ഷത്തിൽ സ്വാഭാവികമായി കാണപ്പെടുന്ന മ്യൂക്കോമിസൈറ്റുകൾ എന്നറിയപ്പെടുന്ന ഒരു കൂട്ടം സൂക്ഷ്മജീവികളാണ് ഈ രോഗത്തിന് കാരണമാകുന്നത്. സാധാരണ ഗതിയിൽ, നമ്മുടെ ശരീരത്തിന്റെ രോഗപ്രതിരോധ ശേഷി അത്തരം ഫംഗസ് അണുബാധകളെ നേരിടാൻ സജ്ജമാണ്. എന്നാൽ കൊവിഡ് -19 ബാധിക്കുന്നത് രോഗപ്രതിരോധ സംവിധാനത്തെ ദോഷകരമായി ബാധിക്കുന്നു. മാത്രമല്ല, കൊവിഡ് -19 രോഗികളുടെ ചികിത്സയിൽ ഡെക്സമെതസോൺ പോലുള്ള മരുന്നുകൾ ഉൾപ്പെടുത്തുന്നത് രോഗപ്രതിരോധ സംവിധാനത്തെ ദുർബലമാക്കുന്നു.

അതുകൊണ്ട് തന്നെ കൊവിഡ് -19 രോഗികൾക്ക് മ്യൂക്കോമിസൈറ്റുകൾ പോലുള്ള സൂക്ഷ്മ ജീവികളുടെ പോരാട്ടത്തിൽ ചെറുത്തുനിൽക്കാൻ കഴിയില്ല. കൂടാതെ, ഹ്യുമിഡിഫയർ ഉപയോഗിക്കുന്ന ഐസിയുവിൽ ഓക്സിജൻ തെറാപ്പിക്ക് വിധേയരായ കോവിഡ് രോഗികൾക്ക് ഈർപ്പം കാരണം ഫംഗസ് അണുബാധയ്ക്ക് സാധ്യതയുണ്ട്.

എന്നാൽ എല്ലാ കൊവിഡ് രോഗികൾക്കും മ്യൂക്കോർമൈക്കോസിസ് ബാധിക്കുമെന്ന് ഇതിനർത്ഥമില്ല. പ്രമേഹം ഇല്ലാത്തവരിൽ ഈ രോഗം വിരളമായി മാത്രമേ കണ്ടുവരാറുള്ളൂ. എന്നാൽ ചികിത്സിച്ചില്ലെങ്കിൽ മാരകമായേക്കാം. ബ്ലാക്ക് ഫംഗസ് ബാധിച്ചവരിൽ പൂർണ ആരോഗ്യം വീണ്ടെടുക്കാനുള്ള സാധ്യത നേരത്തെയുള്ള രോഗനിർണയത്തെയും ചികിത്സയെയും ആശ്രയിച്ചിരിക്കുന്നു.

ബ്ലാക്ക് ഫംഗസ് ലക്ഷണങ്ങൾ:
നെറ്റി, മൂക്ക്, കവിൾത്തടങ്ങൾ, കണ്ണുകൾക്കും പല്ലുകൾക്കുമിടയിൽ സ്ഥിതിചെയ്യുന്ന എയർ പോക്കറ്റുകൾ എന്നിവിടങ്ങളിൽ ചർമ്മ അണുബാധയായി മ്യൂക്കോമൈക്കോസിസ് പ്രകടമാകാൻ തുടങ്ങുന്നു. ഇത് പിന്നീട് കണ്ണുകളിലേക്കും ശ്വാസകോശത്തിലേക്കും വ്യാപിക്കുകയും തലച്ചോറിലേക്ക് പോലും ബാധിക്കുകയും ചെയ്യും. മൂക്കിന് മുകളിലുള്ള കറുപ്പ് നിറം, മങ്ങിയ കാഴ്ച അല്ലെങ്കിൽ ഇരട്ട കാഴ്ച, നെഞ്ചുവേദന, ശ്വസന സംബന്ധമായ പ്രയാസങ്ങൾ, രക്തം പുറത്തു വരുന്ന തരത്തിലുള്ള ചുമ എന്നിവയിലേക്ക് നയിക്കുന്നു. ഈ ലക്ഷണങ്ങൾ ശ്രദ്ധയിൽപെട്ടാൽ എത്രയും വേഗം ഫലപ്രദമായ ചികിത്സ ഉറപ്പാക്കാൻ തയാറാകണം.

ചികത്സ

അണുബാധ ശരീരത്തിൽ എവിടെയെങ്കിലും ചെറുതായി ആരംഭിയ്ക്കുകയും ഇത് പിന്നീട് ശരീരത്തിന്റെ മറ്റ് ഭാഗങ്ങളിലേക്കും വ്യാപിക്കുകയുമാണ് ചെയ്യുന്നത്. പ്രാരംഭഘട്ടത്തിൽ ചികിത്സ ലഭിച്ചില്ലെങ്കിൽ
നിർജീവമായതും രോഗം ബാധിച്ചതുമായ എല്ലാ കോശങ്ങളെയും ശസ്ത്രക്രിയയിലൂടെ നീക്കം ചെയ്യുക മാത്രമാണ് വഴി. ചില രോഗികളിൽ കണ്ണിന്റെ കാഴ്ച പോലും നഷ്ടപ്പെടുന്ന അവസ്ഥയുണ്ടാകും.

ഇൻട്രാവൈനസ് ആന്റി ഫംഗൽ തെറാപ്പിയും ചികിത്സയിൽ ഉൾപ്പെടാം. ഇത് ശരീരത്തിന്റെ വിവിധ ഭാഗങ്ങളെ ബാധിക്കുന്നതിനാൽ, ചികിത്സയ്ക്ക് മൈക്രോബയോളജിസ്റ്റുകൾ, ഇന്റേണൽ മെഡിസിൻ സ്പെഷ്യലിസ്റ്റുകൾ, ഇന്റൻസിവിസ്റ്റ് ന്യൂറോളജിസ്റ്റുകൾ, ഇ.എൻ.ടി സ്പെഷ്യലിസ്റ്റുകൾ, നേത്രരോഗവിദഗ്ദ്ധർ, ദന്തഡോക്ടർമാർ, ശസ്ത്രക്രിയാ വിദഗ്ധർ എന്നിവരുടെ ഒരു സംഘത്തിന്റെ മേൽനോട്ടം ആവശ്യമാണ്.

പ്രമേഹത്തെ നിയന്ത്രിക്കുന്നത് ഐ‌.സി‌.എം‌.ആർ നിർദ്ദേശിക്കുന്ന പ്രധാന പ്രതിരോധ മാർഗ്ഗങ്ങളിലൊന്നാണ്. അതിനാൽ, പ്രമേഹ രോഗികളായ കോവിഡ് രോഗികൾ അതീവ ശ്രദ്ധ നൽകേണ്ടതുണ്ട്.

മരുന്നുകൾ അത്യാവശ്യമെങ്കിൽ മാത്രം:
സ്റ്റിറോയിഡുകളുടെ അനുചിതമായ ഉപയോഗത്തിന്റെ പ്രതികൂല ഫലമായും ഈ അവസ്ഥ കണ്ടുവരുന്നതായി ആരോഗ്യ വിദഗ്ധർ പറയുന്നു. കൊവിഡ് -19 ന്റെ പ്രാരംഭ ഘട്ടത്തിൽ ഒരിക്കലും സ്റ്റിറോയിഡുകൾ നൽകരുത്. അണുബാധയുടെ ആറാം ദിവസത്തിനുശേഷം അവസ്ഥ സങ്കീർണമാകുന്നുവെങ്കിൽ മാത്രമേ അവ എടുക്കാവൂ. മാത്രമല്ല, ഡോക്ടർ നിർദ്ദേശിക്കുന്ന മരുന്നുകൾ കൃത്യമായി കഴിക്കാനും രോഗികൾ ശ്രദ്ധിക്കണം. സ്വയം മരുന്നുകൾ കഴിയ്ക്കുന്നതും സ്റ്റിറോയിഡുകളുടെ അമിത അളവും മാരകമായ അവസ്ഥകൾക്ക് കാരണമായേക്കാം, അതിനാൽ ഡോക്ടറുടെ നിർദേശങ്ങൾ കർശനമായി പാലിക്കണം. രോഗികൾക്ക് ഓക്സിജൻ തെറാപ്പി നൽകുമ്പോൾ ഹ്യുമിഡിഫയറിലെ വെള്ളം ശുദ്ധമാണെന്നും തുടർച്ചയായി ലഭിക്കുന്നുണ്ടെന്നും ഉറപ്പാക്കണം.