ഭക്ഷണത്തിന് ശേഷം അല്പം മധുരം കഴിച്ചാൽ തടി കൂടുമോ?

ചില ആളുകൾ ശരീരഭാരം കുറയ്ക്കാൻ പാടുപെടുന്നത് കാണാറില്ലേ. ആവുന്നത്ര വ്യായാമം ചെയ്തിട്ടും പല പരിശ്രമങ്ങൾ നടത്തിയിട്ടും തടി കൂടുകയല്ലാതെ ഒരു തരിമ്പുപോലും കുറയുന്നത് കാണുന്നില്ലെന്ന് പരാതി പറയാറുണ്ട് അവർ. ഒരു പക്ഷേ ഇതിന് പിന്നിലെ കാരണം അപ്രതീക്ഷിവും നമ്മൾ ശ്രദ്ധിക്കാത്ത എന്തെങ്കിലുമൊന്നാകാം. ഭക്ഷണത്തിന് ശേഷം ഒരല്പം മധുരം കഴിക്കുന്ന ശീലമുണ്ടോ നിങ്ങൾക്ക്. എങ്കിൽ ഈയൊരു ശീലം നിങ്ങളുടെ ശരീരഭാരം ഉയർത്തുന്നതിന് കാരണമാകും എന്ന് പറഞ്ഞാൽ വെറുതേ തള്ളിക്കളയാൻ വരട്ടെ.

വയറ് നിറയെ കഴിച്ചിട്ടും…
വയറുനിറയെ ഭക്ഷണം കഴിച്ചിട്ടും കുറച്ചു കഴിയുമ്പോൾ തന്നെ നിങ്ങൾക്ക് വിശപ്പ് തോന്നാറുണ്ടോ ? ഉണ്ടെങ്കിൽ അതിനു പിന്നിലെ കാരണം രക്തത്തിലെ പഞ്ചസാരയുടെ അളവിൽ ഉണ്ടാവുന്ന മാറ്റങ്ങളാണ് എന്നാണ് പുതിയ പഠനം പറയുന്നത്. ഇങ്ങനെ സംഭവിക്കുമ്പോൾ, നിങ്ങൾക്ക് കൂടുതൽ വിശപ്പ് തോന്നുകയും പകൽ സമയത്തെ കലോറി ഉപഭോഗം വർദ്ധിപ്പിക്കുകയും ചെയ്യാനിടയുണ്ട്. ഇത് നിങ്ങളുടെ ശരീരഭാരം കുറയ്ക്കാനുള്ള ലക്ഷ്യങ്ങളെ തടസ്സപ്പെടുത്തും.

നേച്ചർ മെറ്റബോളിസത്തിൽ പ്രസിദ്ധീകരിച്ച പഠനം തെളിയിക്കുന്നത് ഭക്ഷണം കഴിച്ചതിനു ശേഷം മധുരം കഴിക്കുന്ന ശീലമുണ്ടെങ്കിൽ ഇതുവഴി രക്തത്തിലെ പഞ്ചസാരയുടെ അളവിലുണ്ടാകുന്ന വ്യതിയാനങ്ങൾ നിങ്ങൾക്ക് കൂടുതൽ വിശപ്പ് സമ്മാനിക്കുമെന്നാണ്. പലരും ശരീരഭാരം കുറയ്ക്കാൻ പരിശ്രമിച്ചിട്ടും അത് സാധിക്കാതെ വരുന്നതിന് പിന്നിലെ ഒരു പ്രധാന വിശദീകരണമാണ് ഇതെന്ന് വിദഗ്ധർ അഭിപ്രായപ്പെടുന്നു

രക്തത്തിലെ പഞ്ചസാരയുടെ അളവിലെ മാറ്റം
ലണ്ടനിലെ കിംഗ്സ് കോളജിലെ ഗവേഷകർ നടത്തിയ പഠനത്തിൽ പ്രതിപാദിക്കുന്നത് ഭക്ഷണശേഷം മധുരം കഴിക്കുന്നത് മെറ്റബോളിസത്തിലും ശരീരഭാര നിയന്ത്രണത്തിലും വലിയ മാറ്റങ്ങൾ ഉണ്ടാക്കുന്നുവെന്നാണ്. ഗവേഷണ സംഘം രണ്ടാഴ്ചയ്ക്കുള്ളിൽ 1000 ൽ അധികം ആളുകൾക്ക് ഭക്ഷണശേഷം മധുരം നൽകിക്കൊണ്ട് അതുമൂലം ഉണ്ടാകുന്ന പ്രതികരണങ്ങളും മറ്റ് അടയാളങ്ങളും പരിശോധിച്ചു. മധുരം കഴിച്ചതിനു ശേഷമുളള ആദ്യ രണ്ട് മണിക്കൂറിനുള്ളിൽ രക്തത്തിലെ ഷുഗർ ലെവലിലെ വർദ്ധനവ് എല്ലാ ആളുകളിലും കൂടുതൽ വിശപ്പ് ഉണ്ടാകുന്നതിന് കാരണമായി മാറുന്നുണ്ടെന്ന് കണ്ടെത്തി.

മധുരം കഴിച്ചശേഷം രക്തത്തിലെ പഞ്ചസാരയുടെ അളവിൽ വ്യതിയാനങ്ങൾ ഉണ്ടായ മിക്ക ആളുകളിലും വിശപ്പിന്റെ തോതിൽ 9 ശതമാനം വർദ്ധനവുണ്ടാകുകയും അവർ അരമണിക്കൂറിനുള്ളിൽ തന്നെ കുടുതൽ ഭക്ഷണം കഴിക്കുകയും ചെയ്തു. ഇത്തരത്തിൽ കൂടുതൽ തവണ ഭക്ഷണം കഴിക്കുന്നത് വഴി ഒരു ദിവസം 312 കലോറിയിലധികം വർദ്ധനവ് ഉണ്ടാവാൻ സാധ്യതയുണ്ടെന്ന് ഗവേഷകർ ചൂണ്ടിക്കാണിക്കുന്നു. ഈ ഭക്ഷണ രീതി പിന്തുടരുകയാണെങ്കിൽ ഒരു വർഷത്തിൽ ഒരാളിൽ 10 കിലോ വരെ ശരീരഭാരം ഉയരാൻ സാധ്യതയുണ്ടെന്ന് ഗവേഷകർ ചൂണ്ടിക്കാട്ടി.

ശരീരഭാരം കൂട്ടുമോ?
വിശപ്പിനെ നിയന്ത്രിക്കുന്നതിൽ രക്തത്തിലെ ഷുഗർ ലെവലിന് പ്രധാന പങ്കുണ്ടെന്ന് മുൻപത്തെ പല പഠനങ്ങളും സൂചിപ്പിച്ചിട്ടുണ്ടെങ്കിലും ഇത് ശരീരഭാര വർദ്ധനവിലേക്ക് നയിക്കുമെന്ന് ചൂണ്ടിക്കാണിക്കുന്ന കൂടുതൽ തെളിവുകൾ ഈ ഗവേഷണത്തിൽ നിന്ന് കണ്ടെത്താൻ കഴിഞ്ഞുവെന്ന് ഗവേഷകർ വ്യക്തമാക്കുന്നു. ഈ ഗവേഷണത്തിലെ നിഗമനം അനുസരിച്ച്, ഭക്ഷണ ശേഷം പുരുഷന്മാരാണ് സ്ത്രീകളേക്കാൾ കൂടുതൽ മധുരം കഴിക്കാൻ ഇഷ്ടപ്പെടുന്നത്. ഭക്ഷണശേഷം കഴിക്കുന്ന മധുരത്തിൻ്റെ അളവ് നിങ്ങളുടെ ഉപാപചയ പ്രവർത്തനത്തെയും പിന്നീടുള്ള ഭക്ഷണ തിരഞ്ഞെടുപ്പുകളെയും പ്രവർത്തന നിലയെയുമൊക്കെ സ്വാധീനിക്കാൻ സാധ്യതയുണ്ടെന്നും അവർ അഭിപ്രായപ്പെടുന്നു.

നമ്മുടെ ഭക്ഷണക്രമത്തെ എങ്ങനെ നിയന്ത്രിക്കാം?
നിങ്ങളുടെ ശരീരത്തോടും ആരോഗ്യത്തോടൊപ്പം ചേർന്ന് നിൽക്കുന്ന ഭക്ഷണങ്ങൾ കഴിക്കാനായി തിരഞ്ഞെടുക്കുന്നത് തന്നെയാണ് ഏറ്റവും ഉചിതം. ഭക്ഷണ ശേഷം മധുരം കഴിക്കുന്ന ശീലം ഒഴിവാക്കിയാൽ വീണ്ടും ഉണ്ടാകാൻ സാധ്യതയുള്ള അമിത വിശപ്പിൻ്റെ സാധ്യതകളെ ലഘൂകരിക്കാൻ കഴിയും. നിങ്ങളുടെ മെറ്റബോളിസം മികച്ച രീതിയിലാക്കി മാറുന്നത് വഴി നിങ്ങളുടെ ശരീരത്തിൽ നിന്ന് കൂടുതൽ കലോറി ഒഴിവാക്കാനും സഹായിക്കും.