ഹൃദയമേശയിലെ വിഭവങ്ങള്‍-ആര്‍ഷ കബനി എഴുതിയ കവിത

” അന്നൊക്കെ ചിരിച്ച ചിരികള്‍, മത്തന്‍ വള്ളികളായി പൂവിട്ടും കായ്ച്ചും കിടക്കുന്നു.” ആര്‍ഷ കബനി എഴുതിയ കവിത

Arsha Kabani| Poem| IE Malayalam — ചിത്രീകരണം : വിഷ്ണു റാം

ഉണക്കമീന്‍

ചേരിനടിയില്‍ ഈര്‍ക്കിലില്‍ കോര്‍ത്ത മീനുകള്‍.

പ്രഭാതത്തിലും, സന്ധ്യയ്ക്കും-

എത്തിനോക്കുന്ന ചൂടില്‍,

പേറൊഴിഞ്ഞ വയറുപോലെ അവ ചുരുങ്ങുന്നു.

അത്താഴത്തിന് കഞ്ഞിക്കൊപ്പം വിളമ്പുന്ന

ആ പുകച്ചുവയുള്ള മീന്‍രുചിയാണ് അച്ഛമ്മയുടെ സ്നേഹത്തിന്

നാരങ്ങയച്ചാര്‍

നഗരത്തിലേക്ക് പോന്നപ്പോള്‍-

ഒടിച്ചുകുത്തി നാരകത്തിന്റെ

ഒരു കുപ്പിയച്ചാര്‍ അച്ഛമ്മ തന്നയച്ചു.

അച്ഛച്ചന്‍ വയ്യാതെ കിടന്ന-

ഉള്‍മുറിയുടെ ശൂന്യതയിലാണ്

ആ അച്ചാറുഭരണികള്‍ സൂക്ഷിച്ചിരിക്കുന്നത്.

ഓഫീസിലേക്കുള്ള യാത്രയില്‍-

ചോറ്റുപാത്രത്തില്‍ കടന്നുകൂടി

ആ ശൂന്യതയും എനിക്കൊപ്പം നഗരംചുറ്റാന്‍ വരുന്നു.

കൊഴുപ്പത്തോരന്‍

ഇലത്തോരന്‍ അച്ഛച്ചനും അച്ഛമ്മയ്ക്കും വലിയ ഇഷ്ടമാണ്.

പച്ചക്കറിത്തോട്ടത്തില്‍-

നിലത്ത് പടര്‍ന്ന കൊഴുപ്പപോലും അവര്‍ പ്രേമത്തോടെ പറിച്ചെടുത്തു.

അവരുടെ സ്നേഹത്തിന് സാക്ഷിയായതിന്റെ ഓര്‍മ്മ,

എന്റെ ഹൃദയത്തില്‍ ആ ചെറിയ ചെടിയുടെ തണ്ടുപോലെ-

കെട്ടുപിണഞ്ഞ് കിടക്കുന്നു.

മാമ്പഴപ്പുളിശ്ശേരി

ഏറ്റവും ദൈര്‍ഘ്യമേറിയ-

ഭക്ഷണം കഴിപ്പ് മാമ്പഴക്കാലത്തേതാണ്.

മാമ്പഴപ്പുളിശ്ശേരിയില്‍ വീണ്ടും വീണ്ടും മാമ്പഴംമുക്കി

ഉറുഞ്ചി ഉറുഞ്ചി എത്ര കഥകളാണ് അവര്‍ പറഞ്ഞുതീര്‍ത്തത്.

മത്തന്‍കുരു വറുത്തത്

മഴക്കാലങ്ങളില്‍-

ഞങ്ങള്‍ പെണ്ണുങ്ങള്‍ അടുപ്പിന്‍തറയില്‍ ചുരുണ്ടിരുന്ന് മഴകണ്ടു.

കട്ടന്‍ചായക്കൊപ്പം അരിവറുത്തതും, മത്തന്‍കുരു വറുത്തതും കഴിച്ചു.

അന്നൊക്കെ ചിരിച്ച ചിരികള്‍,

മത്തന്‍ വള്ളികളായി പൂവിട്ടും കായ്ച്ചും കിടക്കുന്നു എന്റെ ഹൃദയത്തില്‍.

ചക്കപ്പുഴുക്ക്

വീട്ടില്‍ ചക്ക പുഴുങ്ങുന്ന വൈകുന്നേരങ്ങളില്‍ ഞങ്ങള്‍ മൈലാഞ്ചിയരച്ചു.

മുളഞ്ഞീന്‍കൊണ്ട് കൈകളില്‍ കുത്തിട്ട്

അതിന് മുകളില്‍ മൈലാഞ്ചി തേച്ചു.

അന്നൊക്കെ രാത്രികളില്‍-

മേഘങ്ങള്‍ക്കിടയില്‍,

മൈലാഞ്ചിക്കറ പടര്‍ന്ന ചന്ദ്രനായിരുന്നു ഉദിച്ചിരുന്നത്.

മുള്ളാത്തച്ചക്കപ്പഴം

തറവാട്ടില്‍ മുറ്റത്തോടുചേര്‍ന്ന്

ഒരു മുള്ളാത്തയുണ്ടായിരുന്നു.

അതിന്റെ പഴങ്ങള്‍,

പുറത്ത് പരുപരുത്തതും

അകത്ത് ഒളിച്ചുവെച്ച സ്നേഹംപോലെ നേര്‍ത്തതും മധുരിക്കുന്നതുമായിരുന്നു.

പലപ്പോഴും അവ ആര്‍ക്കും വേണ്ടാതെ-

പഴുത്ത് കൊഴിഞ്ഞ് നിലത്ത് ചിതറിക്കിടന്നു.

അവയുടെ കനമുള്ള പൂവുകളുടെ മണം അവിടെയാകെ പരന്നിരുന്നു.

ആ മുള്ളാത്തയുടെ ചുവട്ടില്‍ തീകൂട്ടി-

കൊച്ചച്ചന്‍ അച്ഛന്‍പെങ്ങള്‍ക്ക് കപ്പലണ്ടി ചുട്ടുകൊടുത്തിരുന്നു.