ഉലുവ കുതിർത്ത് കഴിച്ചാൽ നിരവധി ഗുണങ്ങൾ

കയ്പ്പ് രുചി ആണെങ്കിലും ചെറിയ തോതിൽ ഉപയോഗിച്ചാൽ ഭക്ഷണത്തിന് കൂടുതൽ രുചി നല്കും. കറികളിലും, പച്ചക്കറി വിഭവങ്ങളിലും, സലാഡിലും ഉലുവ ചേർക്കാറുണ്ട്. എന്നാൽ സ്വാദ് വര്ധിപ്പിക്കുന്നതിനപ്പുറം ഏറെ ഔഷധഗുണങ്ങളുള്ളതാണ് ഉലുവ. പ്രോട്ടീൻ, ഫൈബർ, വിറ്റാമിൻ സി, നിയാസിൻ, പൊട്ടാസ്യം, ഇരുമ്പ്, ആൽക്കലോയ്ഡുകൾ എന്നിവ ഉലുവയിൽ അടങ്ങിയിരിക്കുന്നു. അസിഡിറ്റി പ്രശ്‌നമുള്ള ആളുകൾ ഇതൊഴിവാക്കാൻ എല്ലാ ദിവസവും രാവിലെ ഒരു ടീസ്പൂൺ കുതിർത്ത ഉലുവ കഴിക്കുന്നത് ഗുണം ചെയ്യും. സൗന്ദര്യസംരക്ഷണം മുതൽ ആരോഗ്യത്തിന് വരെ ഗുണകരമായ ഒന്നാണ് ഉലുവ.

പ്രമേഹത്തിന്

കുതിർത്ത ഉലുവ കഴിക്കുന്നത് രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിൽ സഹായിക്കും. പ്രകൃതിദത്തമായ ലയിക്കുന്ന ഫൈബറായ ഗാലക്ടോമാനൻ രക്തത്തിലേക്കുള്ള പഞ്ചസാരയുടെ ആഗിരണം കുറയ്ക്കാൻ സഹായിക്കുമെന്ന് പഠനങ്ങൾ ചൂണ്ടിക്കാണിക്കുന്നു. ഇൻസുലിൻറെ ഉത്പാദനത്തിന് പ്രേരിപ്പിക്കുന്ന അമിനോ ആസിഡുകളും ഉലുവയിൽ അടങ്ങിയിട്ടുണ്ട്. ഉലുവ മുളപ്പിച്ചും കഴിക്കാം. മുളപ്പിച്ച ഉലുവയാണ് കഴിക്കുന്നതെങ്കിൽ പോഷകങ്ങൾ ഇനിയും കൂടും.

കൊളസ്ട്രോൾ കുറയ്ക്കാൻ
കൊളസ്‌ട്രോൾ നിയന്ത്രിക്കാൻ മികച്ച പരിഹാരമാണ് ഉലുവ. ഉയർന്ന കൊളസ്ട്രോൾ ഉള്ളവർ തീർച്ചയായും ഉലുവ കുതിർത്തോ മുളപ്പിച്ചോ കഴിക്കാൻ ശ്രമിക്കണം. ചീത്ത കൊളസ്ട്രോൾ കുറച്ച് നല്ല കോളസ്ട്രോൾ ഉദ്പാദനം നിലനിർത്താൻ ഉലുവയ്ക്ക് കഴിയും.

സ്ത്രീകളുടെ ആരോഗ്യത്തിന്
ആർത്തവവുമായി ബന്ധപ്പെട്ടുള്ള അസ്വസ്ഥതകൾ കുറയ്ക്കാൻ ഉലുവ സഹായിക്കും. ഈസ്ട്രജന് സമാനമായ ഡയോസ്ജെനിൻ, ഐസോഫ്ലേവൻ ഘടകങ്ങൾ ആണ് ഇതിന് സഹായിക്കുന്നത്. ആർത്തവവിരാമവുമായി ബന്ധപ്പെട്ടുണ്ടാകുന്ന മാനസികനിലയിലെ വ്യതിയാനങ്ങൾക്കും ഇത് ഫലപ്രദമാണ് എന്ന് പറയപ്പെടുന്നു. ആർത്തവം ആരംഭിക്കുന്ന കാലത്തും, ഗർഭകാലത്തും സ്ത്രീകൾക്ക് ഇരുമ്പിൻറെ അപര്യാപ്തത അനുഭവപ്പെടാറുണ്ട്. ഉലുവ ഭക്ഷണത്തിൽ ഉൾപ്പെടുത്തുന്നത് ഇരുമ്പ് ഉയർന്ന അളവിൽ ശരീരത്തിലെത്താൻ സഹായിക്കും.

ഹൃദയാരോഗ്യത്തിന്
ഉലുവയിലെ ഗാലക്ടോമാനൻ എന്ന ഘടകം ഹൃദയാരോഗ്യത്തിന് ഉത്തമമാണ്. ഇത് ഹൃദയാഘാതം ഉണ്ടാകാനുള്ള സാധ്യത കുറയ്ക്കുന്നു. ഉലുവയിൽ അടങ്ങിയിട്ടുള്ള പൊട്ടാസ്യം സോഡിയത്തിൻറെ പ്രവർത്തനത്തെ കുറച്ച് രക്തസമ്മർദ്ദം നിയന്ത്രിക്കാനും സഹായിക്കും.

നല്ല ദഹനത്തിന്
ദഹനം മെച്ചപ്പെടുത്താനും മലബന്ധം അകറ്റാനും ഉലുവയ്ക്ക് കഴിവുണ്ട്. അസിഡിറ്റി മൂലമുണ്ടാകുന്ന നെഞ്ചെരിച്ചിൽ തടയാനും ഭക്ഷണത്തിൽ ഒരു സ്പൂൺ ഉലുവ ചേർക്കുന്നത് സഹായിക്കും.

ഭാരം കുറയ്ക്കാൻ
അമിതവണ്ണം കുറയ്ക്കാനുള്ള മാർഗ്ഗങ്ങൾ തേടുന്നവരാണെങ്കിൽ ഉലുവ ഉപയോഗിക്കാം. കുതിർത്ത ഉലുവ രാവിലെ വെറും വയറ്റിൽ കഴിച്ചോളൂ. ഇത് ശരീരഭാരം കുറയ്ക്കാൻ സഹായിക്കും. ഇതിലടങ്ങിയ സ്വഭാവിക ഫൈബർ വിശപ്പിനെ നിയന്ത്രിക്കാൻ സഹായിക്കും.

ഉലുവ എങ്ങനെയൊക്കെ കഴിക്കാം?
കുതിർത്തോ കറികളിൽ ചേർത്തോ ഉലുവ കഴിക്കാം. ഇതിഷ്ടമല്ലാത്തവർക്ക് ഉലുവയില ചേർത്ത തോരനോ ഉരുളക്കിഴങ്ങ് സബ്‌ജിയോ ഒക്കെ കഴിക്കാം. കുതിർത്ത ഉലുവ വെറും വയറ്റിൽ കഴിക്കുന്നതാണ് കൂടുതൽ ഗുണം നൽകുക. പ്രമേഹം, കോളസ്ട്രോൾ മറ്റ് പ്രശ്നങ്ങൾ എന്നിവയ്ക്ക് പരിഹാരം കാണാനാണെങ്കിൽ കുറഞ്ഞത് 21 ദിവസമെങ്കിലും തുടർച്ചയായി കഴിക്കാൻ ശ്രദ്ധിക്കണം.

സൗന്ദര്യ സംരക്ഷണ കാര്യത്തിലും ഉലുവയുടെ സ്ഥാനം പിന്നിലല്ല.

ചർമ്മത്തിന് ഉലുവ
സൗന്ദര്യസംരക്ഷണത്തിനായി പല പൊടിക്കൈകളും പരീക്ഷിക്കുമ്പോൾ ഉലുവ ഒഴിവാക്കേണ്ട. മുഖക്കുരു, ചുളിവുകൾ, പാടുകൾ എന്നിവ മാറ്റാൻ ഉലുവ ഉപയോഗിച്ച് പാക്കുകൾ തയ്യാറാക്കി ഉപയോഗിക്കാം. ഉലുവയിട്ട തിളപ്പിച്ച വെള്ളം കൊണ്ട് മുഖം കഴുകുന്നതും, ഉലുവയില അരച്ച് മുഖത്തിടുന്നതും ചർമ്മത്തിൽ അത്ഭുതങ്ങൾ സൃഷ്ടിക്കും.

മുടിക്ക് ഉലുവ
തലമുടിയുമായി ബന്ധപ്പെട്ട പ്രശ്നങ്ങൾ പരിഹരിക്കാനും ഉലുവ നല്ലതാണ്. ഉലുവ ഭക്ഷണത്തിൽ പതിവായി ഉൾപ്പെടുത്തുകയും, അരച്ച് തലയിൽ തേക്കുകയും ചെയ്യുന്നത് മുടിക്ക് നല്ല കറുപ്പ് നിറവും, തിളക്കവും നല്കും. ഉലുവ ചേർത്ത എണ്ണ തലയിൽ തേക്കുന്നത് മുടി കൊഴിച്ചിലിനും, മുടിക്ക് കട്ടിയില്ലാത്തതിനും പരിഹാരമാണ്. താരനെ അകറ്റാനും ഉലുവ ഫലപ്രദമാണ്. ഉലുവയും തൈരും ചേർത്ത ഹെയർ മാസ്ക് ഇതിന് പരിഹാരമാണ്.