ആര്‍ത്തവത്തിന് മുമ്പും ശേഷവും പ്രത്യേക ഭക്ഷണങ്ങള്‍ കഴിക്കണോ?

ആർത്തവത്തോടനുബന്ധിച്ച് ശരീരത്തിനും മനസ്സിനും പ്രകടമായ മാറ്റങ്ങൾ സ്ത്രീകൾക്കുണ്ടാകാറുണ്ട്. മാനസിക പിരിമുറുക്കത്തിന് പുറമെ വയറുവേദന, വയർ സ്തംഭനം, തലവേദന എന്നിവയാണ് ആർത്തവസമയങ്ങളിൽ സ്ത്രീകൾ കൂടുതലായി അനുഭവപ്പെടുന്ന ശാരീരികപ്രയാസങ്ങൾ.

ആർത്തവദിനങ്ങളിലും അതിനു മുമ്പും ശേഷവും ആഹാരക്രമത്തിൽ സ്ത്രീകൾ കൂടുതലായി ശ്രദ്ധിക്കേണ്ടതുണ്ട്. ഈ ആഹാരക്രമീകരണത്തിലൂടെ ആർത്തവസമയത്തും അതിനുമുമ്പും ശേഷവുമുള്ള ശാരീരികപ്രയാസങ്ങൾ ഒരു പരിധിവരെ തടയാൻ കഴിയുമെന്ന് ന്യൂട്രീഷണിസ്റ്റായ മീനാക്ഷി പെറ്റുകോല പറയുന്നു.

സ്ത്രീയുടെ ശരീരം അവിശ്വസനീയമായ ഒന്നാണ്. ഓരോ മാസവും അത് കടന്നുപോകുന്ന വഴികളും മാറ്റങ്ങളും അത്ഭുതം ജനിപ്പിക്കുന്നവയാണ്. മാസത്തിലുണ്ടാകുന്ന മാറ്റങ്ങൾ പ്രകൃതിദത്തമാണ്. എന്നാൽ, ശരിയായ രീതിയിൽ പോഷകങ്ങൾ ലഭ്യമാക്കിയാൽ ആ മാറ്റങ്ങളെ നിയന്ത്രിക്കാൻ കഴിയും-അവർ ഇൻസ്റ്റഗ്രാമിൽ പങ്കുവെച്ച കുറിപ്പിൽ വ്യക്തമാക്കി.

ആർത്തവത്തിന് മുമ്പ്

ആർത്തവത്തിന് മുമ്പ് ഇലക്കറികൾ, ധാന്യങ്ങൾ, സിങ്കും ഫോളേറ്റും അടങ്ങിയ ഡാർക്ക് ചോക്ക്ലേറ്റ്, ഫാറ്റി ആസിഡുകൾ കൂടുലായി അടങ്ങിയ നട്സുകൾ, നാരുകളടങ്ങിയ പഴങ്ങളും പച്ചക്കറികളും ഭക്ഷണത്തിൽ ഉൾപ്പെടുത്തണമെന്ന് മീനാക്ഷി പറയുന്നു.

ഒഴിവാക്കേണ്ടത്

ഉപ്പിന്റെ ഉപയോഗം പരമാവധി കുറയ്‍ക്കുക. കൂടാതെ, വയർ നിറച്ചും ഭക്ഷണം കഴിക്കാതിരിക്കുക. ഇത് വയറിനുള്ളിൽ അസ്വസ്ഥതകൾ ഉണ്ടാക്കുകയും അസിഡിറ്റ് കാരണമാകുകയും ചെയ്‌യും.

ആർത്തവദിനങ്ങളിൽ കഴിക്കേണ്ടത്

അയൺ, മഗ്നീഷ്യം എന്നിവ കൂടുതലായി അടങ്ങിയ ഡാർക്ക് ചോക്കലേറ്റ്, തൈര്, ധാന്യങ്ങൾ എന്നിവ ഇക്കാലയളവിൽ ഭക്ഷണത്തിൽ കൂടുതലായി ഉൾപ്പെടുത്താൻ ശ്രദ്ധിക്കണം. ഇഞ്ചി കഴിക്കുന്നത് വയർവേദന ശമിപ്പിക്കും. നന്നായി വെള്ളം കുടിക്കുക.

ആർത്തവത്തിന് ശേഷം

ഈ സമയത്ത് ഈസ്ട്രജന്റെ അളവ് കുറയുകയും ല്യൂട്ടെനൈസിങ് ഹോർമോണിന്റെ(എൽ.എച്ച്.) അളവ് ശരീരത്തിൽ വർധിക്കുകയും ചെയ്‌യും. ഏകദേശം 14-ാം ദിനമാകുമ്പോഴേക്കും അണ്ഡവിസർജനം നടക്കുന്നു. ഈ സമയത്തും ശരീരത്തിന് ശരിയായ പോഷണം ഉറപ്പുവരുത്തണം.

വിറ്റാമിൻ ബി, കാൽസ്യം, പ്രോട്ടീനുകൾ, അയൺ കൂടുതലായി അടങ്ങിയ മാംസം, ചീരയില, ഇലക്കറികൾ, പാലുത്‌പന്നങ്ങൾ എന്നിവ കഴിക്കാം.

ഓട്സ്, തവിടുകളയാത്ത അരി, പഴങ്ങൾ, നാരുകൾ അടങ്ങിയ പച്ചക്കറി, ധാന്യങ്ങൽ എന്നിവയും കൂടുലായി ഭക്ഷണത്തിൽ ഉൾപ്പെടുത്താൻ ശ്രദ്ധിക്കണമെന്നും മീനാക്ഷിയുടെ ഇൻസ്റ്റഗ്രാം പോസ്റ്റിൽ വ്യക്തമാക്കുന്നു.

Content highlights: food to include before during and after periods, healthy food items to include in diet