മനുഷ്യനെ വീണ്ടും ചന്ദ്രനിലേക്കയക്കുക എന്ന ലക്ഷ്യത്തോടെയാണ് നാസ പുതിയ ആർട്ടെമിസ് പദ്ധതി ആസൂത്രണം ചെയ്തിരിക്കുന്നത്. ഇതിന്റെ ഭാഗമായി ആദ്യ ഓറിയൺ പേടകം മാർച്ചിൽ ചന്ദ്രന്റെ ഭ്രമണ പഥത്തിലേക്ക് പുറപ്പെടും.
ഇതിലൂടെ ആമസോണിന്റെ വിർച്വൽ അസിസ്റ്റന്റ് സംവിധാനമായ അലക്സ (Alexa), സിസ്കോ വെബെക്സ് വീഡിയോ കൊളാബൊറേഷൻ സംവിധാനം എന്നിവയും ആദ്യമായി ബഹിരാകാശത്തെത്തും.
ലോഖീദ് മാർട്ടിനാണ് ആർട്ടെമിസ് പദ്ധതിയ്‍ക്ക് വേണ്ടിയുള്ള ഓറിയൺ പേടകം തയ്‌യാറാക്കിയിരിക്കുന്നത്. അതുകൊണ്ടു തന്നെ ഓറിയൺ പേടകത്തിന്റെ ആദ്യ പ്രദർശന പറക്കലായും ആർട്ടെമിസ് 1 വിക്ഷേപണം മാറും.
ആമസോണും, സിസ്കോയുമായി സഹകരിച്ചാണ് ലോഖീദ് മാർട്ടിൻ അലെക്സ ഡിജിറ്റൽ അസിസ്റ്റന്റിനേയും, വെബെക്സ് വീഡിയോ കോളാബൊറേഷൻ സംവിധാനവും ഓറിയൺ പേടകത്തിന്റെ ആദ്യ വിക്ഷേപണത്തിൽ ഉൾപ്പെടുത്തിയിരിക്കുന്നത്.
ബഹിരാകാശ യാത്രയ്‍ക്കിടെ പേടകത്തിന്റെ സ്ഥാനം, വെള്ളത്തിന്റെ അളവ്, ബാറ്ററി വോൾടേജ് പോലുള്ള വിവരങ്ങൾ ലളിതമായ ശബ്ദ നിർദേശങ്ങളിലൂടെ അറിയാൻ ഭാവിയിൽ ബഹിരാകാശ യാത്രികർക്ക് സാധിക്കുമെന്ന് നാസ ജോൺസൺ സ്പേസ് സെന്ററിലെ ഓറിയൺ പ്രോഗ്രാം ഡെപ്യൂട്ടി മാനേജർ ഹോവാർഡ് ഹു പറഞ്ഞു.
ഭൂമിയിലുള്ള മിഷൻ കൺട്രോൾ സെന്ററിൽ നിന്നും യാത്രികരോട് ടാബ് ലെറ്റ് വഴി വീഡിയോ കോൺഫറൻസ് നടത്തുന്നതിനാണ് സിസ്കോയുടെ വീഡിയോ കോൺഫറൻസിങ് സോഫ്റ്റ് വെയർ ഉപയോഗിക്കുക. ഈ സംവിധാനങ്ങളുടെ പരീക്ഷണം ആർട്ടെമിസ് പദ്ധതിയുടെ ഭാഗമായ ആദ്യ വിക്ഷേപണത്തിൽ നടക്കും.
ഇന്റർനെറ്റ് അധിഷ്ടിതമായ ക്ലൗഡ് നെറ്റ് വർക്കിനെ ആശ്രയിച്ചാണ് ആമസോൺ അലെക്സ ഭൂമിയിൽ പ്രവർത്തിക്കുന്നത്. എന്നാൽ ബഹിരാകാശ യാത്രയ്‍ക്കിടെ ഭൂമിയിലെ ക്ലൗഡുമായി അലെക്സയ്‍ക്ക് സംവദിക്കണമെങ്കിൽ കൂടുതൽ സമയമെടുക്കും. അതുകൊണ്ട് നാസയുടെ ഡീപ്പ് സ്പേസല് നെറ്റ് വർക്കും പേടകത്തിലെ ലോക്കൽ ഡാറ്റാ ബേസും പ്രയോജനപ്പെടുത്തിയാണ് അലെക്സ നിർദേശങ്ങളോട് പ്രതികരിക്കുക.
Content Highlights : Amazon’s Alexa and Cisco’s Webex to be tested on Artemis 1
