കൊറോണ വൈറസിന്റെ പുതിയ വകഭേദമായ ഒമിക്രോൺ വ്യാപിക്കുന്നതിനിടെ കർശനനിയന്ത്രണങ്ങളിലേക്ക് നീങ്ങുകയാണ് ലോകരാജ്യങ്ങൾ. ലോക്ഡൗണിന് സമാനമായ നിയന്ത്രണങ്ങൾ പല രാജ്യങ്ങളും ഏർപ്പെടുത്തി കഴിഞ്ഞു. കോവിഡിന്റെ പ്രഭവകേന്ദ്രമായ ചൈനയിലും കർശനനിയന്ത്രണങ്ങളാണ് നിലനിൽക്കുന്നത്. രോഗവ്യാപന സാധ്യതയുള്ള ഇടങ്ങളിൽ ആളുകൾക്ക് അവശ്യസാധനങ്ങൾ വാങ്ങുന്നതിനു പോലും പുറത്തിറങ്ങാൻ നിയന്ത്രണമുണ്ട്.
നിയന്ത്രണങ്ങൾ മൂലം ചൈനയിൽ പലയിടത്തും രൂക്ഷമായ ഭക്ഷ്യക്ഷാമം നിലനിൽക്കുന്നുണ്ടെന്ന് ബി.ബി.സി. റിപ്പോർട്ട് ചെയ്തു. ഭക്ഷ്യക്ഷാമം നേരിടുന്നതിന് സർക്കാർ സംവിധാനങ്ങൾ ഏർപ്പെടുത്തിയിട്ടുണ്ടെങ്കിലും അതൊന്നും ശാശ്വതമല്ലെന്നാണ് അവിടുന്നുള്ള റിപ്പോർട്ടുകൾ. കർശന നിയന്ത്രണം ഏർപ്പെടുത്തിയതിനെതിരേ ആളുകൾ സാമൂഹികമാധ്യമങ്ങളിലൂടെ പ്രതിഷേധം അറിയിക്കുന്നുമുണ്ട്.
ഭക്ഷ്യക്ഷാമം കടുത്തതോടെ ആളുകൾ ബാർട്ടർ സംവിധാനത്തിലേക്ക് നീങ്ങുകയാണെന്നും ബി.ബി.സി.യുടെ റിപ്പോർട്ടിൽ പറയുന്നു. സിഗരറ്റിനും മൊബൈൽഫോണിനും പകരം ചൈനക്കാർ പച്ചക്കറികൾ വാങ്ങുന്ന ചിത്രങ്ങൾ ചൈനീസ് സാമൂഹികമാധ്യമമായ വെയ്ബോയിൽ പങ്കുവയ്ക്കുന്നുണ്ട്. അധികൃതർ സൗജന്യമായി വീടുകളിൽ ഭക്ഷണമെത്തിച്ച് നൽകുന്നുണ്ടെങ്കിലും അത് അപര്യാപ്തമാണെന്ന പരാതികൾ ഉയരുന്നുണ്ട്.
സിഗരറ്റിനു പകരം കാബേജും പാത്രം കഴുകുന്ന ലോഷന് പകരം ആപ്പിളും സാനിറ്ററി പാഡിന് പകരം പച്ചക്കറികളും വാങ്ങുന്ന ചിത്രങ്ങൾ വെയ്ബോയിൽ ആളുകൾ പങ്കുവെച്ചു.
ഒരേ ഫ്ളാറ്റിൽ താമസിക്കുന്ന ആളുകൾ പരസ്പരം സാധനങ്ങൾ കൈമാറുന്ന ചിത്രങ്ങളാണ് സോഷ്യൽ മീഡിയയിൽ പങ്കുവയ്ക്കുന്നത്. കാരണം, അവരുടെ പക്കൽ വിശപ്പുമാറ്റുന്നതിനുള്ള ഭക്ഷണം ഇല്ല-റേഡിയോ ഫ്രീ ഏഷ്യക്ക് നൽകിയ അഭിമുഖത്തിൽ ചൈനീസ് സ്വദേശി പറഞ്ഞു. മറ്റൊരാൾ സ്മാർട്ട്ഫോണിനും ടാബ്ലെറ്റിനും പകരം അരി വാങ്ങിയതായും റേഡിയോ ഫ്രീ ഏഷ്യ റിപ്പോർട്ടു ചെയ്തു.
ചൈനയിൽ ഏർപ്പെടുത്തിയിരിക്കുന്ന കടുത്ത കോവിഡ് നിയന്ത്രണങ്ങളിൽ പല കോണുകളിൽനിന്നും വിമർശനങ്ങൾ ഉയരുന്നുണ്ടെന്ന് ബി.ബി.സി. റിപ്പോർട്ടിൽ കൂട്ടിച്ചേർത്തു. ഡിസംബർ 23 മുതൽ ഏകദേശം 13 മില്ല്യൺ ആളുകൾ വീടുകളിൽ അടച്ചുപൂട്ടപ്പെട്ട അവസ്ഥയിലാണുള്ളത്. ഭക്ഷണം വാങ്ങാൻ പോലും പുറത്തിറങ്ങാൻ ഇവർക്ക് അനുവാദമില്ല.
Content highlights: covid 19 restrictions in china, impose strict restrictions, barter system in china
