പല്ലുവേദനയുടെ കാരണങ്ങൾ
* പല്ലുകൾ ദ്രവിക്കുന്നത്
* ച്യൂയിംഗ് ഗം ചവയ്ക്കുന്നത് പോലെയുള്ള വായയുടെ ആവർത്തിച്ചുള്ള ചലനങ്ങൾ
* ബാക്ടീരിയ, വൈറൽ അണുബാധകൾ മൂലം രോഗബാധിതമായ മോണകൾ
* പോട് വീണ പല്ല്
* പല്ല് പൊട്ടൽ
പല്ലുവേദനയുടെ ലക്ഷണങ്ങൾ
* അസഹനീയമായ പല്ലുവേദന
* തലവേദന
* വേദന ബാധിച്ച ഭാഗത്തിന്റെ വീക്കം
* പനി
* രോഗം ബാധിച്ച പല്ലിൽ നിന്ന് ദുർഗന്ധമുള്ള സ്രവം
വേദന തുടരുകയും കഠിനമാവുകയും ചെയ്താൽ, എത്രയും വേഗം നിങ്ങളുടെ ദന്തരോഗവിദഗ്ദ്ധനെ കാണേണ്ടതുണ്ട്. അതുവരെ, സാധാരണയായി വീട്ടിൽ ലഭ്യമായ ചേരുവകൾ ഉപയോഗിച്ച് താഴെ പറയുന്ന ലളിതമായ പ്രതിവിധികൾ ഉപയോഗിക്കുന്നത് ഈ അസ്വസ്ഥതകളിൽ നിന്ന് താൽക്കാലിക ആശ്വാസം നൽകിയേക്കാം.
1: ഉപ്പുവെള്ളം
വായയിലെ പല പ്രശ്നങ്ങളും പരിഹരിക്കുന്നതിനുള്ള ആദ്യ ചികിത്സയാണ് ഉപ്പുവെള്ളം കൊള്ളുന്നത്. ചെറുചൂടുള്ള ഉപ്പുവെള്ളം ഉപയോഗിച്ച് വായ കഴുകുന്നത് മോണകൾക്കിടയിലോ പല്ലുകൾക്കിടയിലോ കെട്ടിക്കിടക്കുന്ന അവശിഷ്ടങ്ങൾ നീക്കം ചെയ്യാൻ സഹായിക്കുന്നു. ഉപ്പിന് ആൻറി ഇൻഫ്ലമേറ്ററി, ആന്റിസെപ്റ്റിക് ഗുണങ്ങളുണ്ട്, ഇത് വീക്കം കുറയ്ക്കാനും വേദനയിൽ നിന്ന് ആശ്വാസം നൽകാനും സഹായിക്കുന്നു.
ചെറുചൂടുള്ള വെള്ളം എടുത്ത് അതിൽ അര ടീസ്പൂൺ കടൽ ഉപ്പ് ചേർത്ത് നന്നായി ഇളക്കുക. ഈ ഉപ്പുവെള്ളം ഉപയോഗിച്ച് നിങ്ങളുടെ വായ കഴുകുക, 10-15 തവണ അല്ലെങ്കിൽ വേദന കുറയുന്നത് വരെ ഇത് ആവർത്തിക്കുക.
2: തണുപ്പ് പിടിക്കുക
ഒരു കോൾഡ് കംപ്രസ് അല്ലെങ്കിൽ ഐസ് ക്യൂബുകൾ വേദന ബാധിച്ച ഭാഗത്ത് വെയ്ക്കുന്നത് വേദനയുടെ തീവ്രത കുറയ്ക്കും. ഐസ് ഉപയോഗിക്കുന്നത് വീക്കം കുറയ്ക്കുകയും തണുപ്പിക്കൽ പ്രഭാവം നൽകുകയും ചെയ്യുന്നു. രോഗം ബാധിച്ച പല്ലിന് സമീപം വയ്ക്കുമ്പോൾ ഇത് ആ ഭാഗത്തെ മരവിപ്പിക്കുകയും സാധാരണയായി വേദന കുറച്ച് സുഖകരമാക്കുകയും ചെയ്യും.
3: ഗ്രാമ്പൂ
ഇന്ത്യൻ ആയുർവേദ വിദഗ്ധർ പല്ലുവേദന അകറ്റാൻ സുഗന്ധമുള്ള ഗ്രാമ്പൂവും അതിന്റെ എണ്ണയും ഉപയോഗിക്കാൻ നിർദ്ദേശിക്കാറുണ്ട്. വേദനസംഹാരിയായി പ്രവർത്തിക്കുന്ന യൂജെനോൾ എന്ന സംയുക്തം ഇതിൽ അടങ്ങിയിട്ടുണ്ട്. വേദന ബാധിച്ച പല്ലിന്റെ ഞരമ്പുകളെ മരവിപ്പിക്കാനും അങ്ങനെ വേദന കുറയ്ക്കാനും ഗ്രാമ്പൂ സഹായിക്കുന്നു. ഗ്രാമ്പൂ എണ്ണയും പല്ലുവേദനയ്ക്ക് ഗുണം ചെയ്യും.
ഒരു ഗ്രാമ്പൂ പല്ലിൽ വെച്ചിട്ട് അൽപം ചവച്ച് അതിന്റെ എണ്ണ എടുക്കാം അല്ലെങ്കിൽ ഗ്രാമ്പൂ എണ്ണ പല്ലിൽ പുരട്ടാം. ഇതുവഴി നിങ്ങൾക്ക് പല്ലുവേദനയിൽ നിന്ന് കുറച്ച് ആശ്വാസം ലഭിക്കും.
4: വെളുത്തുള്ളി
പല്ലുവേദന കുറയ്ക്കാൻ സഹായിക്കുന്ന മറ്റൊരു പ്രധാന വീട്ടുവൈദ്യമാണ് വെളുത്തുള്ളി. ഇതിൽ ആന്റിബയോട്ടിക്, ആൻറി ഇൻഫ്ലമേറ്ററി ഗുണങ്ങളുണ്ട്, ഇത് പ്രശ്നം ബാധിച്ച പല്ലിന്റെ വേദന കുറയ്ക്കാൻ സഹായിക്കുന്നു. വെളുത്തുള്ളിയിൽ അല്ലിസിൻ എന്ന ഘടകം ഉണ്ട്. ഇത് പല്ലുകളുടെ ആരോഗ്യത്തിന് ദോഷകരമായ ബാക്ടീരിയകളെ നീക്കം ചെയ്യാൻ സഹായിക്കുകയും വേദനയിൽ നിന്ന് ആശ്വാസം നൽകുകയും ചെയ്യും.
രണ്ടോ മൂന്നോ അല്ലി വെളുത്തുള്ളി എടുത്ത് കുറച്ച് ഉപ്പും കുരുമുളകും ചേർത്ത് ചതച്ചെടുക്കുക. ഈ മിശ്രിതം പ്രശ്നമുള്ള ഭാഗത്ത് പുരട്ടി വേദന മാറുന്നത് വരെ സൂക്ഷിക്കുക.
5: ഇഞ്ചി
പല്ലുവേദന അകറ്റുന്നതിൽ ഇഞ്ചി അത്ഭുതകരമായി പ്രവർത്തിക്കുന്നു. ഇത് നിങ്ങളുടെ വായയുടെയും പല്ലുകളുടെയും ആരോഗ്യത്തിന് പൊതുവെ കാര്യക്ഷമമായ ഒരു ഒറ്റമൂലിയായി മാറുകയും, പല്ലുകളിൽ കാവിറ്റി ഉണ്ടാക്കുന്ന, മോണരോഗങ്ങളിലേക്ക് നയിക്കുന്ന ബാക്ടീരിയകളെ കുറയ്ക്കാനും സഹായിക്കും.
മികച്ച ഫലങ്ങൾക്കായി, ഒരു കഷ്ണം പുതിയ ഇഞ്ചി തൊലി കളഞ്ഞ് വേദനയുള്ള ഭാഗത്ത് വെച്ച് ചവയ്ക്കാൻ തുടങ്ങുക, ഇഞ്ചിയുടെ നീര് പ്രശ്ന ബാധിത ഭാഗത്ത് എത്തണം. വീക്കവും വേദനയും കുറയ്ക്കാൻ ചതച്ച ഇഞ്ചി പല്ലുകൾ ഉപയോഗിച്ച് അൽപനേരം കടിച്ച് പിടിക്കുകയും ചെയ്യാം.
6: ഉള്ളി
ഉള്ളിയിൽ ആൻറി ബാക്ടീരിയൽ ഗുണങ്ങൾ അടങ്ങിയിട്ടുണ്ട്, അണുബാധയ്ക്ക് കാരണമാകുന്ന അണുക്കളെ കൊല്ലുന്നതിലൂടെ ഉള്ളിക്ക് പല്ലുവേദനയെ ലഘൂകരിക്കാനാകും.
അപ്പോൾ മുറിച്ച ഉള്ളി പല്ലുകൾക്കിടയിൽ വയ്ക്കുക, പതുക്കെ ചവയ്ക്കുക. ഇത് ഉള്ളിയുടെ നീര് പുറത്തുവിടാൻ സഹായിക്കുന്നു.
7: മഞ്ഞൾ
കുർക്കുമിൻ എന്ന സംയുക്തം മഞ്ഞളിൽ അടങ്ങിയിട്ടുണ്ട്. പല്ലുകളിലെ വീക്കം ചികിത്സിക്കാൻ സഹായിക്കുന്ന മികച്ച ആന്റി ഇൻഫ്ലമേറ്ററി, ആന്റിസെപ്റ്റിക് ഗുണങ്ങളുണ്ട് ഇവയ്ക്ക്. മോണയുടെയും പല്ലിന്റെയും ഭാഗത്തെ അണുബാധയോ കുരുവോ ഉണ്ടായാൽ മഞ്ഞൾ അവ സുഖപ്പെടുത്തും.
മികച്ച ഫലം ലഭിക്കുന്നതിന്, മഞ്ഞൾപ്പൊടി കുറച്ച് വെള്ളം ചേർത്ത് പേസ്റ്റ് രൂപത്തിലാക്കി പ്രശ്ന ബാധിത പ്രദേശത്ത് പുരട്ടുക.
8: കർപ്പൂരതുളസി എണ്ണ
നിങ്ങളുടെ പല്ലുവേദന ശമിപ്പിക്കാനും നീർവീക്കം കുറയ്ക്കാനും കർപ്പൂരതുളസി എണ്ണ അഥവാ പെപ്പർമിന്റ് ഓയിലിന് സാധിക്കും. ഇതിൽ ആൻറി ബാക്ടീരിയൽ ഗുണങ്ങളുള്ള മെന്തോൾ അടങ്ങിയിട്ടുണ്ട്.
വേദന തൽക്ഷണം ശമിപ്പിക്കാൻ, പഞ്ഞിയിൽ കുറച്ച് തുള്ളി പെപ്പർമിന്റ് ഓയിലും ഒലിവ് ഓയിലും ഒഴിക്കുക. തുടർന്ന് വേദന മാറുന്നത് വരെ 10-15 മിനിറ്റ് നേരം കോട്ടൺ പഞ്ഞി വേദന ബാധിച്ച ഭാഗത്ത് വയ്ക്കുക.
9: കായം
പല്ലുവേദനയ്ക്കുള്ള ഏറ്റവും പഴക്കംചെന്ന വീട്ടുവൈദ്യങ്ങളിലൊന്നാണ് കായം. പല്ലുവേദന, മോണയിൽ രക്തസ്രാവം എന്നിവ ചികിത്സിക്കാനും നിങ്ങളുടെ മോണകളുടെയും പല്ലുകളുടെയും ആരോഗ്യം നിലനിർത്താനും ഇത് സഹായിച്ചേക്കാം.
ഒരു നുള്ള് കായം എടുത്ത് അതിൽ ഒരു ടീസ്പൂൺ നാരങ്ങ നീര് ചേർക്കുക. ഇത് ഇളക്കി അതിൽ ഒരു കോട്ടൺ പഞ്ഞി മുക്കിവയ്ക്കുക. തുടർന്ന് വേദന മാറുന്നത് വരെ പ്രശ്ന ബാധിത പ്രദേശത്ത് ഈ കോട്ടൺ പഞ്ഞി വയ്ക്കുക.
10: പേരയില
പേരയുടെ ഇലയിൽ വീക്കവും വേദനയും കുറയ്ക്കാൻ സഹായിക്കുന്ന ആന്റിമൈക്രോബയൽ ഗുണങ്ങളുണ്ട്. പേരയില എടുത്ത് ചവയ്ക്കുക. അല്ലെങ്കിൽ വേദന കുറയ്ക്കാൻ നിങ്ങൾക്ക് അവ മൗത്ത് വാഷായി ഉപയോഗിക്കാം.
ശ്രദ്ധിക്കുക: ഈ ലേഖനത്തിൽ ഉൾപ്പെടുത്തിയിരിക്കുന്ന കാര്യങ്ങൾ പൊതുവായ വിവരങ്ങൾ നൽകാൻ മാത്രം ഉദ്ദേശിച്ചുള്ളതാണ്. ഇവ ഒരിക്കലും ഒരു വിദഗ്ധാഭിപ്രായത്തിന് പകരമാകില്ല. കൂടുതൽ വിവരങ്ങൾക്ക് ഒരു ഡോക്ടറുടെ നിർദ്ദേശം തേടാം.
