പലപ്പോഴും, നമ്മുടെ ശരീരത്തിന് ആവശ്യമായ വിറ്റാമിനുകളെ നാം അവഗണിക്കുന്നു. ഇത്തരം പോഷകങ്ങളുടെ അഭാവം മൂലം ശരീരത്തിൽ സമൂലമായ മാറ്റം അനുഭവപ്പെടുമ്പോഴോ അല്ലെങ്കിൽ ചില അസ്വസ്ഥതകൾക്കും വേദനകൾക്കും വിധേയമാകുമ്പോഴോ മാത്രമാണ് മിക്കവരും ഇതിനെ കുറിച്ച് ശ്രദ്ധിക്കുന്നത്.
നമ്മുടെ എല്ലുകളെ ആരോഗ്യത്തോടെ നിലനിർത്തുന്നതിലും ഉത്കണ്ഠ കുറയ്ക്കുന്നതിലും മൊത്തത്തിലുള്ള പ്രതിരോധശേഷി വർദ്ധിപ്പിക്കുന്നതിലും വിറ്റാമിൻ ഡി ഒരു പ്രധാന പങ്ക് വഹിക്കുന്നു.
ആരോഗ്യത്തിന് വിറ്റാമിൻ ഡി
പലർക്കും അറിയാവുന്നത് പോലെ, സൂര്യപ്രകാശം ഏൽക്കുന്നതിന്റെ പ്രതികരണമായി വിറ്റാമിൻ ഡി സ്വാഭാവികമായും ചർമ്മത്തിൽ ഉത്പാദിപ്പിക്കപ്പെടുന്നു. വിറ്റാമിൻ ഡി അടങ്ങിയ ചില ഭക്ഷണങ്ങളിലൂടെയും സപ്ലിമെന്റുകളിലൂടെയും ഇത് നിങ്ങൾക്ക് ലഭിക്കും.
വിറ്റാമിൻ ഡിയുടെ മതിയായ അളവ് ശരീരത്തിൽ കാൽസ്യം, ഫോസ്ഫറസ് എന്നിവയുടെ ആഗിരണം നിയന്ത്രിക്കാൻ സഹായിക്കുന്നു. ഇത് രോഗപ്രതിരോധ പ്രവർത്തനങ്ങൾ മെച്ചപ്പെടുത്തുന്നു, വിവിധ അണുബാധകളെയും രോഗങ്ങളെയും ചെറുക്കുന്നു, കൂടാതെ എല്ലുകളുടെയും പല്ലുകളുടെയും സാധാരണ വളർച്ചയും വികാസവും സുഗമമാക്കുകയും ചെയ്യുന്നു.
ഈ അവശ്യ ഗുണങ്ങൾ കൂടാതെ, വിറ്റാമിൻ ഡി സമ്മർദ്ദവും ഉത്കണ്ഠയും കുറയ്ക്കാനും മാനസികാവസ്ഥയെ നിയന്ത്രിക്കാനും സഹായിക്കുന്നു. കൂടാതെ, ശരീരഭാരം കുറയ്ക്കാനും ആരോഗ്യത്തോടെ നിലനിർത്താനും ശ്രമിക്കുന്നവർക്കും വിറ്റാമിൻ ഡിയുടെ നേട്ടങ്ങൾ കൊയ്യാൻ കഴിയും, കാരണം നിങ്ങൾ ആഗ്രഹിക്കുന്ന തരത്തിൽ ശരീരഭാരം കുറയ്ക്കാൻ ഇത് സഹായിക്കുമെന്ന് പഠനങ്ങൾ സൂചിപ്പിക്കുന്നു.
വിറ്റാമിൻ ഡിയുടെ അളവ് കുറയുന്നത് പല ആരോഗ്യപ്രശ്‌നങ്ങൾക്കും കാരണമാകും. വിറ്റാമിൻ ഡിയുടെ അപര്യാപ്തത ഇനി പറയുന്ന പ്രശ്നങ്ങൾക്ക് കാരണമാകും.
ക്ഷീണം, തളർച്ച
വൈറ്റമിൻ ഡി യുടെ കുറവുള്ളവർ, പൊതുവായി ക്ഷീണവും തളർച്ചയും അനുഭവിക്കുന്നതായി പലപ്പോഴും പരാതിപ്പെടുന്നു, ഇത് ദൈനംദിന പ്രവർത്തനങ്ങൾ തടസ്സപ്പെടുത്താൻ കാരണമാകും. പേശികളിലെ തളർച്ച കോണിപ്പടികൾ കയറുന്നതിനോ തറയിൽ നിന്നോ താഴ്ന്ന കസേരയിൽ നിന്നോ എഴുന്നേൽക്കുന്നതിനോ ബുദ്ധിമുട്ടുണ്ടാക്കും.
അസ്ഥി വേദന
കുട്ടികളിലെ ദുർബലമായ അസ്ഥികളിലേക്ക് നയിക്കുന്ന ‘റിക്കറ്റ്സ്’ (പിള്ളവാതം) എന്ന രോഗത്തിനുള്ള പ്രതിവിധിയാണ് വിറ്റാമിൻ ഡി. വിറ്റാമിൻ ഡി കാൽസ്യം, ഫോസ്ഫറസ് എന്നിവ ആഗിരണം ചെയ്യാൻ സഹായിക്കുന്നു, ഇത് എല്ലുകളെ നിർമ്മിക്കുകയും ശക്തിപ്പെടുത്തുകയും ചെയ്യുന്നു. വിറ്റാമിൻ ഡി കുറയുന്നത് എല്ലുകളുടെ ആരോഗ്യം ക്ഷയിക്കുന്നതിനും അസ്ഥികളുടെ വേദനയ്ക്കും കാരണമാകും.
പേശി വേദന
വിറ്റാമിൻ ഡിയുടെ അഭാവം പേശി വേദനയ്ക്ക് കാരണമാകും. വിട്ടുമാറാത്ത പേശി വേദന അനുഭവപ്പെടുകയാണെങ്കിൽ വൈദ്യ സഹായം തേടുക.
കണ്ടെത്താൻ
രക്തപരിശോധനയിലൂടെ വൈറ്റമിൻ ഡിയുടെ കുറവ് കണ്ടെത്താം. നിങ്ങളുടെ ശരീരത്തിൽ അവയുടെ കുറവ് സ്ഥിരീകരിക്കാൻ കഴിയുന്ന രണ്ട് തരം പരിശോധനകളുണ്ട് – ഏറ്റവും സാധാരണമായത് 25-ഹൈഡ്രോക്സിവിറ്റാമിൻ ഡി, ചുരുക്കത്തിൽ 25(OH)D എന്നറിയപ്പെടുന്നു.
