സ്മാർട്ട് ഫോൺ വിപണിയിലേക്ക് പുതിയ ഫ്ളാഗ്ഷിപ്പ് ഫോണുമായി റിയൽമി എത്തുന്നു. റിയൽമി ജിടി മാസ്റ്റർ എഡീഷൻ, റിയൽമി എക്സ് 7 മാക്സ് എന്നീ ജനപ്രിയ ഫോണുകൾക്ക് ശേഷം റിയൽമി അവതരിപ്പിക്കുന്ന ബിഗ് ബഡ്ജറ്റ് ഫോൺ തന്നെ ആവും റിയൽമി ജിടി2 -പ്രോ. അടുത്തവർഷം ആദ്യ പാദത്തോടെ ലോഞ്ച് ചെയ്‌യുമെന്ന് പ്രതീക്ഷിക്കുന്ന ഫോണിന്റെ ചല സവിശേഷതകളെ കുറിച്ചുള്ള വിവരങ്ങൾ പുറത്തുവന്നിട്ടുണ്ട്.
ഐഎംഈഐ ഡാറ്റാബേസ്, ഇഇസി സർട്ടിഫിക്കേഷൻ പോലെയുള്ള സൈറ്റുകളിൽ ഫോണിന്റെ വിവരങ്ങൾ ഇതിനോടകം തന്നെ ലിസ്റ്റ് ചെയ്ത് കണ്ടതായും റിപ്പോർട്ടുകളുണ്ട്. പ്രോസസ്സർ, ക്യാമറ, ബാറ്ററി, സ്റ്റോറേജ്, കണക്റ്റിവിറ്റി ഫീച്ചറുകളും പ്രതീക്ഷിക്കപ്പെടുന്ന വിലയുമാണ് ഇപ്പോൾ പുറത്തുവന്നിരിക്കുന്ന റിപ്പോർട്ടുകൾ സൂചന നൽകുന്നത്.
റിയൽമി ജിടി 2 പ്രോയുടെ പ്രതീക്ഷിക്കുന്ന സവിശേഷതകൾ
ക്വാൽകോം സ്നാപ്ഡ്രാഗൺ 898 (Qualcomm Snapdragon 898) പ്രോസസ്സർ ആണ് ഫോണിൽ പ്രതീക്ഷിക്കുന്നത്. കൂടാതെ സ്മാർട്ട്ഫോണിന്റെ ചിപ്സെറ്റ് ഒരു എൽപിഡിഡിആർ 5 റാമിലേക്കും (LPDDR5 RAM) യുഎഫ്എസ് 3.1 (UFS 3.1) സ്റ്റോറേജിലേക്കും ജോടിയാക്കുമെന്ന് റിപ്പോർട്ടുകൾ പരാമർശിക്കുന്നു. റിയൽമി യുഐ 3.0 യും ആൻഡ്രോയിഡിന്റെ ഏറ്റവും പുതിയ പതിപ്പായ ആൻഡ്രോയിഡ് 12 ( Android 12 ) -നോട് കൂടിയാവും ഫോൺ വിപണിയിലെത്തുക.
RMX 3301 എന്ന മോഡൽ നമ്പറിലുള്ള റിയൽമി ജിടി 2 പ്രോയ്‍ക്ക് 20:9 വീക്ഷണാനുപാതം, ഉയർന്ന റീഫ്രഷ് റേറ്റ്, 404ppi പിക്സൽ സാന്ദ്രത എന്നിവയുൾപ്പെട്ട 6.51 ഇഞ്ച് ഫുൾ-എച്ച്ഡി+ അമോലെഡ് ഡിസ്പ്ളേ ലഭിക്കും. കൂടാതെ, ഒപ്റ്റിക്കൽ ഇമേജ് സ്റ്റെബിലൈസേഷനോട് (OIS) കൂടിയ 50 മെഗാപിക്സൽ പ്രൈമറി റിയർ ക്യാമറയും മുൻവശത്ത് 32 മെഗാപിക്സൽ സെൽഫി ക്യാമറയും ലഭിക്കുമെന്നാണ് റിപ്പോർട്ട്.
125W ഫാസ്റ്റ് ചാർജിംഗ് സപ്പോർട്ടോട് കൂടിയ 5,000mAh ബാറ്ററിക്ക് ലഭിക്കുമെന്ന് സൂചന നൽകിയിട്ടുണ്ട്. എന്നാൽ, നേരത്തെ പുറത്തുവന്ന റിപ്പോർട്ടുകൾ പ്രകാരം ഫോണിന്റെ ചാർജിംഗ് ശേഷി 65W ആയി പരിമിതപ്പെടുത്തുമെന്നാണ് പറഞ്ഞിരുന്നത്. കണക്റ്റിവിറ്റി ഓപ്ഷനുകളിൽ വൈഫൈ വേർഷൻ 6 (Wi-Fi 6), ബ്ലൂടൂത്ത് v5.2 എന്നിവ ഉൾപ്പെടുത്താനാണ് സാധ്യത.
റിയൽമി ജിടി2 പ്രോ യുടെ പ്രതീക്ഷിക്കുന്ന വില
ഏറ്റവും പുതിയ റിപ്പോർട്ടുകൾ പ്രകാരം ഫോണിന്റെ വില 4,000 യുവാൻ അതായത് ഏകദേശം 46,500/- രൂപ ആയിരിക്കുമെന്ന് പറയപ്പെടുന്നു, അതേസമയം സ്പെഷ്യൽ എഡിഷൻ മോഡലിന് 5,000 യുവാൻ (ഏകദേശം 58,200/- രൂപ) വില പ്രതീക്ഷിക്കുന്നു. എന്നാൽ വിലയെ സംബന്ധിച്ചോ സവിശേഷതകളെ സംബന്ധിച്ചോ ഉള്ള യാതൊരു വിവരങ്ങളും റിയൽമി ഔദ്യോഗികമായി പുറത്തുവിട്ടിട്ടില്ല.
Content Highlights : Realme GT 2 Pro may get the Snapdragon 898 and 125w Fast charging – Leaked Specifications in detail
