ഇലോൺ മസ്കിന്റെ സ്പേസ് എക്സിന്റെ ഉടമസ്ഥതയിലുള്ള സാറ്റലൈറ്റ് കമ്മ്യൂണിക്കേഷൻ കമ്പനിയായ സ്റ്റാർലിങ്ക് ഇന്ത്യയിൽ സ്ഥിരം ജീവനക്കാരെ തേടുന്നു. ഡയറക്‍ടർ ഓഫ് റൂറൽ ട്രാൻസ്‌ഫർമേഷൻ, എക്സിക്യൂട്ടീവ് അസിസ്റ്റന്റ് എന്നിങ്ങനെ ഇന്ത്യയിൽ രണ്ട് തസ്തികകളിലേക്കാണ് ഉദ്യോഗസ്ഥരെ തേടുന്നത്. ലിങ്ക്ഡ് ഇനിൽ സ്റ്റാർലിങ്ക് ഇന്ത്യ മേധാവി സഞ്ജയ് ഭാർഗവയാണ് തൊഴിലവസരങ്ങൾ പങ്കുവെച്ചത്. താൽപര്യമുള്ളവർക്ക് സ്പേസ് എക്സിന്റെ വെബ്സൈറ്റിലൂടെ അപേക്ഷിക്കാം.
അപേക്ഷിക്കാനുള്ള ലിങ്ക് അദ്ദേഹം പങ്കുവെച്ചിട്ടുണ്ട്. വാണിജ്യ ലൈസൻസ് ലഭിച്ചതിന് ശേഷം കൂടുതൽ തൊഴിലവസരങ്ങൾ ഭാവിയിൽ ഉണ്ടാകുമെന്ന് ഭാർഗവ പറഞ്ഞു.
കമ്പനിയുടെ വെബ്സൈറ്റിൽ തൊഴിലവസരങ്ങൾ സംബന്ധിച്ച കൂടുതൽ വിവരമുണ്ട്. യോഗ്യതയും മറ്റ് നിബന്ധനകളും ഇതിനൊപ്പം നൽകിയിട്ടുണ്ട്. 2022-ൽ ഇന്ത്യയിൽ സേവനം ആരംഭിക്കാനാണ് സ്റ്റാർലിങ്ക് പദ്ധതിയിടുന്നത്. ഉപഗ്രഹങ്ങളിൽനിന്ന് നേരിട്ട് ഡിഷ് ആന്റിന വഴി ഇന്റർനെറ്റ് എത്തിക്കുകയാണ് സ്റ്റാർലിങ്ക് ചെയ്‌യുക. ഭൂമിയിൽ സാധാരണ ഇന്റർനെറ്റ് സേവനങ്ങൾക്ക് എത്തിച്ചേരാൻ സാധിക്കാത്ത ഭൂപ്രദേശങ്ങളിൽ പോലും അതിവേഗ കണക്റ്റിവിറ്റി എത്തിക്കാൻ ഇതുവഴി സാധിക്കും.
സ്റ്റാർലിങ്കിനെ കൂടാതെ വൺ വെബ്, ആമസോൺ കുയ്പർ തുടങ്ങിയ സേവനങ്ങളും സാറ്റലൈറ്റ് കമ്മ്യൂണിക്കേഷൻ രംഗത്തുണ്ട്. നിലവിൽ സ്റ്റാർലിങ്ക് മാത്രമാണ് ഇന്ത്യയിലേക്ക് വന്നിട്ടുള്ളത്.
Content Highlights: Starlink India Jobs, Career at starlink, Jobs in starlink, Starlink Internet, Starlink Connection
