വണ്ണം കുറച്ച് ഒതുങ്ങിയ വയർ നേടാൻ വേണം ഈ ആറ് ശീലങ്ങൾ

സ്ത്രീകളെയും പുരുഷന്മാരെയും ഒരുപോലെ ബാധിയ്ക്കുന്ന പ്രശ്നമാണ് അമിതവണ്ണവും കുടവയറും. പെട്ടെന്ന് അലിയിച്ച് കളയാൻ പല വഴികളും പരീക്ഷിയ്ക്കുകയും ചെയ്യും. ചിലർ പ്രാവർത്തികമാക്കാൻ ശ്രമിയ്ക്കുന്നതിന്‌ പകരം പുതിയതും ലളിതവുമായ വഴികൾ അന്വേഷിച്ചുകൊണ്ടേയിരിയ്ക്കും. ഏറ്റവും കൂടുതൽ ആളുകൾ സെർച്ച് ചെയ്യുന്നത് അതിവേഗത്തിൽ വളരെ ലളിതമായി ഭാരം കുറയ്ക്കാനുള്ള വഴികളാണ്. കുറഞ്ഞപക്ഷം കുടവയർ കുറയുകയെങ്കിലും ചെയ്‌താൽ സന്തോഷം എന്ന പക്ഷക്കാരും ധാരാളമുണ്ട്.

എന്നാൽ അത്ര വേഗത്തിൽ രണ്ടോ നാലോ ദിവസം കൊണ്ട് അപ്രത്യക്ഷമാക്കാവുന്ന ഒന്നല്ല അമിതവണ്ണവും കുടവയറും എന്ന തിരിച്ചറിവാണ് ആദ്യം വേണ്ടത്. ആദ്യം നിങ്ങളുടെ ഭാരവും കുടവയറും കൂടിവരുന്നതിന് പിന്നിലെ കാരണങ്ങൾ കണ്ടെത്തണം, പിന്നീട് അവ പരിഹരിയ്ക്കുന്നതിനുള്ള മാർഗങ്ങൾ സ്വീകരിയ്ക്കണം. ഭക്ഷണം വളരെ കുറഞ്ഞ അളവിൽ മാത്രം കഴിച്ചിട്ടും വണ്ണം കൂടി വരുന്നു എന്ന പരാതിയുള്ളവർ ആണ് കൂടുതലും.

സമ്മർദ്ദം കൂടുന്നതും അമിത വണ്ണവും
ഭക്ഷണം മാത്രമല്ല ഭാരം വർദ്ധിയ്ക്കുന്നതിന് പിന്നിൽ, കടുത്ത മാനസിക സമ്മർദ്ദമനുഭവിയ്ക്കുന്നവരിൽ അമിതവണ്ണത്തിന് സാധ്യത ഏറെയാണ്‌. സമ്മർദം അനുഭവപ്പെടുന്ന സമയങ്ങളിൽ ‘സ്ട്രെസ്സ് ഹോർമോൺ’ എന്നറിയപ്പെടുന്ന കോർട്ടിസോൾ അളവ് കൂടുകയും ഇത് അമിതവണ്ണം ഉൾപ്പെടെയുള്ള പല പ്രശ്നങ്ങൾക്കും വഴിയൊരുക്കുകയും ചെയ്യും. ഇങ്ങനെ കോർട്ടിസോൾ അളവ് കൂടുന്ന സമയങ്ങളിൽ വലിയ അളവിൽ ഭക്ഷണം കഴിയ്ക്കാനുള്ള തോന്നൽ അനുഭവപ്പെടുകയും ചെയ്യും. പ്രത്യേകിച്ച് മധുരം കൂടിയ ഭക്ഷണങ്ങൾ, ഫാസ്റ്റ് ഫുഡ് ഇനങ്ങൾ തുടങ്ങിയവ കഴിയ്ക്കാനാണ് ഈ സമയത്ത് കൂടുതൽ പേരും ശ്രമിയ്ക്കുക. ഇത് തീർച്ചയായും ശരീരത്തിൽ കൊഴുപ്പടിയുന്നതിനും ഭാരം കൂടുന്നതിനും കാരണമാകും.

അതുപോലെ തന്നെ സമ്മർദ്ദം അനുഭവപ്പെടുന്ന സമയങ്ങളിൽ ഇൻസുലിൻ നിയന്ത്രണത്തിൽ കൊണ്ടുവരാൻ കഴിയാത്ത അവസ്ഥയും അനുഭവപ്പെടും. ഇതും പല ആരോഗ്യ പ്രശ്നങ്ങളിലേയ്ക്ക് വഴിവെയ്ക്കും.

എന്താണ് പരിഹാരം?
> സമ്മർദ്ദം കുറയ്ക്കാനുള്ള വഴികൾ തേടുകയാണ് ഭാരം കുറയ്ക്കാനായി നിങ്ങൾ ആദ്യം ചെയ്യേണ്ടത്. ജീവിതത്തിലേ പ്രയാസങ്ങൾക്കും വിഷമങ്ങൾക്കും അമിത പ്രാധാന്യം നൽകാതെ അവയെ നിസ്സാരമായി കാണാൻ കഴിഞ്ഞാൽ ഭാരം കുറയ്ക്കുന്നതിനുള്ള ആദ്യ പടി നിങ്ങൾ ചെയ്തുവെന്ന് കരുതിക്കോളൂ.

> രണ്ടാമതായി അമിത കലോറി അടങ്ങിയ ഭക്ഷണമാണ് ഉപേക്ഷിയ്ക്കേണ്ടത്. പഞ്ചസാര, കാർബോഹൈഡ്രേറ്റ് എന്നിവ കൂടുതലുള്ള ഭക്ഷണങ്ങൾ കഴിയ്ക്കുന്നത് പൊണ്ണത്തടി വിളിച്ചു വരുത്തും.

> വെളുത്ത അരി കൊണ്ടുള്ള ഭക്ഷണങ്ങൾ, മൈദ ഉപയോഗിച്ച് തയ്യാറാക്കിയ ബ്രെഡ്‌, കേക്കുകൾ, മധുര പലഹാരങ്ങൾ, ബേക്കറി ഉത്പന്നങ്ങൾ, മധുരം ചേർത്ത യോഗർട്ട് എന്നിവ പൂർണമായും ഉപേക്ഷിയ്ക്കുകയാണ് നല്ലത്.

ജീവിതശൈലി മാറ്റങ്ങൾ
ജീവിതശൈലിയിൽ ചില നല്ല മാറ്റങ്ങൾ വരുത്തുന്നത് അമിതവണ്ണം പിടിച്ചുകെട്ടാൻ സഹായകമാണ്. അതിനാൽ ഇക്കാര്യങ്ങങ്ങൾ പിന്തുടരാം:

നന്നായി ഉറങ്ങൂ:
ഉറക്കം ഔഷധ തുല്യമാണ്. മനസിനും ശരീരത്തിനും മികച്ച ഗുണങ്ങൾ നൽകാൻ ഉറക്കത്തിന് കഴിയും. സമ്മർദ്ദം മൂലമുള്ള കോർട്ടിസോൾ ലെവൽ നിയന്ത്രിയ്ക്കാനും ഇതിനു സാധിയ്ക്കും. വിശപ്പ്‌ കുറയ്ക്കാനും കൂടുതൽ ഊർജ്ജം നൽകാനും ഉറക്കം സഹായകമാണ്. എന്നാൽ നന്നായി ഉറങ്ങിയില്ലെങ്കിൽ വിപരീത ഫലം അനുഭവിക്കേണ്ടതായി വരും. ആവശ്യത്തിന് ഉറക്കം ലഭിച്ചില്ലെങ്കിൽ ഭക്ഷണത്തോട് ആഗ്രഹം കൂടുകയും അമിതമായി കഴിയ്ക്കുകയും ചെയ്യും. ഉറക്കം നഷ്ടപ്പെടുന്നവർ നന്നായി ഉറങ്ങുന്നവരെക്കാൾ ഏകദേശം 300 കലോറി അധികം ഭക്ഷണം കഴിയ്ക്കും എന്നാണ് കൊളംബിയ യൂണിവേഴ്സിറ്റിയുടെ പഠനം വ്യക്തമാക്കുന്നത്.

പഞ്ചസാര ഉപയോഗം കുറയ്ക്കുക:
ബിസ്കറ്റ്, ചോക്ലേറ്റ്, കേക്ക്… മധുരം കലർന്ന ഇത്തരം വിഭവങ്ങളെല്ലാം ഇഷ്ടംപോലെ കഴിയ്ക്കുന്നവരാണ് കൂടുതൽ പേരും. മധുര പലഹാരങ്ങൾ കൺ മുന്നിലെത്തുമ്പോൾ ഭാരം കുറയ്ക്കുന്നതിനെക്കുറിച്ച് സൗകര്യപൂർവ്വം മറക്കാറുണ്ട് മിക്കവരും. ആവശ്യത്തിന് മധുരം കഴിച്ച ശേഷം വീണ്ടും അമിതവണ്ണത്തെക്കുറിച്ച് ആശങ്കപ്പെടും. എന്നാൽ ഒരു കാര്യം ഉറപ്പിച്ചു പറയാം, പഞ്ചസാര എന്നത് വെള്ള നിറമുള്ള വിഷമാണ്. ഇത് നിങ്ങളുടെ ഭാരം വർധിപ്പിയ്ക്കുകയും ഗുരുതരമായ രോഗങ്ങൾക്ക് കാരണമാകുകയും ചെയ്യും. പഞ്ചസാര അമിതമായി ശരീരത്തിൽ എത്തുന്നതോടെ അത് ശരീരത്തിൻറെ മധ്യ ഭാഗത്ത് കൊഴുപ്പടിയുന്നതിന് കാരണമാകും.

വ്യായാമം മുഖ്യം:
ഭക്ഷണം നിയന്ത്രിച്ചതുകൊണ്ടോ ഉറങ്ങിയതുകൊണ്ടോ മാത്രം ഭാരം കുറയ്ക്കാൻ കഴിയില്ല. ഇതോടൊപ്പം കൃത്യമായ വ്യായാമവും ശീലമാക്കണം. എയറോബിക് വ്യായാമങ്ങൾ , നടത്തം, ഓട്ടം, നീന്തൽ തുടങ്ങിയവ നിങ്ങൾ കഴിയ്ക്കുന്ന ഭക്ഷണത്തിലെ കലോറി എരിച്ചു കളയാൻ സഹായിക്കും. ഇതോടൊപ്പം പേശികൾ ബാലപ്പെടുതുന്നതിനുള്ള വ്യായാമങ്ങൾ കൂടി ചെയ്യുകയാണെങ്കിൽ പ്രകടമായ ഫലം തന്നെ ലഭിയ്ക്കും.

സ്നാക്സ് നിർബന്ധമാണോ?
ഇടനേരങ്ങളിൽ സ്നാക്സ് കഴിയ്ക്കുന്നത് പലർക്കും ഒരു ശീലമാകും. എന്നാൽ അശ്രദ്ധമായ രീതിയിൽ സ്നാക്സ് കഴിയ്ക്കുന്നതാണ് അമിതവണ്ണത്തിന് പിന്നിലെ പ്രധാന കാരണങ്ങളിൽ ഒന്ന്. അതായത്, പല തവണ പ്രോസസ് ചെയ്ത സ്നാക്സ് കഴിയ്ക്കുന്നത് ഷുഗർ, കൊളസ്ട്രോൾ എന്നിവ വർദ്ധിയ്ക്കുന്നതിന് കാരണമാകും. എന്നാൽ മധുരം കലരാത്തതും അമിതമായി പ്രോസെസ്സ് ചെയ്യാത്തതുമായ സ്നാക്സ് ഇടനേരങ്ങളിൽ കഴിയ്ക്കുന്നത് അത്ര നല്ല ഫലം നൽകില്ല.

പകരം, സെറീൽസ് , ഓട്സ്, യോഗർട്ട് എന്നിവയുള്ള സ്നാക്സ് കഴിയ്ക്കുന്നതിൽ കുഴപ്പമില്ല. നിങ്ങൾ സ്നാക്സ് കഴിയ്ക്കുമ്പോൾ അതിലെ ഘടകങ്ങൾ എന്താണ് എന്ന് കൃത്യമായി പരിശോധിച്ച് വേണം കഴിയ്ക്കാൻ. അമിത വണ്ണം ഉണ്ടാക്കുന്ന ചേരുവകൾ അടങ്ങിയവ ബുദ്ധിപൂർവ്വം ഒഴിവാക്കുക.

നാരുകൾഅടങ്ങിയ ഭക്ഷണം ഉൾപ്പെടുത്താം:
നല്ല ദഹനം നടക്കാനും മലബന്ധം ഇല്ലാതിരിയ്ക്കാനും വളരെയധികം സഹായിക്കുന്ന ഒന്നാണ് നാരുകൾ അടങ്ങിയ ഭക്ഷണം. ഇത്തരം ശാരീരിക പ്രവർത്തനങ്ങളെ സഹായിക്കുന്നതോടൊപ്പം തന്നെ ബവൽ ക്യാൻസർ പോലുള്ള പ്രശ്നങ്ങളെ പ്രതിരോധിയ്ക്കാനും ഇത് സഹായിക്കും. അതിനാൽ നാരുകൾ അടങ്ങിയ ഭക്ഷണം കൂടുതലായി കഴിയ്ക്കാൻ എല്ലായ്പ്പോഴും ശ്രദ്ധിക്കണം. ഇത്തരം ഭക്ഷണങ്ങൾ കഴിയ്ക്കുന്നത് ശരീരത്തിൽ കൊഴുപ്പും അനാവശ്യ വസ്തുക്കളും അടിഞ്ഞുകൂടുന്നത് തടയുകയും ചെയ്യും. മുഴുധാന്യങ്ങൾ കഴിയ്ക്കുന്നതിലൂടെ ശരീരത്തിന് ആവശ്യമായ അളവിൽ നാരുകൾ ലഭിയ്ക്കും.

ആൽക്കഹോൾ പണി തരും:
കഴിയ്ക്കുന്ന സമയം സന്തോഷം നൽകുന്നു എന്നല്ലാതെ ആൽക്കഹോൾ ഉപയോഗിക്കുന്നതുകൊണ്ട് മറ്റ് ഗുണങ്ങൾ ഒന്നും തന്നെയില്ല. ആൾക്കഹോൾ അടങ്ങിയ ഡ്രിങ്കുകൾ എല്ലാം തന്നെ ഉയർന്ന കലോറി അടങ്ങിയതാണ്. ഇവയിൽ കോള അല്ലെങ്കിൽ ജ്യൂസ് എന്നിവ കലർത്തി കഴിയ്ക്കുമ്പോൾ കലോറി വീണ്ടും വർദ്ധിയ്ക്കും. ഒരിയ്ക്കലും നിങ്ങളുടെ അമിതവണ്ണം കുറയ്ക്കാൻ ഇത് സഹായിക്കില്ല എന്ന് മാത്രമല്ല, കുടവയർ രൂപപ്പെടുന്നതിനും ഭാരം വര്ധിയ്ക്കുന്നതിനും ഇത് വഴിവെയ്ക്കുകയും ചെയ്യും. മാത്രമല്ല, നിങ്ങൾ കഴിയ്ക്കുന്ന ഭക്ഷണത്തിലെയും നിങ്ങളുടെ ശരീരത്തിലെയും വിഷാംശങ്ങൾ നീക്കം ചെയ്യാനും സഹായിക്കുന്ന കരളിന്റെ പ്രവർത്തനത്തെ ആൽക്കഹോൾ ദോഷകരമായി ബാധിയ്ക്കും.