കാഞ്ഞിരപ്പള്ളി > കോട്ടയം എരുമേലിയില് ഉരുള്പൊട്ടല്. മലയോര മേഖലകളായ കീരിത്തോട്ടിലും പാറക്കടവിലുമാണ് വ്യാഴാഴ്ച പുലര്ച്ചെ ഉരുള്പൊട്ടിയത്. മൂന്ന് വീടുകള്ക്ക് കേടുപാടുകള് സംഭവിച്ചു. ആളപായമില്ല. പ്രദേശത്ത് ബുധനാഴ്ച രാത്രി 11 മണിമുതല് ശക്തമായ മഴ പെയ്യുന്നുണ്ടായിരുന്നു.
എരത്വാപ്പുഴ -കണമല ബൈപ്പാസ് റോഡില് മണ്ണിടിഞ്ഞുവീണിട്ടുണ്ട്. വിണ്ടുകീറിയ നിലയിലാണ് റോഡ്. സംരക്ഷണ ഭിത്തികളും പൂര്ണമായും തകര്ന്നു. കണമല തെന്നിപ്ലക്കല് ജോബിന്റെ വീട് തകര്ന്നു. വാഴേപറമ്പില് അച്ചാമ്മയുടെ വീടിന്റെ സംരക്ഷണ ഭിത്തിയടക്കം ഇടിഞ്ഞ് അപകടാവസ്ഥയിലാണ്. പാറക്കടവില് കുന്നപ്പള്ളില് ബാബുവിന്റെ വീടിന്റെയും സംരക്ഷണ ഭിത്തിയിടിഞ്ഞു. കീരിത്തോട് ബെപാസ്സ് റോഡിലെ വീടുകളില് നിര്ത്തിയിട്ടിരുന്ന ഓട്ടോറിക്ഷയും ബൈക്കുകളും മലവെള്ളത്തില് ഒലിച്ചുപോയി.
