മാറി മറിഞ്ഞ ജീവിതശൈലിയിൽ ആഹാരശീലവും പാടെ മാറിയിരിക്കുന്നു. ഇഷ്ടമുള്ള ആഹാരം കൂടുതൽ അളവിലും പതിവായും കഴിക്കുന്നതാണ് മിക്കവരുടെയും രീതി. അതിനിടയിൽ സമീകൃതാഹാരം എന്നൊക്കെ പറഞ്ഞാൽ അതൊക്കെ ശ്രദ്ധിക്കാൻ എവിടെ നേരം?
ആഹാരമെന്നാൽ ആരോഗ്യം
അമിതവണ്ണം, പ്രമേഹം, ഹൃദ്രോഗം, പലതരം അർബുദങ്ങൾ, അസ്ഥിക്ഷയം, ദന്തരോഗം തുടങ്ങിയ പ്രശ്നങ്ങളുടെയെല്ലാം മുഖ്യകാരണം അനാരോഗ്യകരമായ ആഹാരരീതിയും വ്യായാമത്തിന്റെ കുറവുമാണ്. ഇന്നത്തെ പലരുടെയും ആഹാര രീതിയിൽ അന്നജം, പൂരിതകൊഴുപ്പുകൾ, മധുരം, ഉപ്പ് എന്നിവ വളരെയധികമുണ്ട്. അതായത് ഒരു ദിവസം നമ്മൾ അകത്താക്കുന്ന ഊർജം ആവശ്യമുള്ളതിനെക്കാൾ വളരെ കൂടുതലാണ്. അതെ സമയം ആവശ്യത്തിനുള്ള പോഷകങ്ങൾ ഇവ നൽകുന്നുമില്ല. ഇങ്ങനെ ശരീരത്തിലെ അധികമുള്ള ഊർജം കൊഴുപ്പായി മാറി അമിതവണ്ണത്തിന് കാരണമാകുന്നു. അതിനാണ് പോഷകങ്ങൾ കൂടുതൽ അടങ്ങിയ ആഹാരം ശീലമാക്കണമെന്ന് നിർദ്ദേശിക്കപ്പെടുന്നത്.
എന്ത് കഴിക്കണം?
പല തരാം പോഷകങ്ങൾ അടങ്ങിയതാകണം നമ്മുടെ ഭക്ഷണം. പോഷകാഹാരമെന്നാൽ പ്രോട്ടീൻ, കൊഴുപ്പ്, വിറ്റാമിനുകൾ, ധാതുക്കൾ, കാർബോഹൈഡ്രേറ്റ് എന്നിവയെല്ലാം ചേർന്നതാവണം. ഇവ ഉണ്ടെങ്കിൽ മാത്രമേ ഒരു ദിവസം ശരീരത്തിന് പ്രവർത്തിക്കാനാവശ്യമായ ഘടകങ്ങൾ ലഭിക്കുന്നുവെന്ന് ഉറപ്പാക്കാനാകൂ.
നമുക്ക് വേണ്ട പ്രോട്ടീൻ ലഭിക്കുന്നത് മാംസം, മുട്ട, മത്സ്യം, ബീൻസ്, പയറുകൾ, പരിപ്പുകൾ, കടല മുതലായവയിൽനിന്നാണ്. മാംസം ഉപയോഗിക്കുേമ്പാൾ തൊലികളഞ്ഞ ചിക്കൻ പോലുള്ളവയാണ് നല്ലത്. മാട്, ആട്, പന്നി മുതലായവയിൽ കൊഴുപ്പ് അധികമാണ്. അതിനാൽ ഇവയുടെ ഉപയോഗം കുറയ്ക്കുന്നതാകും ഉചിതം. അല്ലെങ്കിൽ ഇവ പാകം ചെയ്യുന്നതിനുമുമ്പ് കഴിയുന്നത്ര കൊഴുപ്പ് നീക്കം ചെയ്യുക. എണ്ണ, തേങ്ങ, വെണ്ണ, നെയ്യ്, ഉപ്പ് ഇവയുടെ ഉപയോഗം മിത്തമാക്കാം. ബേക്കിങ്, ബ്രോയ്ലിങ്, ഗ്രില്ലിങ്, നോൺസ്റ്റിക് പാൻ ഉപയോഗിച്ച് എണ്ണകുറച്ച് ചെയ്യാവുന്ന പാചക രീതികൾ പരീക്ഷിക്കാം.
നല്ല ആഹാരശീലവും രോഗപ്രതിരോധശേഷിയും
രോഗങ്ങളെ തടയാൻ മികച്ച രോഗ പ്രതിരോധ ശേഷിയുണ്ടെങ്കിൽ കഴിയും, കൊവിഡ് പോലുള്ള പകർച്ചവ്യാധികൾ പലതും തോറ്റുപോകുന്നത് ഒരാളുടെ ശരീരത്തിന്റെ പ്രതിരോധശേഷിയ്ക്ക് മുൻപിലാണ്. ഏത് രോഗകാരി വന്നാലും പ്രതിരോധ ശക്തിയുള്ള ഒരു ശരീരത്തിൽ ഒന്നും ചെയ്യാനാവില്ല. പോഷകാഹാരം കഴിക്കുക എന്നത് തന്നെയാണ് പ്രതിരോധ ശക്തി മെച്ചപ്പെടുത്താനുള്ള എളുപ്പ വഴി.
പോഷകഗുണങ്ങൾ കൂടുതൽ വേണം
നിങ്ങൾ ചെയ്യേണ്ടത് ഒരു ദിവസത്തെ ഭക്ഷണത്തിന്റെ അളവ് കുറയ്ക്കുകയും നിശ്ചിത പോഷക ഘടകങ്ങൾ അടങ്ങിയിട്ടുണ്ടെന്ന് ഉറപ്പ് വരുത്തുകയുമാണ്. ഈ കൊവിഡ് കാലത്ത് മിക്ക ആളുകളും വീടുകളിൽ തന്നെയാണ് കഴിയുന്നത്. അതിനാൽ വ്യത്യസ്ത വിഭവങ്ങൾ കഴിക്കാനുള്ള ആഗ്രഹം വർധിക്കും. മിക്കപ്പോഴും രുചികരമായ വിഭവങ്ങൾ തന്നെ കഴിക്കുന്ന അവസ്ഥ വരുന്നതോടെ ആരോഗ്യത്തിന് ദോഷകരമായ ഭക്ഷണങ്ങളാണ് കൂടുതലായി കഴിക്കുക. ഇത് പ്രതിരോധ ശേഷി കുറയ്ക്കുന്നതിലേക്കും ആരോഗ്യം മോശമാകുന്നതിലേയ്ക്കും ശരീരഭാരം കൂടുന്നതിലേയ്ക്കും നയിക്കും.
പ്രോബയോട്ടിക്സ്
ദഹനം മെച്ചപ്പെടുത്താൻ സഹായിക്കുകയും ശരീരത്തിന്റെ മെറ്റബോളിക് പ്രവർത്തനങ്ങൾ വേഗത്തിലാക്കാൻ സഹായിക്കുകയും ചെയ്യുന്ന ഒന്നാണ് പ്രോബയോട്ടിക്സ്. പുളിപ്പിച്ച ഭക്ഷണങ്ങൾ കഴിക്കുന്നത് വഴി ധാരാളം പ്രോബയോട്ടിക്സ് ശരീരത്തിലെത്തും. ഇത് കുടലിലെ വിഷാംശങ്ങളെ പുറംതള്ളാൻ സഹായിക്കും. ഇങ്ങനെ കുടലിന്റെ ആരോഗ്യം മെച്ചപ്പെടുന്നത് വഴി ശരീരത്തിന്റെ പ്രതിരോധ ശക്തി മെച്ചപ്പെടും.
പച്ചക്കറികളും പഴങ്ങളും
നിത്യവും പഴങ്ങളും പച്ചക്കറികളും കഴിക്കുന്നത് ആരോഗ്യത്തിനു വളരെ നല്ലതാണ്. പഴങ്ങൾ മുഴുവനായോ ജ്യൂസ്‌ രൂപത്തിലോ കഴിക്കാം. ഇതുകൂടാതെ തൈര് ചേർത്തോ അല്ലാതെയോ വിവിധ സലാഡുകളുടെ രൂപത്തിലും പച്ചക്കറികൾ കൂടുതലായി കഴിക്കാം. ഓരോ കാലത്തും ലഭ്യമാകുന്ന പഴങ്ങളും പച്ചക്കറികളും ധാരാളമായി ഉൾപ്പെടുത്താൻ ശ്രമിക്കണം.
മിക്ക ആളുകളുടെയും പ്രധാന ആഹാരം ധാന്യങ്ങളാണ്. അന്നജം പ്രദാനം ചെയ്യുന്ന അളവിൽ കവിഞ്ഞ് കഴിക്കുന്ന പതിവ് നിർത്തണം. പാത്രത്തിന്റെ നാലിലൊന്ന് ഭാഗം മാത്രം ഇവ കഴിക്കായി എടുക്കുക. തവിടുകളയാത്ത അരി, ഗോതമ്പ്, ചോളം, റാഗി, ഓട്സ് മുതലായവ ഉപയോഗിക്കുന്നതാണ് ഉത്തമം. തവിടു കളയുേമ്പാൾ നാരുകൾ അടക്കമുള്ള ഒരുപാട് പോഷകങ്ങൾ കുറയുന്നു. പാത്രത്തിെൻറ പകുതി പച്ചക്കറികളും ഫലവർഗങ്ങളും എടുക്കുക. ബാക്കി കാൽഭാഗത്ത് മത്സ്യം, മാംസം, പയറുവർഗങ്ങൾ എന്നിവ ഉൾപ്പെടുത്തുക. ഒപ്പം ഒരു പാലുൽപന്നവും കൂടിയാകുേമ്പാൾ അത് സമീകൃതാഹാരമായി മാറും. ആഴ്ചയിൽ മൂന്ന് ദിവസമെങ്കിലും മത്സ്യങ്ങൾ ഭക്ഷണത്തിൽ ഉപയോഗിക്കാനായി ശ്രമിക്കണം.
