മക്കൾ ഉപയോഗിക്കുന്ന ആൻഡ്രോയിഡ് ഫോണുകൾ മാതാപിതാക്കൾക്ക് എവിടെയിരുന്നും നിയന്ത്രിക്കാൻ സാധിക്കുന്ന പുതിയ ആപ്ലിക്കേഷൻ ഗൂഗിൾ പുറത്തിറക്കി. ഫാമിലി ലിങ്ക് എന്നാണ് ഇതിന് പേര്. അമേരിക്കയിലാണ് ആപ്ലിക്കേഷൻ പുറത്തിറക്കിയിരിക്കുന്നത്. എല്ലാ മാതാപിതാക്കൾക്കും പ്രത്യേകം ക്ഷണമില്ലാതെ ഫാമിലി ലിങ്ക് ആപ്പ് ലഭ്യമാവും.
ആൻഡ്രോയിഡ് കിറ്റ്കാറ്റ് 4.4 ന് മുകളിലുള്ള എല്ലാ പതിപ്പുകളിലും ഐഓഎസ് 9 ന് ശേഷമുള്ള എല്ലാ പതിപ്പുകളിലും ഫാമിലി ലിങ്ക് ആപ്പ് പ്രവർത്തിക്കും.
മാതാപിതാക്കൾക്ക് ഫാമിലി ലിങ്ക് ആപ്പിലൂടെ ഒരു ഗൂഗിൾ അക്കൗണ്ട് ഉപയോഗിച്ച് മക്കളുടെ ആൻഡ്രോയിഡ് ഫോണുകൾ കൈകാര്യം ചെയ്‌യാം. ഗൂഗിൾ അക്കൗണ്ട് ഉണ്ടാക്കി കഴിഞ്ഞാൽ ഫാമിലി ലിങ്ക് ഓട്ടോമാറ്റിക് ആയി മക്കളുടെ ഫോണിൽ ഇൻസ്റ്റാൾ ആവും. അതിന് ശേഷം കുട്ടികളുടെ ഫോണിൽ എതെല്ലാം ആപ്പുകൾ വേണം സെറ്റിങ്സ് എങ്ങനെ ആയിരിക്കണം എന്നീ കാര്യങ്ങളെല്ലാം മാതാപിതാക്കൾക്ക് തീരുമാനിക്കാം.
കുട്ടികൾ പ്ലേസ്റ്റോറിൽ നിന്നും ഡൗൺലോഡ് ചെയ്‌യുന്ന ആപ്ലിക്കേഷനുകൾ ബ്ലോക്ക് ചെയ്‌യാനും ഫാമിലി ലിങ്ക് വഴി സാധിക്കും. ഏതെല്ലാം ആപ്ലിക്കേഷനുകളാണ് മക്കൾ ഉപയോഗിക്കുന്നത്. എത്രനേരം ഫോൺ ഉപയോഗിക്കുന്നുണ്ട് തുടങ്ങിയ വിവരങ്ങൾ ഈ ആപ്പ് വഴി മാതാപിതാക്കൾക്ക് അറിയാൻ സാധിക്കും.
കുട്ടികൾ പഠിക്കുന്ന സമയത്തും കളിക്കുന്ന സമയത്തുമെല്ലാം ഫോൺ ദൂരെ നിന്നു കൊണ്ട് തന്നെ ലോക്ക് ചെയ്‌യാനുള്ള സൗകര്യവും ഫാമിലി ലിങ്ക് ഒരുക്കുന്നുണ്ട്. ഫാമിലി ലിങ്ക് ആപ്പ് വഴിയുള്ള മാതാപിതാക്കളുടെ ഇത്തരം ഇടപെടലുകളെ കുറിച്ചുള്ള വിവരങ്ങൾ കുട്ടികളുടെ ഫോണിൽ കാണാനും സാധിക്കും.
