ഈ കഴിഞ്ഞ മാർച്ച് അവസാനം ജോബ് കീപ്പർ വേതന സബ്‌സിഡി നിർത്തലാക്കിയതിനു സർക്കാരിനെതിരെ ശക്തമായ വിമർശനം പൊതുസമൂഹത്തിൽ നിന്നും ഉയർന്നു നിൽക്കുന്ന സാഹചര്യത്തിൽ തന്നെ, ഓസ്‌ട്രേലിയയിലെ ഏറ്റവും ജനസംഖ്യയുള്ള രണ്ടാമത്തെ നഗരമായ മെൽബണിലെ 5 ദശലക്ഷത്തിലധികം നിവാസികളുടെ ‘ലോക്ക്ഡൌൺ തടവ്’ ഒരാഴ്ച കൂടി നീട്ടിയതിനെ തുടർന്നാണ് ഈ പ്രഖ്യാപനം നടത്താൻ ആസ്‌ട്രേലിയൻ പ്രധാനമന്ത്രി തയ്യാറായത്.
“താൽക്കാലിക കോവിഡ് ഡിസാസ്റ്റർ പേ” എന്ന് വിളിക്കപ്പെടുന്ന ഈ സഹായ പദ്ധതി ആഴ്ചയിൽ 20 മണിക്കൂറിൽ കൂടുതൽ ജോലി ചെയ്യുന്ന ആളുകൾക്ക് AUD 500 ഓസ്‌ട്രേലിയൻ ഡോളർ വീതവും , പാർട്ട് ടൈം ജോലി ചെയ്യുന്നവർക്ക് AUD 325 ഓസ്‌ട്രേലിയൻ ഡോളർ വീതവും ആയിരിക്കും ലഭിക്കുക.
ഈ പേയ്‌മെന്റ് “ഓസ്‌ട്രേലിയയിൽ വർക്ക് പെർമിറ്റ് ഉള്ള വ്യക്തിക്കോ, ഓസ്‌ട്രേലിയൻ സ്‌ഥിര താമസക്കാരനോ, ഓസ്‌ട്രേലിയൻ പൗരനോ ലഭ്യമാകും”, എന്നാൽ ഈ സഹായം ലഭിക്കാൻ കുറഞ്ഞത് 17 വയസ്സ് പ്രായമുണ്ടാകേതുണ്ടെന്നും പ്രധാനമന്ത്രി സ്‌കോട്ട് മോറിസൺ കാൻബെറയിൽ മാധ്യമപ്രവർത്തകരോട് പറഞ്ഞു. ഈ സഹായം ന്യൂസിലൻഡ് നൽകുന്നതിന് സമാനമാണെന്നും അദ്ദേഹം കൂട്ടിച്ചേർത്തു.
ഈ ഗ്രാന്റുകൾക്ക് ആഴ്ചയിൽ ഒരു ലക്ഷം സ്വീകർത്താക്കൾക്ക് 50 ദശലക്ഷം ഡോളർ ചെലവാകുമെന്ന് ഓസ്‌ട്രേലിയ കണക്കാക്കുന്നു.
910 മരണങ്ങൾ ഉൾപ്പെടെ 30,000 ത്തിലധികം കോവിഡ് -19 അണുബാധകൾ റിപ്പോർട്ട് ചെയ്ത ഓസ്‌ട്രേലിയ, കോവിഡിനെ നിർവ്വീകരിച്ചു രാജ്യത്തെ സുരക്ഷിതമായ സോണിൽ ആക്കിയതോടെ , രാജ്യത്തെ തൊഴിലാളികൾക്കും , ബിസിനസുകാർക്കും ആശ്വാസകരമായ രീതിയിൽ ജനജീവിതത്തെ തിരിച്ചുകൊണ്ടുവരാനുള്ള തീവ്ര യത്നത്തിലാണ് . 2020 മാർച്ച് മുതൽ അന്താരാഷ്ട്ര അതിർത്തികൾ അടച്ചിട്ടും, ഫലപ്രദമായ ലോക്ഡൌൺ/കോവിഡ് ടെസ്റ്റുകൾ നടത്തിയും കോവിഡിനെ ഉന്മൂലനം ചെയ്യാൻ ഓസ്‌ട്രേലിയക്ക് കുറച്ചു നാളുകൾക്ക് മുൻപ് സാധിച്ചിരുന്നു . ഏറെക്കുറെ ആശങ്ക ഒഴിഞ്ഞു നിൽക്കുന്ന സാഹചര്യമായിരുന്നിട്ടും വിക്ടോറിയയിൽ മൂന്നാഴ്ച മുൻപായി കോവിഡ് -19 ന്റെ പുതിയ വകഭേദം വിദേശത്തു നിന്നും വന്ന ഓസ്‌ട്രേലിയൻ നിവാസി മുഖാന്തിരം പൊട്ടിപ്പുറപ്പെട്ടു.
