നിർജ്ജലീകരണം നിങ്ങളുടെ ചർമ്മത്തിന് ഉൾപ്പടെ ശരീരത്തിൽ പല വിധത്തിലുള്ള നാശമുണ്ടാക്കുകയും ധാരാളം ചർമ്മ പ്രശ്നങ്ങൾ ഉണ്ടാക്കുകയും ചെയ്യും. എന്നാൽ നിങ്ങൾ വെള്ളം മാത്രം കുടിച്ചാൽ പോരാ, ഉന്മേഷദായകമായ ചില വേനൽക്കാല പാനീയങ്ങളും ഉണ്ട്! അതേക്കുറിച്ച് കൂടുതലറിയാൻ തുടർന്ന് വായിക്കാം!
1. നാരങ്ങാ വെള്ളം
നാരങ്ങാവെള്ളം നമ്മുടെ ശരീരത്തിനെയും മനസ്സിനെയും ഉന്മേഷദായകമാക്കാൻ സഹായിക്കുമെന്നതിൽ സംശയമൊന്നുമില്ല – ചൂട് കൂടുതലുള്ള വേളകളിൽ തണുത്ത നാരങ്ങാവെള്ളം കുടിക്കാൻ മിക്ക ആളുകളും വളരെയധികം ഇഷ്ടപ്പെടുന്നില്ലേ? ഫ്രീ റാഡിക്കലുകൾക്കെതിരെ പോരാടുന്ന വിറ്റാമിൻ സി, ആന്റിഓക്‌സിഡന്റുകൾ എന്നിവയുടെ സമ്പന്നമായ ഉറവിടമായ നാരങ്ങകൾ നിങ്ങളുടെ രക്തത്തെ ശുദ്ധീകരിക്കാനും പുതിയ രക്താണുക്കളുടെ വളർച്ചയെ പ്രോത്സാഹിപ്പിക്കാനും സഹായിക്കുന്നു, ഇത് ചർമ്മത്തിന് തിളക്കവും ഭംഗിയും നൽകാൻ സഹായിക്കുന്നു. മാത്രമല്ല, ഇത് മുഖത്ത് നിന്ന് അനാവശ്യ എണ്ണ നീക്കം ചെയ്യുകയും വാർദ്ധക്യത്തിന്റെ അകാല ലക്ഷണങ്ങളായ ചുളിവുകൾ, നേർത്ത വരകൾ എന്നിവ ഒഴിവാക്കുകയും ചെയ്യുന്നു.
2. പച്ച മാങ്ങ ജ്യൂസ് (ആം പന്ന)
ശരീരത്തിന് മാത്രമല്ല, ചർമ്മത്തിനും ധാരാളം ഗുണങ്ങൾ നൽകുന്ന വേനൽക്കാല പാനീയങ്ങളിൽ ഒന്നാണ് പച്ച മാങ്ങ കൊണ്ട് തയ്യാറാക്കുന്ന ഈ പാനീയം. ഇത് തൽക്ഷണം നിങ്ങൾക്ക് ഊർജ്ജം പകരുന്നു, മാത്രമല്ല വേനൽക്കാലത്ത് ചൂടിൽ നിന്ന് നിങ്ങളെ സംരക്ഷിക്കുകയും ചെയ്യുന്നു. കൂടാതെ, വിറ്റാമിൻ എ, സി, ഇരുമ്പ്, ഫോളേറ്റുകൾ, തുടങ്ങി നിങ്ങളുടെ മൊത്തത്തിലുള്ള ചർമ്മ ആരോഗ്യത്തെ സഹായിക്കുന്ന ആരോഗ്യകരമായ നിരവധി പോഷകങ്ങൾ ഇതിൽ അടങ്ങിയിട്ടുണ്ട്. ഉള്ളിൽ നിന്ന് ചർമ്മത്തെ മെച്ചപ്പെടുത്താൻ ഇത് മികച്ചതാണ്.
പച്ചമാങ്ങ നന്നായി വേവിച്ചെടുത്ത ശേഷം അതിന്റെ തൊലി നീക്കം ചെയ്ത് പൾപ്പ് വേർതിരിച്ചെടുക്കുക. ഇതിലേയ്ക്ക് പുതിനയിലയും അല്പം പഞ്ചസാരയും ചേർത്ത് മിക്സിയിൽ നന്നായി അടിച്ചെടുക്കണം. ഈ പേസ്റ്റിലേയ്ക്ക് അല്പം ഉപ്പ്, ജീരകപ്പൊടി, ഏലയ്ക്കാപ്പൊടി, കുരുമുളക് പൊടി എന്നിവ ചേർത്ത് നന്നായി യോജിപ്പിക്കാം. ഈ മിക്സിൽ നിന്ന് അല്പമെടുത്ത് ആവശ്യത്തിന് വെള്ളത്തിൽ ചേർത്തിളക്കി കുടിക്കാം. ഇത് ഒരു മികച്ച സമ്മർ ഡ്രിങ്ക് ആണ്.
3. മോരുംവെള്ളം
ഏറ്റവും ഉത്തമമായ വേനൽക്കാല പാനീയങ്ങളിൽ ഒന്നാണ് മോര്. ചർമ്മത്തെ ആരോഗ്യകരമായി നിലനിർത്താൻ സഹായിക്കുന്ന ഒരു ശാന്തമായ പാനീയമാണിത്. കൂടാതെ, അതിൽ ലാക്റ്റിക് ആസിഡും പ്രകൃതിദത്ത പ്രോബയോട്ടിക്കും ധാരാളം അടങ്ങിയിട്ടുണ്ട്. എന്തിനധികം, ഇത് ചർമ്മത്തിന് ഈർപ്പം പകരുകയും ചർമ്മത്തെ തിളക്കമാർന്നതാക്കുകയും ചെയ്യുന്നു. അങ്ങനെ പ്രായമാകൽ പ്രക്രിയ വൈകിപ്പിക്കുന്നു. ജീരകവും കറിവേപ്പിലയും അടങ്ങിയ ഒരു മോര് അല്ലെങ്കിൽ സംഭാരം നിങ്ങളുടെ ചർമ്മത്തിലെ പ്രശ്നങ്ങൾ പരിഹരിക്കുന്നതിനുള്ള മികച്ച പാനീയമാണ്.
4. ലസ്സി
ഈ പാനീയത്തിനും അതിന്റെ പ്രാഥമിക ഘടകമായി തൈര് അടങ്ങിയിരിക്കുന്നു! ചർമ്മത്തെ പോഷിപ്പിക്കാനും ആരോഗ്യകരമായി നിലനിർത്താനും സഹായിക്കുന്ന അവശ്യ വിറ്റാമിനുകളും ധാതുക്കളും ലസ്സിയിൽ അടങ്ങിയിട്ടുണ്ട്. ലാക്റ്റിക് ആസിഡിന്റെ സമ്പന്നമായ ഉറവിടമാണിത്, ഇത് ചർമ്മത്തിൽ നിന്ന് കളങ്കങ്ങൾ നീക്കം ചെയ്യാൻ സഹായിക്കുന്നു. മാത്രമല്ല, ഇത് ചർമ്മത്തെ മൃദുവുമാക്കുന്നു. പ്രോട്ടീൻ, കാൽസ്യം, വിറ്റാമിൻ ഡി എന്നിവ അടങ്ങിയ ഒരു ഗ്ലാസ് ലസ്സിക്ക് നിങ്ങളുടെ ചർമ്മത്തിന്റെ നിറം മെച്ചപ്പെടുത്താനും മുഖക്കുരു കുറയ്ക്കാനും കഴിയും.
