എന്താണ് പ്രോണിങ്ങ്?
വളരെ ശാസ്ത്രീയമായതും കൃത്യവുമായ രീതിയിൽ രോഗിയുടെ ശരീരത്തെ ഘട്ടം ഘട്ടമായി കമിഴ്ത്തി കിടത്തുന്ന രീതിയാണ് പ്രോണിങ്ങ്. മലർന്ന് കിടക്കുന്ന അവസ്ഥയിൽ നിന്ന് വളരെ സൂക്ഷ്മതയോടെ വേണം കമിഴ്ന്നു കിടക്കാൻ. ശരീരത്തിലെ ഓക്സിജനേഷൻ മെച്ചപ്പെടുത്താനും ശ്വസന പ്രശ്നങ്ങൾ ഇല്ലാതാക്കാനും ഈ രീതി ഏറെ ഉപകാരപ്രദമാണെന്ന് ആരോഗ്യ വിദഗ്ദർ സാക്ഷ്യപ്പെടുത്തിയിട്ടുണ്ട്. പ്രത്യേകിച്ച് വീടുകളിൽ കഴിയുന്ന കൊവിഡ് പോസിറ്റിവ് ആയ ആളുകൾ തീർച്ചയായും ഈ രീതികൾ അറിഞ്ഞിരിയ്ക്കണം.
പ്രോണിങ്ങ് ചെയ്യുന്നതിൻറെ ഗുണങ്ങൾ:
*ശ്വസന പ്രക്രിയ വലിയ രീതിയിൽ മെച്ചപ്പെടുത്തും
*ശരീരത്തിന് ആവശ്യമായ ഓക്സിജൻ സ്വാംശീകരിയ്ക്കാൻ പാകത്തിൽ ആൽവിയോളർ യൂണിറ്റുകൾ തുറക്കുകയും ഓക്സിജൻ ലെവൽ വർധിപ്പിയ്ക്കുകയും ചെയ്യും.
*ശരീരത്തിലെ ഓക്സിജൻ നില 94 ന് താഴെ പോയാൽ മാത്രമേ പ്രോണിങ്ങ് ചെയ്യേണ്ട ആവശ്യമുള്ളൂ.
*ദിവസവും രണ്ടു നേരം ഓക്സിജൻ നില പരിശോധിയ്ക്കുന്നതോടൊപ്പം തന്നെ ശരീരത്തിൻറെ താപനില, രക്ത സമ്മർദ്ദം, പ്രമേഹം തുടങ്ങിയവയും കൃത്യമായി കണക്കാക്കുന്നത് ആരോഗ്യനിലയിൽ വരുന്ന നേർത്ത വ്യത്യാസം പോലും അറിയാൻ കഴിയും.
*ഓക്സിജൻ ഒഴുക്കിൻറെ താളം വ്യത്യാസപ്പെടുന്ന അവസ്ഥയായ ഹൈപോക്സിയ രോഗിയുടെ നില സങ്കീർണമാക്കും
സ്വയം പ്രോണിങ്ങ് ചെയ്യുന്നതിന് നാലോ അഞ്ചോ തലയിണകൾ ആവശ്യമാണ്‌. കൂടാതെ കിടക്കുന്ന രീതി കൃത്യമായ ഇടവേളകളിൽ മാറ്റണം. ഒരേ രീതിയിൽ 30 മിനിറ്റിൽ അധികം തുടരുന്നത് നല്ലതാവില്ല. അതുകൊണ്ട് തന്നെ ഓരോ 30 മിനിറ്റിനു ശേഷവും കിടക്കുന്ന രീതി മാറ്റണം.
നിങ്ങൾക്ക് സ്വയം എങ്ങനെ ചെയ്യാം? വീഡിയോ കാണാം
ചെയ്യേണ്ട രീതി:
1. ഈ രീതി ചെയ്യുമ്പോൾ ഒന്നോ രണ്ടോ തലയിണകൾ നെഞ്ചിനും തുടകളുടെ മുകൾ വശത്തുമായി വെയ്ക്കണം. അതായത്, സ്ഥാപിച്ചിരിക്കുന്ന തലയിണയുടെ മുകളിൽ കമിഴ്ന്നു കിടക്കുമ്പോൾ, കൈകൾ വയറിനടിയിലൂടെ കടന്നു പോകാൻ പാകത്തിനായിരിക്കണം. ഒരെണ്ണം കഴുത്തിന് താഴെയും മറ്റൊന്ന് കണങ്കാലിന് താഴെയും സ്ഥാപിക്കാം.
ആദ്യം, തലയിണയുടെ മുകളിലൂടെ കമിഴ്ന്നു കിടക്കണം, ശരീരം നിവർത്തിവെച്ച രീതിയിലാകണം ഇത്. അല്പസമയത്തിന് ശേഷം ബുദ്ധിമുട്ട് തോന്നുന്നെങ്കിൽ, കൈകളുടെ സ്ഥാനം മാറ്റാം (വീഡിയോ ശ്രദ്ധിക്കുക). മുപ്പത് മിനിറ്റ് മുതൽ രണ്ട് മണിക്കൂർ വരെ ഈ രീതിയിൽ കിടക്കാം.
2. അടുത്ത പൊസിഷനിൽ ഒരു കാൽ മറ്റൊന്നിന് മുകളിൽ വെച്ച് ഇടത് വശത്തേയ്ക്ക് ചെരിഞ്ഞ് കിടക്കാം. തലയിണകൾ ഈ രീതി ചെയ്യുമ്പോൾ ആവശ്യമില്ല. ആവശ്യമെങ്കിൽ ഒരു തലയിണ തലയുടെ താഴെ വെക്കാം. അതും നിർബന്ധമില്ല. ഈ രീതിയും മുപ്പത് മിനിറ്റ് മുതൽ രണ്ട് മണിക്കൂർ ചെയ്യാം.
3. ഇതേ രീതി ഇനി വലതു വശത്തും ആവർത്തിക്കാം.
4. ഇനി ആദ്യത്തെ പൊസിഷനിലേയ്ക്ക് മടങ്ങി, തലയിണകൾക്ക് മുകളിലൂടെ കമിഴ്ന്നു കിടക്കാം.
5. അവസാമനായി, കാലുകൾ നീട്ടി എഴുന്നെറ്റിരിക്കണം. തോളുകൾ പരമാവധി വിരിച്ച് പുറകോട്ട് അല്പം ചെരിഞ്ഞ് ഇരിക്കണം, പുറകിൽ ആവശ്യമെങ്കിൽ സപ്പോർട്ടിന് തലയിണകൾ ഉപയോഗിക്കാം. ഇല്ലെങ്കിൽ കൈകൾ പുറകോട്ട് നിലത്ത് കുത്തി വെച്ച് ശരീരത്തിന് സപ്പോർട്ട് നൽകാം.
ശ്രദ്ധിക്കേണ്ട കാര്യങ്ങൾ:
*ഭക്ഷണം കഴിച്ച ശേഷം ഒരു മണിക്കൂറിനുള്ളിൽ പ്രോണിങ്ങ് ചെയ്യാതിരിയ്ക്കാൻ ശ്രദ്ധിയ്ക്കുക.
*ശരീരത്തിന് വലിയ ആയാസമുണ്ടാക്കുന്ന രീതിയിൽ പ്രോണിങ്ങ് ചെയ്യാൻ ശ്രമിയ്ക്കരുത്. സൗകര്യപ്രദമായ അവസ്ഥയിൽ മാത്രം ചെയ്യുക.
*ദിവസത്തിൽ പല തവണകളായി പരമാവധി 16 തവണ വരെ ഒരാൾക്ക് പ്രോണിങ്ങ് ചെയ്യാവുന്നതാണ്
*സമ്മർദ്ദം കൂടുതലായി വരുന്ന ഭാഗങ്ങളിൽ സൗകര്യപ്രദമായ രീതിയിൽ തലയിണകൾ ക്രമീകരിച്ച് വേണം പ്രോണിങ്ങ് ചെയ്യാൻ.
*പ്രോണിങ്ങ് ചെയ്യുന്നതിനിടെ ശരീര ഭാഗങ്ങളിൽ എവിടെയെങ്കിലും വേദന അനുഭവപ്പെടുന്നുണ്ടെങ്കിൽ സൗകര്യപ്രദമായ മാറ്റങ്ങൾ വരുത്താൻ ശ്രദ്ധിക്കണം.
പ്രോണിങ്ങ് ഒഴിവാക്കേണ്ട സാഹചര്യങ്ങൾ:
*പ്രധാനപ്പെട്ട ഹൃദ്രോഗ പ്രശ്നങ്ങൾ അനുഭവിക്കുമ്പോൾ
*ഗർഭകാലത്ത്
*നട്ടെല്ലിനോ തുടയെല്ലിനോ എന്തെങ്കിലും പരിക്കുകളോ പ്രശ്നങ്ങളോ സംഭവിയ്ക്കുമ്പോൾ
*48 മണിക്കൂറിന് ഉള്ളിൽ ഡീപ് വെനസ് ത്രോംബോസിസിന് ചികിത്സ തേടിയ ആളുകൾ
(കേന്ദ്ര ആരോഗ്യ കുടുംബ ക്ഷേമ മന്ത്രാലയം പുറത്തുവിട്ട മാർഗ നിർദ്ദേശം. പുതിയതായി പുറത്ത് വരുന്ന ശാസ്ത്രീയ വിവരങ്ങളുടെ അടിസ്ഥാനത്തിൽ ഈ രീതികളിൽ മാറ്റങ്ങൾ ഉണ്ടായേക്കാം.)
