കുട്ടികളിലെ അമിതവണ്ണം നിസ്സാരമാക്കരുത്; നേരിടാൻ ചില മാർഗ്ഗങ്ങൾ

കുട്ടികളുടെ കാര്യത്തിൽ തടിയല്പ്പം കൂടിയാൽ ആരുമത് അത്രതന്നെ വലിയ കാര്യമായി കണക്കിലെടുക്കാറില്ല. ചെറിയ പ്രായത്തിൽ നന്നായി ഭക്ഷണം കഴിക്കണമെന്നും നന്നായി കഴിച്ചാലേ വളരുകയുള്ളൂ എന്നൊക്കെ പറഞ്ഞ് നമ്മൾ കുട്ടികളെ കൂടുതൽ ഭക്ഷണം കഴിക്കാൻ കഴിക്കാൻ പ്രേരിപ്പിക്കുന്നു. കുട്ടിക്കാലത്തെ അമിതവണ്ണം പലർക്കും ഭാവിയിൽ വിട്ടുമാറാത്ത പല രോഗങ്ങൾക്കുള്ള ഒരു കാരണമാകുമെന്നാണ് പറയപ്പെടുന്നു. ഒരു പ്രായം കഴിഞ്ഞാൽ ഒന്നിലധികം വിട്ടുമാറാത്ത രോഗാവസ്ഥകൾക്ക് കാരണമായി നമ്മളെല്ലാം കണക്കാക്കുന്ന ഒരു അപകട ഘടകമാണ് അമിതവണ്ണം. കുട്ടികളുടെ കാര്യത്തിലും അടിയന്തിര ശ്രദ്ധ ആവശ്യമുള്ള ഗുരുതരമായ അവസ്ഥയാണ് കുട്ടിക്കാലത്തെ അമിതവണ്ണം.

ലോകാരോഗ്യ സംഘടനയുടെ അഭിപ്രായത്തിൽ, 21-ാം നൂറ്റാണ്ട് നേരിടുന്ന ഏറ്റവും ഗുരുതരമായ ആഗോള പൊതുജനാരോഗ്യ വെല്ലുവിളികളിലൊന്നാണ് ബാല്യകാലത്തിലെ അമിതവണ്ണം. കേവലം 40 വർഷത്തിനുള്ളിൽ അമിതവണ്ണമുള്ള സ്കൂൾ പ്രായത്തിലുള്ള കുട്ടികളുടെയും കൗമാരക്കാരുടെയും എണ്ണം 10 മടങ്ങ് വർദ്ധിച്ചുവെന്നാണ് കണക്കുകൾ പറയുന്നത്. നിങ്ങളുടെ കുട്ടിയുടെ അമിതവണ്ണത്തെ അവഗണിക്കുകയാണെങ്കിൽ ഇത് കുട്ടിയുടെ ശാരീരികവും മാനസികവും സാമൂഹികവുമായ ക്ഷേമത്തെ പ്രതികൂലമായി ബാധിക്കാനുള്ള സാധ്യതയുണ്ട്.

കുട്ടികളിലെ അമിത വണ്ണത്തിന്റെ അപകടസാധ്യതകളെ തരണം ചെയ്യാനായി നിരവധി നടപടികൾ മാതാപിതാക്കൾക്ക് കൈക്കൊള്ളാനാവും. കുട്ടിയുടെ കാര്യത്തിൽ ആരോഗ്യകരമായ ശരീരഭാരം ഉറപ്പാക്കുന്നതിനായി മാതാപിതാക്കൾ കുട്ടിയുടെ ഭക്ഷണക്രമം, ദൈനംദിന ദിനചര്യകൾ, ശാരീരിക പ്രവർത്തങ്ങളുന്റെ അളവ്, ഉറക്ക സമയം എന്നിവയിൽ കൂടുതൽ ശ്രദ്ധ നൽകണം. നിയന്ത്രിച്ചു നിർത്തുന്നതിൽ ഏറ്റവും പ്രധാന പങ്ക് ഭക്ഷണത്തിന് ആണുള്ളത്. കുട്ടികളിൽ അമിതവണ്ണം ഉണ്ടാകാതിരിക്കാനായി മാതാപിതാക്കൾ ശ്രദ്ധിക്കേണ്ട ചില കാര്യങ്ങൾ ഇതാ.

കുട്ടികളിലെ അമിതവണ്ണം തടയുന്നതിനുള്ള ചില ഡയറ്റ് ടിപ്പുകൾ

1. നല്ല ഭക്ഷണശീലത്തെ പ്രോത്സാഹിപ്പിക്കുക
കുട്ടികൾക്ക് ചെറുപ്പത്തിൽത്തന്നെ അമിതഭാരത്തിൻ്റെ സാധ്യതയും ഉയർന്ന കൊളസ്ട്രോൾ നിലയും ലഭിക്കാതിരിക്കാനായി ആരോഗ്യകരമായ ഭക്ഷണശീലം വീട്ടിൽ തന്നെ പ്രോത്സാഹിപ്പിക്കണം. മുഴുവൻ കുടുംബവും ആരോഗ്യകരമായ ഭക്ഷണം കഴിച്ചു കൊണ്ടുവേണം ഇത് മുന്നോട്ടുകൊണ്ടു പോകാൻ. കൊളസ്ട്രോൾ സാധ്യത കൂടുതലുള്ള ഭക്ഷണം കഴിക്കുന്നത് വളർച്ചയുടെ പല കാലഘട്ടങ്ങളിലും കുട്ടികളിലെ രോഗ സാധ്യതകൾ വർദ്ധിപ്പിക്കും.

2. കുട്ടികൾ ജങ്ക് ഫുഡുകൾ കഴിക്കുന്നതിൽ നിയന്ത്രണം വയ്ക്കുക
കുട്ടികൾക്ക് എപ്പോഴും കഴിക്കാൻ ഇഷ്ടം വറുത്തതും പൊരിച്ചതുമായവ തന്നെയാണ് എന്ന് ഉറപ്പാണ്. ചിപ്സുകൾ, ചോക്ലേറ്റുകൾ, ഫ്രൈ ഫുഡുകൾ, എയറേറ്റഡ് പാനീയങ്ങൾ എന്നിവ പോലുള്ള ജങ്ക് ഫുഡുകൾ കയ്യിൽ കിട്ടിയാൽ തന്നെ അവർ അകത്താക്കും. ഇവയെല്ലാം ട്രാൻസ് ഫാറ്റ്, ഓക്സിജനേറ്റസ് എണ്ണകൾ തുടങ്ങിയവയെല്ലാം കൊണ്ട് നിറഞ്ഞിരിക്കുന്നു. ജങ്ക് ഫുഡ് അമിതമായി കഴിക്കുന്ന കുട്ടികൾക്ക് പലപ്പോഴും ചെറുപ്രായത്തിൽ തന്നെ ഗ്യാസ്ട്രിക് പ്രശ്‌നങ്ങൾ കൂടെ വരുന്നുണ്ടെന്ന് കണക്കാക്കപ്പെടുന്നു.

3. ആരോഗ്യകരമായ ലഘുഭക്ഷണ ഓപ്ഷനുകൾ നൽകുക
ഫ്രഷ് ഫ്രൂട്ട് സലാഡുകൾ, നട്സ്, തൈര് തുടങ്ങിയവ പോലുള്ള ആരോഗ്യകരമായ ലഘുഭക്ഷണ ഓപ്ഷനുകൾ ഉപയോഗിച്ചുകൊണ്ട് വറുത്തതും പൊരിച്ചതും പാക്കേജു ചെയ്‌തതുമായ ഭക്ഷണങ്ങളെ മാറ്റിസ്ഥാപിക്കുക. ഉറപ്പായും ഈ ഒരു പ്രവർത്തി നിങ്ങളുടെ കുട്ടികളുടെ ആരോഗ്യ കാര്യത്തിൽ മികച്ച ഗുണങ്ങൾ നൽകുന്നതോടൊപ്പം ഉപാപചയ പ്രവർത്തനങ്ങൾ മികവുറ്റതാക്കുകയും ചെയ്യും.

4. നിങ്ങളുടെ കുട്ടിയെ പ്രോത്സാഹിപ്പിക്കുക
പലതരം ഭക്ഷ്യവിഭവങ്ങൾ നിങ്ങളുടെ കുട്ടിയുടെ ഭക്ഷണശീലത്തിൽ ഉൾപ്പെടുത്തണം. പച്ചക്കറിയും മാംസവും മീനുമെല്ലാം കുട്ടികളുടെ ഭക്ഷണത്തിൽ ഉൾപ്പെടുത്തണം. പ്ലേറ്റിലുള്ളതെല്ലാം കഴിച്ചു തീർക്കുന്ന കുട്ടികൾ ആരോഗ്യമുള്ള ഭക്ഷണ ശീലമുള്ളവരാണ് എന്നവരെ ബോധ്യപ്പെടുത്തുക. നല്ല ആരോഗ്യത്തിനായി എല്ലാ ഭക്ഷണങ്ങളും ഒരുപോലെ പ്രധാനപ്പെട്ടതാണെന്ന് അവരെ അറിയിക്കുക.

5. ഒരു ഉദാഹരണം കാണിച്ചുകൊടുക്കുക
കുട്ടിയുടെ മുന്നിൽ വച്ച് ഒരു ഭക്ഷണത്തോടും അനിഷ്ടം കാണിക്കരുത്. ആരോഗ്യകരമായ ഭക്ഷണം നിങ്ങൾ സ്വയം ആസ്വദിച്ചു കഴിക്കുന്നില്ലെങ്കിൽ ഇത് കാണുന്ന കുട്ടി ആരോഗ്യപ്രദമായ പല ഭക്ഷണങ്ങളും നിരസിക്കാനുള്ള സാധ്യത കൂടുതലാണ്. അതുകൊണ്ടുതന്നെ അവർക്ക് എപ്പോഴും നല്ല മാതൃക കാണിച്ചു കൊടുക്കാൻ മറക്കരുത്

6. അമിതമായി ഭക്ഷണം കഴിക്കാൻ അനുവദിക്കരുത്
കുട്ടികൾക്കായി വിളമ്പേണ്ട ഭക്ഷണത്തിൻ്റെ അളവിൽ എപ്പോഴും ശ്രദ്ധ ഉണ്ടായിരിക്കണം. കൃത്യസമയങ്ങളിൽ കൃത്യമായ അളവിൽ തന്നെ കുട്ടികൾക്ക് ഭക്ഷണം നൽകാനും അത് കഴിക്കാനും അവരെ പരിശീലിപ്പിക്കുക. പല അമ്മമാരും കുട്ടികളെ അമിതമായി ആഹാരം കഴിക്കാൻ പരിശ്രമിപ്പിക്കുന്നു. എന്നാലിത് അനാരോഗ്യകരമായ ഒരു പരിശീലനമാണ്. കാരണം ഈയൊരു പ്രവർത്തി അമിതമായി ശരീരഭാരം വർദ്ധിപ്പിക്കും.

7. ഭക്ഷണം കഴിക്കുമ്പോൾ അശ്രദ്ധയും വിനോദവും ഒഴിവാക്കുക
ഭക്ഷണം കഴിക്കുമ്പോൾ മൊബൈൽ, ടിവി സ്ക്രീനുകളിൽ ഉറ്റുനോക്കാൻ കുട്ടികളെ അനുവദിക്കരുത്. ഇന്നത് ഒരു സാധാരണ ശീലമായി മാറിയിരിക്കുന്നു. ഇത് അങ്ങേയറ്റം അനാരോഗ്യകരമായ പരിശീലനമാണ് എന്ന് തിരിച്ചറിയുക. സ്‌ക്രീനുകളിൽ നോക്കിയിരിക്കുമ്പോൾ കുട്ടിയുടെ ശ്രദ്ധ വ്യതിചലിക്കപ്പെടുകയും അവൻ / അവൾ ഭക്ഷണങ്ങൾ ആവശ്യത്തിൽ കുറവോ കൂടുതലോ കഴിക്കുകയും ചെയ്തേക്കാം. അതിനാൽ തന്നെ ഭക്ഷണം കഴിക്കുമ്പോൾ ടിവി റിമോട്ടും മൊബൈലും ഒക്കെ മാറ്റിവെച്ച് കുടുംബസമേതം ഒരുമിച്ചിരുന്ന് ഭക്ഷണം ആസ്വദിക്കുക.

8 ശാരീരിക വ്യായാമങ്ങൾ പ്രധാനം
മുതിർന്ന വ്യക്തികളെ പോലെ ആരോഗ്യകരമായ ശരീരഭാരം നിലനിർത്താനായി കുറഞ്ഞത് ഒരു മണിക്കൂർ നേരത്തെ ശാരീരിക വ്യായാമ പ്രവർത്തനങ്ങളും കുട്ടിക്ക് പ്രധാനമാണ്. പണ്ടാണെങ്കിൽ കുട്ടികൾ എപ്പോഴും ഓടിച്ചാടി നടക്കുന്നതിനാൽ ഇതൊരു പ്രശ്നമായിരുന്നില്ല. എന്നാൽ ഇന്നത്തെ കാലത്തെ കുട്ടികൾ മൊബൈൽ ഫോണുകളുടെയും കമ്പ്യൂട്ടർ ഗെയിമുകളുടെയും പുറകെയാണ്. ദിവസവും പുറത്തുപോയി കളികളിൽ ഏർപ്പെടുന്നതിനും സ്വയം വിയർക്കുന്നതിനുമൊന്നും സാഹചര്യം ഉണ്ടാവുന്നുമില്ല. അതുകൊണ്ടുതന്നെ ചെറിയ രീതിയിലുള്ള ശാരീരിക വ്യായാമങ്ങൾക്ക് കുട്ടിയെ പ്രോത്സാഹിപ്പിക്കുക.