ദശാവതാരം-കല്പറ്റ നാരായണൻ എഴുതിയ കവിത

“ചിതയിലെരിയുന്നത് ഞാനല്ല എന്നിലെരിയുന്നത് ഞാൻ.” കല്പറ്റ നാരായണൻ എഴുതിയ കവിത

Kalpatta Narayanan — ചിത്രീകരണം : വിഷ്ണു റാം

1

ഞാൻ

എന്റെ വാസസ്ഥലമാണോ?

2

സാമാന്യഭാഷയിലല്ല

സദൃശവാക്യങ്ങളിലാണ്

അവൻ സംസാരിച്ചത്

വാതിലിലൂടെയല്ല

അവൻ വന്നത്

അവൻ കന്യകാപുത്രൻ.

3

എനിക്ക്

വിവർത്തനത്തെ പേടിയാണ്.

കവിത വിവർത്തനം ചെയ്യുമ്പോൾ

ഗദ്യമാവും .

എന്റെ മകളുടെ ആട്ടിൻകുട്ടിയെ

അറവുകാരന് വിറ്റപ്പോൾ

കിട്ടിയ പണം

അവൾക്കൊപ്പം തുള്ളിച്ചാടിയില്ല

അവളുടെ കയ്യിൽ നിന്ന്

തളിരുകൾ തിന്നില്ല

അവളുടെ മടിയിൽ

തലചായ്ച്ച് കിടന്നില്ല.

4

ഇഷ്ടപ്പെട്ട് ചെയ്യുന്ന പ്രവൃത്തി

അദ്ധ്യാനമറിയുന്നില്ല

രതി പോലെ .

കയറിയിട്ടും

കയറിയിട്ടും

മതിവരാത്ത കയറ്റങ്ങൾ.

5

സ്ത്രീയാണ് ആദ്യം

അവൾ പുലർച്ചയെണീറ്റ്

തീ കണ്ടുപിടിക്കുന്നു

Kalpatta Narayanan

6

സൂര്യൻ എന്നും അതേ സൂര്യൻ

ചന്ദ്രൻ എന്നും മറ്റൊരു ചന്ദ്രൻ

7

നിന്നെക്കാണുമ്പോൾ

തോന്നാത്ത സ്നേഹം

നിന്റെ ഛായയുള്ള ഒരുവളെ

കണ്ടപ്പോൾ

നിന്നോട് തോന്നി

അവളകന്നകന്ന്

പോകുകയായിരുന്നു.

8.

സ്ത്രീ

സുന്ദരിയാണ്

ആത്മവിശ്വാസമുള്ള സ്ത്രീ

കൂടുതൽ സുന്ദരിയാണ്

ഇത് പുരുഷന്മാരും

അവളൊഴിച്ചുള്ള സ്തീകളും

തിരിച്ചറിയുന്നതിന് മുമ്പുള്ള കാലത്തിന്റെ

അന്ത്യദശയിലാവാം നമ്മൾ

9

ചിതയിലെരിയുന്നത്

ഞാനല്ല

എന്നിലെരിയുന്നത്

ഞാൻ.

10

യേശുദാസാണ്

മലയാള സിനിമയിലെ

ഏറ്റവും മികച്ച മേക്കപ്പ്മാൻ

നമ്മുടെ കാമുകനടന്മാരെ

ഇത്രമേൽ ആകർഷണീയരാക്കിയത്

മറ്റാരുമല്ല.