കോഴിക്കോട്: മെഡിക്കൽ അൾട്രാസൗണ്ട് സ്കാനറുകളിൽ ഉപയോഗിക്കാൻ കഴിയുന്ന സെൻട്രൽ പ്രോസസിങ് യൂണിറ്റ് വികസിപ്പിച്ച് ചാത്തമംഗലത്തെ നാഷണൽ ഇൻസ്റ്റിറ്റ്യൂട്ട് ഓഫ് ഇലക്‍ട്രോണിക്സ് ആൻഡ് ഇൻഫർമേഷൻ ടെക്നോളജി (നീലിറ്റ്). കേന്ദ്ര ഇലക്‍ട്രോണിക് ടെക്നോളജി മന്ത്രാലയത്തിന്റെ സ്പെഷ്യൽ മാൻപവർ ഡെവലപ്മെന്റ് പ്രോഗ്രാം ചിപ് ടു ഡിസൈൻ സിസ്റ്റം പദ്ധതിക്ക് കീഴിലാണ് ഐ.സി. പ്രോസസർ (ചിപ്പ്) വികസിപ്പിച്ചത്.
വിദേശത്തുനിന്നും ഇറക്കുമതിചെയ്‌യുന്നതിനെക്കാൾ അന്പതുശതമാനത്തിലേറെ വിലക്കുറവിൽ മെഡിക്കൽ അൾട്രാസൗണ്ട് ഉപകരണങ്ങൾ ഇന്ത്യയിൽത്തന്നെ നിർമിക്കാൻ ചിപ്പ് വികസിപ്പിച്ചതിലൂടെ വഴിയൊരുങ്ങിയതായി പ്രോജക്‍ടിന് നേതൃത്വം നൽകിയ നീലിറ്റ് സീനിയർ സയന്റിസ്റ്റ് ഡോ. ജയരാജ് യു. കിടാവ് ചൂണ്ടിക്കാട്ടി. ചികിത്സാച്ചെലവിലും ഇതുവഴി കുറവുണ്ടാവും.
മെഡിക്കൽ അൾട്രാസൗണ്ട് ഇമേജിങ് ഉപയോഗത്തിനായി 180 നാനോ മീറ്റർ സാങ്കേതികവിദ്യയിലാണ് ഇന്റഗ്രേറ്റഡ് സർക്യൂട്ട് (അറെ സിഗ്നൽ പ്രോസസർ) നീലിറ്റ് നിർമിച്ചത്. അമ്പത് മെഗാ ഹർട്സ് വരെ തരംഗദൈർഘ്യത്തിൽ പ്രവർത്തിക്കും. മെഡിക്കൽ അൾട്രാസൗണ്ട് അപ്ലിക്കേഷനായി ഇലക്‍ട്രോണിക് സിസ്റ്റം ബോർഡിൽ പ്രോസസർ വിജയകരമായി പരീക്ഷിച്ചു. സങ്കീർണമായ അർധചാലക ഐ.സി. രൂപകല്പനയിലും വികസനത്തിലും ഇന്ത്യയുടെ മുന്നേറ്റമാണ് നീലിറ്റിന്റേത്. രാജ്യത്തെ വ്യവസായങ്ങൾ നിലവിൽ അഭിമുഖീകരിക്കുന്ന ഐ.സി. ക്ഷാമം ലഘൂകരിക്കാൻ പ്രോസസർ വികസനം സഹായകരമാവും. സാങ്കേതികവിദ്യാ കൈമാറ്റത്തിനായി കമ്പനികളിൽനിന്ന് നീലിറ്റ് താത്‌പര്യപത്രം ക്ഷണിക്കും.
ചിപ് ടു സ്റ്റാർട്ടപ്പ് പദ്ധതിയിൽ നീലിറ്റും
മികവിനുള്ള അംഗീകാരമായി ഇലക്‍ട്രോണിക് മന്ത്രാലയത്തിന്റെ സ്പെഷ്യൽ മാൻപവവർ ഡെവലപ്മെന്റ് പ്രോഗ്രാം ഫോർ ചിപ് ടു സ്റ്റാർട്ടപ്പ് പദ്ധതിയിൽ കോഴിക്കോട് നീലിറ്റിനെയും ഉൾപ്പെടുത്തി. അഞ്ചുവർഷത്തേക്ക് 250 കോടി രൂപയാണ് പദ്ധതിക്കായി നീക്കിവെച്ചത്. കൂടാതെ സ്കിൽഡ് മാൻപവർ അഡ്വാൻസ്ഡ് റിസർച്ച് ആൻഡ് ട്രെയ്നിങ് (സ്മാർട്ട്) ഹാർഡ്വേർ റിമോട്ട് ലാബും നീലിറ്റിൽ സ്ഥാപിക്കും. ഇതിനായി ആറുകോടി നൽകും. ചിപ്പ് നിർമാണത്തിൽ ഇന്ത്യക്ക് സ്വയംപര്യാപ്തത കൈവരിക്കാൻ പദ്ധതി വഴിയൊരുക്കുമെന്ന് നീലിറ്റ് എക്സിക്യുട്ടീവ് ഡയറക്‍ടർ ഡോ. എം.പി. പിള്ള പറഞ്ഞു.
