2021-ൽ കൂടുതൽ ആളുകളും ഗൂഗിളിൽ തിരഞ്ഞത് ആരോഗ്യപ്രധമായ ഭക്ഷണങ്ങളെക്കുറിച്ച് ആയിരുന്നു. കൊവിഡ്-19 മഹാമാരിയുടെ ദിനങ്ങളിലൂടെ കടന്നുപോകുന്നത് പലരിലും ആരോഗ്യപ്രദമായ ഭക്ഷണങ്ങളുടെ കാര്യത്തിൽ കൂടുതൽ നല്ല തിരഞ്ഞെടുപ്പുകൾ നടത്തുന്നതിന് വഴിയൊരുക്കി. വ്യത്യസ്തതരം ഭക്ഷ്യവിഭവങ്ങളുടെ കാര്യത്തിലും ഗൂഗിളിൽ ചില രസകരമായ തിരച്ചിലുകൾ ഉണ്ടായി. ഗൂഗിളിൻ്റെ ഇയർ ഇൻ സെർച്ച് റിപ്പോർട്ടിലെ മുൻനിര ഭക്ഷ്യ വിഭവ ലിസ്റ്റുകളിൽ, ഫെറ്റ പാസ്ത പോലുള്ള ഓഫ്ബീറ്റ് വൈറൽ വിഭവങ്ങൾ കടന്നുവരികയുണ്ടായി. ഈ ലിസ്റ്റുകൾ ഗൂഗിളിന്റെ അഭിപ്രായത്തിൽ മുൻവർഷത്തെ അപേക്ഷിച്ച് ഈ വർഷത്തിൽ ഏറ്റവും കൂടുതൽ ആളുകൾ തിരഞ്ഞ ഭക്ഷ്യ പദങ്ങളെ അടിസ്ഥാനമാക്കിയുള്ളതാണ്.
കഴിഞ്ഞ വർഷം 2020ൽ ഏറ്റവും കൂടുതൽ ആളുകൾ ഗൂഗിളിൽ തിരഞ്ഞ ഭക്ഷണം പട്ടികകളിൽ ഡൽഗോണ കോഫിയും ബനാന ബ്രെഡും പോലെയുള്ള പാചകക്കുറിപ്പുകൾ ഉൾപ്പെടുന്നു. എന്നാൽ ഈ വർഷം ഈ ലളിതവും രസകരവുമായ ചില പാചകക്കുറിപ്പുകൾ അവയെ കടത്തിവെട്ടി മുന്നിട്ടു നിന്നു. ആഗോളതലത്തിൽ 2021-ൽ ഗൂഗിളിൽ ഏറ്റവും കൂടുതൽ തിരഞ്ഞ ഭക്ഷണം ബിരിയ ടാക്കോസാണ്. ഒരു മെക്സിക്കൻ സ്റ്റൈൽ വിഭവമാണ് ബിരിയ ടോക്കോസ് (Birria Tacos). നല്ല എരിവ് ചേർത്ത ആട്ടിറച്ചി ഉപയോഗിച്ച് തയ്യാറാക്കുന്നതാണ്. ഇന്തോനേഷ്യൻ ഫ്രൈഡ് റൈസായ നാസി ഗോറെംഗ് (Nasi Goreng) പട്ടികയിൽ രണ്ടാം സ്ഥാനത്തുണ്ട്. വളരെ എളുപ്പത്തിൽ തയ്യാറാക്കാൻ കഴിയുന്ന ഫെറ്റ പാസ്ത (Feta Pasta) മൂന്നാം സ്ഥാനത്താണ്.
ബേക്ക്ഡ് ഓട്സ്, ഉരുളക്കിഴങ്ങ് സൂപ്പ്, ഓട്സ് പാചകക്കുറിപ്പുകൾ തുടങ്ങിയവ ആദ്യ പത്ത് വിഭവങ്ങളിൽ ഉൾപ്പെടുന്നു. കൗതുകകരമെന്നു പറയട്ടെ, ആഗോളതലത്തിൽ ട്രെൻഡുചെയ്യുന്ന മികച്ച 10 പാചകക്കുറിപ്പുകളിൽ മൂന്ന് ജാപ്പനീസ് വിഭവങ്ങളും ഉൾപ്പെട്ടിരിക്കുന്നു. ഷോഗയാക്കി, ടെറിയാക്കി ആംബർജാക്ക്, ടോൻജിരു എന്നിവയാണവ. കഴിഞ്ഞവർഷം ഗൂഗിളിൽ ഏറ്റവും കൂടുതൽ ആളുകൾ തിരഞ്ഞ 10 ഭക്ഷണങ്ങൾ ഇവയെല്ലാമാണ് :
1) ബിരിയ ടാക്കോസ് – മെക്സിക്കൻ വിഭവം
2) നാസി ഗോറെങ് – ഇന്തോനേഷ്യൻ
3) ഫെറ്റ പാസ്ത – ഫിൻലാൻഡ്, ഇറ്റലി
4) ചാർക്കുട്ടറി ബോർഡ് – ഫ്രാൻസ് പതിനഞ്ചാം നൂറ്റാണ്ട്
5) ഷോഗയാക്കി – ജാപ്പനീസ്
6) പൊട്ടറ്റോ സൂപ്പ് –
7) ടെറിയാക്കി ആംബർജാക്ക് – മറ്റൊരു ജാപ്പനീസ് വിഭവം
8) ടോൺജിരു – മറ്റൊരു ജാപ്പനീസ് വിഭവം
9) ബേക്ക്ഡ് ഓട്സ് –
10) ഓവർനൈറ്റ് ഓട്സ് –
2021 ൽ ഇന്ത്യയിൽ ഏറ്റവും കൂടുതൽ തിരഞ്ഞ
കൊറോണ വ്യാപനവും ലോക്കഡോൺ ദിനങ്ങളും ആയിരുന്നെങ്കിലും നിരവധി ആളുകൾ പുതുരുചികൾ പരീക്ഷിക്കുന്നതിൽ മടികാട്ടിയില്ല. 2021-ൽ ഇന്ത്യയിൽ ഏറ്റവും കൂടുതൽ ആളുകൾ ഗൂഗിളിൽ തിരഞ്ഞ വിഭവങ്ങൾ വളരെ വ്യത്യസ്തമായാണ്. പുതുപുത്തൻ വിദേശ വിഭവങ്ങൾ പരീക്ഷിച്ചു നോക്കുന്ന കാര്യത്തിൽ ഈ വർഷവും ഇന്ത്യക്കാർ ഒട്ടും പുറകോട്ട് ആയിരുന്നില്ല. പ്രാദേശിക ഇന്ത്യൻ വിഭവങ്ങൾക്കൊപ്പം രാജ്യത്തെ നാടൻ പാചകരീതികളുടെ കൂടി തിരയലുകൾ ആയിരുന്നു കഴിഞ്ഞ വർഷത്തിൽ ഗൂഗിളിൽ കൂടുതൽ ട്രെൻഡിംഗ്. 2021-ൽ ഗൂഗിളിൽ ഇന്ത്യയിൽ ഏറ്റവുമധികം ആളുകൾ തിരഞ്ഞ ഭക്ഷണമായിരുന്നു എനോക്കി മഷ്റൂം. ലിസ്റ്റിൽ അടുത്തത് മോദക് ആണ്. അതിനടുത്തത് മേത്തി മലൈ മാറ്ററും. മറ്റ് ട്രെൻഡിംഗ് പാചകക്കുറിപ്പുകളിൽ ചിക്കൻ സൂപ്പ്, കുക്കികൾ, മാറ്റർ പനീർ തുടങ്ങിയ വിഭവങ്ങൾ ഉൾപ്പെടുന്നു.
1) എനോക്കി മഷ്റൂം – ജാപ്പനീസ് ഭക്ഷ്യവിഭവങ്ങളിൽ വ്യാപകമായി ഉപയോഗിച്ച് വന്നിരുന്ന ഒന്നാണ് ഇത്തരം കൂൺ. ഒരു വെളുത്ത കൂൺ ആണ് ഇത്. ഇത് ഉപയോഗിച്ചുള്ള പാചകക്കുറിപ്പുകൾ ഇന്ത്യക്കാർക്ക് ഏറെ പ്രിയപ്പെട്ടതാണെന്ന് ഗൂഗിളിൻ്റെ കണക്കുകൾ സൂചിപ്പിക്കുന്നു.
2) മോദക് – ഗണേശ ചതുർത്ഥി ഉത്സവത്തോടനുബന്ധിച്ച് ഉണ്ടാക്കുന്ന ഒരു ജനപ്രിയ മധുരപലഹാരമായ മോദക്ക് 2021-ലാണ് ഏറ്റവും കൂടുതൽ തിരയപ്പെട്ടത്. വളരെ എളുപ്പത്തിൽ കുറച്ചു സമയത്തിനുള്ളിൽ തന്നെ തയ്യാറാക്കാൻ കഴിയുന്ന മധുര വിഭവങ്ങളിൽ ഒന്നാണിത്.
3) മേത്തി മാറ്റർ മലൈ – ശീതകാല പച്ചിലകൾ കൂടുതലായി ഉപയോഗിച്ചുകൊണ്ട് തയ്യാറാക്കപ്പെടുന്ന ഈ ക്രീം വിഭവം ആരോഗ്യവും രുചിയും ഒരുമിച്ച് കൊണ്ടുവരുന്നതാണ്. അതുകൊണ്ടുതന്നെ ഇന്ത്യയിലെ ആളുകൾ ഏറ്റവും കൂടുതൽ തിരഞ്ഞ മൂന്നാമത്തെ ഭക്ഷ്യവിഭവം ഇതാണ്.
4) പാലക് – മറ്റൊരു ശൈത്യകാല വിഭവമായ പാലക് പണ്ടുമുതലേ ജനപ്രിയമാതാണ്. സസ്യാഹാരികൾക്ക് വിറ്റാമിനുകളുടെയും ധാതുക്കളുടെയും ആരോഗ്യകരമായ ഉറവിടം കൂടിയാണിത്.
5) ചിക്കൻ സൂപ്പ് – പ്രോട്ടീൻ സമ്പുഷ്ടമായ ചിക്കൻ സൂപ്പ് ശരീരത്തെ തൽക്ഷണം തൃപ്തിപ്പെടുത്തുകയും പോഷിപ്പിക്കുകയും ചെയ്യുന്ന ഒരു പാചകക്കുറിപ്പാണ്.
6) പോൺ സ്റ്റാർ മാർട്ടിനി – പാഷൻ ഫ്രൂട്ട് ജ്യൂസ്, നാരങ്ങാ നീര്, വോഡ്ക എന്നിവ ഉപയോഗിച്ച് നിർമ്മിക്കുന്ന ഒരു കോക്ടെയ്ൽ വിഭവം ആണിത് .
7) ലസാഗ്ന – പാസ്തയുടെ ഷീറ്റുകളിൽ മരിനാരയും ചീസും ചേർത്താണ് ഏറെ തൃപ്തികരമായ ഈ വിഭവം തയ്യാറാക്കുന്നത് . ഒരു ഇറ്റാലിയൻ വിഭവമാണിത്.
8) കുക്കികൾ – എല്ലാത്തരം കുക്കി പാചകക്കുറിപ്പുകളും ഇന്ത്യക്കാർ പരീക്ഷിച്ചു നോക്കാൻ താൽപര്യമുള്ളവരാണ്. ഈ വർഷം കേക്കുകളോടും ബ്രെഡുകളോടുമുള്ള ഇഷ്ടത്തെക്കാൾ കൂടുതൽ ഇന്ത്യക്കാർക്ക് താല്പര്യം കുക്കികളോട് ആയിരുന്നു.
9) മട്ടർ പനീർ – ഏറ്റവും ജനപ്രിയമായ വെജിറ്റേറിയൻ കറികളിലൊന്നായ മാട്ടർ പനീർ ഇന്ത്യക്കാർക്ക് ഏറ്റവും പ്രിയപ്പെട്ടതാണ്
10) കാഡ – ഈ വർഷത്തിൽ ഏറ്റവും കൂടുതൽ ആളുകൾക്ക് ഉണ്ടായിരുന്ന ഏറ്റവും വലിയ ആശങ്കകളിലൊന്നായിരുന്നു രോഗ പ്രതിരോധശേഷി നിലനിർത്തുന്നത്. ഇതിന് ഉത്തമമായ ഒരു മരുന്നും വിഭവും കൂടിയാണ് കാഡ. അതുകൊണ്ടുതന്നെയാണ് ഇതും ഈ പട്ടികയിൽ ഇടംപിടിച്ചത്.
ഈ ട്രെൻഡിംഗ് കുറച്ച് എണ്ണമെങ്കിലും നിങ്ങളും തിരഞ്ഞുനോക്കിയിട്ടില്ലേ? ഇതിൽ എത്രയെണ്ണം നിങ്ങൾ ഇതുവരെ പരീക്ഷിച്ചു നോക്കി. ഇല്ലെങ്കിൽ ഈ വർഷം തീരുന്നതിനുമുമ്പ് പരീക്ഷിക്കാൻ ഇനിയും സമയം ബാക്കിയുണ്ട്!
