പുളിപ്പിച്ച ഭക്ഷണങ്ങൾ കഴിക്കുന്നത് വഴി ലഭിക്കുന്ന ചില ആരോഗ്യ ഗുണങ്ങൾ എന്തിലൊക്കെയാണെന്ന് അറിഞ്ഞിരിക്കാം.
നല്ല ദഹനത്തിന്
ദഹന പ്രക്രിയ മെച്ചപ്പെടുത്താൻ പുളിപ്പിച്ച ഭക്ഷണം കഴിക്കുന്നത് ഏറെ നല്ലതാണ്. പുളിപ്പിച്ച ഭക്ഷണങ്ങൾ ദഹനരസം ഉത്പാദിപ്പിക്കുന്നതിന്റെ അളവ് വർധിപ്പിക്കും. ഒരു പ്രായം പിന്നിട്ടാൽ ആമാശയത്തിൽ ദഹന രസം ഉത്പാദിപ്പിക്കപ്പെടുന്നതിന്റെ അളവ് ഗണ്യമായി കുറഞ്ഞേക്കാം. ഈ പ്രശ്നത്തെ മറികടക്കാൻ പുളിപ്പിച്ചെടുത്ത ഭക്ഷണങ്ങൾ കഴിക്കുന്നത് വഴി സാധിക്കും.
പോഷകങ്ങൾ വേഗത്തിൽ ആഗിരണം ചെയ്യാൻ:
പുളിപ്പിച്ച ഭക്ഷണങ്ങളിലെ പോഷകങ്ങൾ ശരീരത്തിന് വേഗത്തിൽ ആഗിരണം ചെയ്യാൻ സാധിക്കും. നാം സാധാരണയായി ഭക്ഷണം കഴിക്കുമ്പോൾ അവയിലെ പോഷകങ്ങൾ പലപ്പോഴും ശരീരത്തിന് പെട്ടന്ന് ആഗിരണം ചെയ്യാൻ കഴിഞ്ഞെന്ന് വരില്ല. ഇതിന് തടസ്സമാകുന്നത് ചില ആന്റി ന്യൂട്രിയന്റുകളാണ്. എന്നാൽ പുളിപ്പിച്ച ഭക്ഷണങ്ങൾ ഇത്തരം ഘടകങ്ങളെ ഇല്ലാതാക്കാനും സഹായിക്കും.
ശരീരഭാരം കുറയ്ക്കാൻ
ശരീരത്തിലെ ചീത്ത ബാക്ടീരിയകൾ പല രോഗങ്ങൾക്ക് കാരണമാകുകയും ശരീരഭാരം വർധിക്കാൻ ഇടയാക്കുകയും ചെയ്യും. എന്നാല പുളിപ്പിച്ച ഭക്ഷണങ്ങളിലൂടെ നല്ല ബാക്ടീരിയയുടെ പ്രവർത്തനം മെച്ചപ്പെടുകയും ഇവ ശരീരത്തിലെ അനാവശ്യ വസ്തുക്കളെ പുറന്തള്ളാൻ സഹായിക്കുകയും ചെയ്യും. കുടലിലെ ചില പ്രോബയോട്ടിക് ബാക്ടീരിയകൾ ശരീരഭാരം കുറയ്ക്കാനും വയറിലെ കൊഴുപ്പ് കുറയാനും ഏറെ മികച്ചതാണ്.
കുടലിന്റെ പ്രവർത്തനങ്ങൾ മെച്ചപ്പെടുത്താൻ:
കുടലിന്റെ പ്രവർത്തനങ്ങൾ മികച്ചതാക്കി ആരോഗ്യം മെച്ചപ്പെടുത്താനും പുളിപ്പിച്ച ഭക്ഷണങ്ങൾ സഹായിക്കും. നേരത്തെ സൂചിപ്പിച്ചത് പോലെ നമ്മുടെ ശരീരത്തിന് ചില നല്ല ബാക്റ്റീരിയകളുടെ ആവശ്യമുണ്ട്. കുടലിന്റെ പ്രവർത്തനങ്ങൾ മെച്ചപ്പെടുത്താൻ സഹായിക്കുന്ന ഇത്തരം ബാക്റ്റീരിയകൾ വളരാൻ പുളിപ്പിച്ച ഭക്ഷണങ്ങൾ കഴിക്കുന്നത് വഴി സാധിക്കും. വയറിളക്കം, മലബന്ധം തുടങ്ങിയവ പോലുള്ള പ്രശ്നമാണ് അകറ്റാൻ ഈ നല്ല ബാക്ടീരിയ അഥവാ പ്രോബയോട്ടിക്സ് സഹായിക്കുന്നുണ്ട്. ഇത് കൂടാതെ ദഹന പ്രവർത്തനങ്ങൾ മെച്ചപ്പെടുന്നത് വഴി അസിഡിറ്റി, ഗ്യാസ് ട്രബിൾ, അൾസർ തുടങ്ങിയ പ്രശ്നങ്ങളെ മറികടക്കാനും ഇത്തരം ഭക്ഷണങ്ങൾ സഹായിക്കും.
മാനസികാരോഗ്യം മികച്ചതാക്കാം:
പുളിപ്പിച്ച ഭക്ഷണങ്ങൾ കഴിക്കുന്നതും മാനസികാരോഗ്യം മെച്ചപ്പെടുത്തുന്നതും തമ്മിൽ ബന്ധപ്പെട്ടിരിക്കുന്നു എന്ന് പറഞ്ഞാൽ വിശ്വസിക്കുമോ? നമ്മുടെ മാനസികാവസ്ഥയെ നിയന്ത്രിക്കുന്ന ന്യൂറോ ട്രാൻസ്മിറ്റർ സെറോട്ടോണിൻ ഉൽ‌പാദനം മെച്ചപ്പെടുത്താൻ ഈ ഭക്ഷണങ്ങൾ സഹായിക്കും. ഇത് മാനസികാരോഗ്യം മികച്ച രീതിയിലാക്കാൻ സഹായിക്കുന്നു. പ്രോബയോട്ടിക് ബാക്റ്റീരിയകൾ പ്രവർത്തിക്കുന്നത് വിഷാദം, ഉത്കണ്ഠ തുടങ്ങിയ അവസ്ഥകൾ ഇല്ലാതാക്കാൻ സഹായിക്കും.
പ്രതിരോധ ശേഷി മികച്ചതാക്കാൻ:
ഇത്തരം ഭക്ഷണങ്ങളിൽ വിറ്റാമിൻ സി, ഇരുമ്പ് തുടങ്ങിയ പോഷകങ്ങൾ ധാരാളമായുണ്ട്. ഇവ ശരീരത്തിന്റെ പ്രതിരോധ ശേഷി വർധിപ്പിക്കാൻ ഇത് ഏറെ നിർണ്ണായകമായ ഘടകങ്ങളാണ്. പ്രോബയോട്ടിക് അളവ് കുടലിൽ കൂടുതലായി ഉണ്ടാകുന്നത് വഴി പല തരം രോഗങ്ങളെ ചെറുക്കാനുള്ള കഴിവ് ശരീരത്തിന് ലഭിക്കും. തുമ്മൽ, ജലദോഷം തുടങ്ങിയ പ്രശ്നങ്ങൾ നിങ്ങളെ പതിവായി അലട്ടുന്നുണ്ടെങ്കിൽ ഇനി മുതൽ പുളിപ്പിച്ച ഭക്ഷണങ്ങൾ കൂടുതലായി ഒന്ന് കഴിച്ച് നോക്കൂ…
ഹൃദയാരോഗ്യം ഉറപ്പാക്കാൻ:
രക്തത്തിലെ പഞ്ചസാരയുടെ അളവ് നിയന്ത്രിക്കാനും രക്തസമ്മർദ്ദം, കൊളസ്‌ട്രോൾ തുടങ്ങിയവ നിയന്ത്രണത്തിൽ കൊണ്ടുവരാനും പുളിപ്പിച്ച ഭക്ഷണങ്ങൾ കഴിക്കുന്നത് സഹായിക്കും. ജീവിതശൈലി രോഗങ്ങളെ ചെറുക്കാനും ഇത്തരം ഭക്ഷണം ഗുണകരമാണ്. പതിവാക്കിയാൽ ചില മരുന്നുകളുടെ ഉപയോഗം പോലും വേണ്ടെന്ന് വെക്കാം എന്നാണ് പറയപ്പെടുന്നത്.
എല്ലുകളുടെ ബലത്തിന്:
എല്ലുകൾക്ക് ആവശ്യമായ ധാതുക്കൾ വളരെ പെട്ടന്ന് ആഗിരണം ചെയ്യാനും അതുവഴി അവയെ ബലപ്പെടുത്താനും പുളിപ്പിച്ച ഭക്ഷണങ്ങൾ സഹായിക്കും.
നാം സാധാരണയായി പുളിപ്പിച്ച് തയ്യാറാക്കുന്ന ഭക്ഷണങ്ങൾ ഇവയാണ്:
ദോശ, ഇഡ്ഡലി: നമ്മുടെ പ്രഭാത ഭക്ഷണത്തിൽ നിന്ന് ഒഴിവാക്കാനാകാത്ത രണ്ട് വിഭവങ്ങളാണ് ദോശയും ഇഡ്ഡലിയും. തലേ ദിവസം തന്നെ തയ്യാറാക്കുന്ന മാവ് പുളിപ്പിച്ചാണ് ദോശയും ഇഡ്ഡലിയും തയ്യാറാക്കുന്നത്.
അപ്പം: ദോശ, ഇഡ്ഡലി എന്നിവ തന്നെ പുളിപ്പിച്ച് തയ്യാറാക്കുന്ന പ്രഭാത ഭക്ഷണമാണ് അപ്പം. വെള്ളയപ്പം, പാലപ്പം എന്നിങ്ങനെയൊക്കെ നാം പേരിട്ട് വിളിക്കുന്ന ഈ വിഭവം തയ്യാറാക്കാനും മാവ് പുളിപ്പിച്ചെടുക്കണം. യീസ്റ്റ് ചേർത്തോ അല്ലെങ്കിൽ നാളികേരവെള്ളം പോലുള്ളവ ചേർത്തോ ചെറിയ രീതിയിൽ പുളിപ്പ് നൽകിയാണ് ഇത് തയ്യാറാക്കുന്നത്.
പഴങ്കഞ്ഞി: ഇന്ന് പുതിയ തലമുറയ്ക്ക് പഴങ്കഞ്ഞിയെ കുറിച്ച് വലിയ ധാരണ ഉണ്ടാകില്ല. എന്നാൽ പണ്ടുകാലത്ത് ആളുകൾ പതിവായി പ്രഭാത ഭക്ഷണമായി ഉപയോഗിച്ചിരുന്ന ഒന്നാണ് പഴങ്കഞ്ഞി. തലേദിവസത്തെ പഴങ്കഞ്ഞി കഴിക്കുന്നത് ആരോഗ്യം മികച്ചതാക്കാൻ സഹായിക്കും.
തൈര്: തൈര് പ്രോബയോട്ടിക്സ് ഗുണങ്ങൾ അടങ്ങിയതാണ്. അതിനാൽ തൈര് ദിവസവും കഴിക്കുന്നത് മികച്ച ആരോഗ്യ ഗുണങ്ങളുണ്ടാക്കും.
